ಮತದಾನಕ್ಕೆ ಕಂಡು ಬಂದ ಬಿರುಸು, ಶೇ 83 ಮತದಾನ

 

ಜಿಲ್ಲೆಯ ಒಟ್ಟು 13 ಮತಗಟ್ಟೆಯಲ್ಲಿ ಶೇ 83 ಮತದಾನವಾಗಿದೆ. ಮಧ್ಯಾಹ್ನ 12 ಗಂಟೆ ಹೊತ್ತಿಗೆ ಶೇ 25ರಷ್ಟು ಮಾತ್ರ ಮತದಾನ ಆಗಿತ್ತು. ಮಧ್ಯಾಹ್ನ ಮತದಾರರು ಮತಗಟ್ಟೆಯತ್ತ ದೌಡಾಯಿಸಿದ್ದರಿಂದ ಮತದಾನ  ಪ್ರಮಾಣ ಇದ್ದಕ್ಕಿದ್ದಂತೆ ಏರಿಕೆ ಕಂಡಿತು.

 

ಶೇ 85ರಷ್ಟು ಪುರುಷ ಮತದಾರರು, ಶೇ 77ರಷ್ಟು ಮಹಿಳಾ ಮತದಾರರು ಮತದಾನ ಮಾಡಿದ್ದಾರೆ.

 

ಗರಿಷ್ಠ ಮತದಾನ ಕುಣಿಗಲ್‌ನಲ್ಲಿ ಶೇ 94, ಪಾವಗಡ ಮತ್ತು ಮಧುಗಿರಿಯಲ್ಲಿ ಶೇ 89ರಷ್ಟು ಮತದಾನವಾಗಿದೆ. ಕನಿಷ್ಠ ಮತದಾನ ತುಮಕೂರಿನ ಮತಗಟ್ಟೆ 18–ಸಿಯಲ್ಲಿ ಶೇ 65ರಷ್ಟಾಗಿದೆ.

 

ಕ್ಷೇತ್ರದ ಒಟ್ಟು 21 ಸಾವಿರ ಮತದಾರರಲ್ಲಿ 7508 ಮತದಾರರು ತುಮಕೂರು ಜಿಲ್ಲೆಯಲ್ಲೇ ಇದ್ದು, ಅದರಲ್ಲೂ ತುಮಕೂರು ನಗರದಲ್ಲಿ 2540ಕ್ಕೂ ಅಧಿಕ ಮತದಾರರು ಇದ್ದುದರಿಂದ ಪ್ರಮುಖ ರಾಜಕೀಯ ಪಕ್ಷಗಳ ಬೆಂಬಲಿತ ಅಭ್ಯರ್ಥಿಗಳು  ಜಿಲ್ಲೆಯ ಮತಗಟ್ಟೆಗಳ ಮುಂದೆ ನಿಂತು ಮತಯಾಚಿಸಿದರು.

 

ಜೆಡಿಎಸ್ ಬೆಂಬಲಿತ ಅಭ್ಯರ್ಥಿ ರಮೇಶ್ ಬಾಬು, ಕಾಂಗ್ರೆಸ್ ಬೆಂಬಲಿತ ಅಭ್ಯರ್ಥಿ ಟಿ.ಎಸ್.ನಿರಂಜನ್‌ ತುಮಕೂರು ಜಿಲ್ಲೆಯನ್ನು ಬಿಟ್ಟು ಕದಲಲಿಲ್ಲ.

 

ವಿಶೇಷವಾಗಿ ತುಮಕೂರು ನಗರದ 4 ಮತಗಟ್ಟೆಗಳ ಮತ ಹಾಕಲು ಬರುತ್ತಿದ್ದ ಮತದಾರರಿಗೆ ಉಭಯ ಪಕ್ಷದ ಅಭ್ಯರ್ಥಿಗಳು ಮನವಿ ಮಾಡಿ ಮತಯಾಚಿಸಿದರು. ಬಿಜೆಪಿ ಅಭ್ಯರ್ಥಿ ಬಸವರಾಜ್ ಹಾಗೂ ಜೆಡಿಎಸ್ ಬಂಡಾಯ ಅಭ್ಯರ್ಥಿ ಎಚ್.ಎಸ್.ಅರವಿಂದ್ ಅವರೂ ಜಿಲ್ಲೆಯಲ್ಲಿ ಮತಯಾಚಿಸಿದರು.

 

ಶಾಸಕರಾದ ರಫೀಕ್ ಅಹಮ್ಮದ್, ಬಿ.ಸುರೇಶಗೌಡ, ವಿಧಾನ ಪರಿಷತ್ ಸದಸ್ಯ ಚೌಡರೆಡ್ಡಿ ತೂಪಲ್ಲಿ, ಬಿಜೆಪಿ ಜಿಲ್ಲಾ ಘಟಕದ ಅಧ್ಯಕ್ಷ ಜ್ಯೋತಿ ಗಣೇಶ್, ಕಾಂಗ್ರೆಸ್‌ ಜಿಲ್ಲಾ ಘಟಕದ ಅಧ್ಯಕ್ಷ ಆರ್‌.ರಾಮಕೃಷ್ಣ ಸೇರಿ ಅನೇಕ ಮುಖಂಡರು ಮತಗಟ್ಟೆ ಎದುರುಗಡೆ ನಿಂತು ಯಾಚಿಸಿದರು. ಜಿಲ್ಲೆಯ ಇತರೆ ತಾಲ್ಲೂಕು ಕೇಂದ್ರಗಳಲ್ಲೂ ಪಕ್ಷಗಳ ಕಾರ್ಯಕರ್ತರು, ಮುಖಂಡರು ತಮ್ಮ ಪಕ್ಷ ಬೆಂಬಲಿತ ಅಭ್ಯರ್ಥಿಯ ಪರ  ಮತ ಕೇಳಿದರು.

 

ಮತದಾರರ ಆಕ್ರೋಶ: ತುಮಕೂರಿನ ಮತಗಟ್ಟೆ ಕೇಂದ್ರ 3 ಮತ್ತು 4ರಲ್ಲಿ ಮತದಾನಕ್ಕೆ ಸಂಜೆ 4ರ ಹೊತ್ತಿಗೆ ಮತಗಟ್ಟೆ ಮುಂದೆ 7–8 ಮತದಾರರು ಮತದಾನಕ್ಕೆ ನಿಂತಿದ್ದರು. ಸಮಯ ಮುಗಿದಿದೆ. ಮತದಾನಕ್ಕೆ ಅವಕಾಶವಿಲ್ಲ ಎಂದು ಮತಗಟ್ಟೆ ಅಧಿಕಾರಿ ಹೇಳಿದಾಗ ಮತದಾರರು ಆಕ್ರೋಶ ವ್ಯಕ್ತಪಡಿಸಿದರು. 

 

ನಾವು ಮತಗಟ್ಟೆ ಮುಂದೆಯೇ ಇದ್ದೇವೆ. ಬೇರೆ ಎಲ್ಲೋ ದೂರದಲ್ಲಿ ಇಲ್ಲ. ನಿಯಮದ ಪ್ರಕಾರ ಮತದಾನಕ್ಕೆ ತಮಗೆ ಅವಕಾಶವಿದೆ. ಹೀಗಾಗಿ, ಮತದಾನಕ್ಕೆ ಅವಕಾಶ ಕೊಡಬೇಕು ಎಂದು ಒತ್ತಾಯ ಮಾಡಿದರು.

 

ಹೀಗೆ ಒತ್ತಾಯ ಮಾಡಿದ ಬಳಿಕ ಎಚ್ಚೆತ್ತ ಮತಗಟ್ಟೆ ಅಧಿಕಾರಿಗಳು ಮತದಾನಕ್ಕೆ ಅವಕಾಶ ಮಾಡಿಕೊಟ್ಟರು.

 

ಇದೇ ರೀತಿ ಮತಗಟ್ಟೆ 1ರಲ್ಲಿ ಒಬ್ಬ ಶಿಕ್ಷಕಿ ಮತದಾನಕ್ಕೆ ಅವಕಾಶ ಕೋರಿದರೂ ಮತಗಟ್ಟೆ ಅಧಿಕಾರಿ ನಿರಾಕರಿಸಿದ್ದರಿಂದ ವಾಪಸ್ ಹೋದರು.

 

**

ಸಾಮಾನ್ಯ ಚುನಾವಣೆ ಮೀರಿಸಿದ ಅಬ್ಬರ