ಸಿದ್ಧಾರೂಢರ ಮಹಾರಥೋತ್ಸವ 25ಕ್ಕೆ

ಹುಬ್ಬಳ್ಳಿ: ‘ಇಲ್ಲಿನ ಸದ್ಗುರು ಸಿದ್ಧಾರೂಢರ ರಥೋತ್ಸವವು ಇದೇ 25ರಂದು ಸಂಜೆ 5.30ಕ್ಕೆ ನಡೆಯಲಿದ್ದು, ಕರ್ನಾಟಕ, ಆಂಧ್ರಪ್ರದೇಶ, ಮಹಾರಾಷ್ಟ್ರ ಹಾಗೂ ಗೋವಾ ರಾಜ್ಯಗಳಿಂದ ಲಕ್ಷಾಂತರ ಭಕ್ತರು ಭಾಗವಹಿಸುವ ನಿರೀಕ್ಷೆ ಇದೆ’ ಎಂದು ಶ್ರೀ ಸಿದ್ಧಾರೂಢ ಟ್ರಸ್ಟ್‌ ಕಮಿಟಿ ಅಧ್ಯಕ್ಷ ಧರಣೇಂದ್ರ ಭ. ಜವಳಿ ತಿಳಿಸಿದರು.

ಶ್ರೀಮಠದ ಆವರಣದಲ್ಲಿ ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ‘ಈ ಬಾರಿ ಬರಗಾಲವಿದೆ. ಆದರೂ, ಸಿದ್ಧಾರೂಢರ ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಜಾತ್ರಾ ಮಹೋತ್ಸವದಲ್ಲಿ ಭಾಗವಹಿಸಲಿದ್ದಾರೆ. ಬರಗಾಲದಿಂದ ಜನರನ್ನು ಪಾರು ಮಾಡುವಂತೆ ವಿಶೇಷ ಪೂಜಾ ವಿಧಿಗಳನ್ನು ನೆರವೇರಿಸಲಾಗುವುದು’ ಎಂದರು.

ಇದೇ 19ರಿಂದ ಜಾತ್ರಾ ಮಹೋತ್ಸವದ ಕಾರ್ಯಕ್ರಮಗಳು ಜರುಗಲಿದ್ದು, 27ರವರೆಗೂ ಮುಂದುವರಿಯಲಿವೆ. 19ರಿಂದ 24ರವರೆಗೆ ಪ್ರತಿ ದಿನ ರಾತ್ರಿ 8ಕ್ಕೆ ರಾಜ್ಯದ ಹಾಗೂ ಹೊರರಾಜ್ಯಗಳ ಸಂಗೀತಗಾರರಿಂದ ಸಂಗೀತೋತ್ಸವ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳು ನೆರವೇರಲಿವೆ. 24ರಂದು ಶ್ರೀಗಳವರ ಪಾಲಕಿಯು ವಾದ್ಯ ಮೇಳದೊಂದಿಗೆ ನಗರದಲ್ಲಿ ಸಂಚರಿಸಿ ರಾತ್ರಿ ಮಠಕ್ಕೆ ಬರಲಿದೆ. ಅಂದು ಅಹೋರಾತ್ರಿ ಜಾಗರಣೆ ನಡೆಯಲಿದೆ.

25ರಂದು ಪಾಲಕಿಯು ಊರೊಳಗೆ ಹೋಗಿ ಬಂದ ನಂತರ ಸಂಜೆ ರಥೋತ್ಸವ ಜರುಗುವುದು. ಶ್ರೀಮಠದಲ್ಲಿ ನಡೆಯುವ ಕೌದಿಪೂಜೆಯು ವಿಶೇಷವಾಗಿದ್ದು, ಯಾವುದೇ ಆಡಂಬರವಿಲ್ಲದೇ ಅಲಂಕಾರಕ್ಕೆ ಕೌದಿ, ಪ್ರಸಾದಕ್ಕೆ ಮಣ್ಣಿನ ಪಾತ್ರೆ, ನೀರಿಗಾಗಿ ಮಣ್ಣಿನ ಮಡಕೆ ಸಾಕು ಎಂದು ಸಿದ್ಧಾರೂಢರು ಬಯಸಿದ್ದರು. ಹಾಗಾಗಿ 27ರಂದು ಸಂಜೆ 6ಕ್ಕೆ ಕೌದಿಪೂಜೆ ನಡೆಯಲಿದೆ ಎಂದು ವಿವರಿಸಿದರು.