ಕಲಾ ವಿಭಾಗದಲ್ಲೂ ಉತ್ತಮ ಭವಿಷ್ಯವಿದೆ

*
ನಾನು ಪದವಿ ಓದುತ್ತಿದ್ದೇನೆ. ನನಗಿಂತ ಒಂದೆರಡು ವರ್ಷ ಚಿಕ್ಕವಳಾದ ಹುಡುಗಿಯನ್ನು ಪ್ರೀತಿಸುತ್ತಿದ್ದೇನೆ. ಆದರೆ ಅವಳು ನನ್ನ ಪ್ರೀತಿಯನ್ನು ನಿರಾಕರಿಸಿದಳು. ಅವಳೀಗ ಬೇರೆ ಹುಡುಗನನ್ನು ಹುಡುಕುತ್ತಿರುವುದಾಗಿ ಹೇಳುತ್ತಿದ್ದಾಳೆ. ನಾನು ತುಂಬಾ ಅವಮಾನ, ಮುಜುಗರಕ್ಕೆ ಒಳಗಾಗಿದ್ದೇನೆ. ಇನ್ನೇನು ಪರೀಕ್ಷೆಗಳು ಶುರುವಾಗುವ ಸಮಯ. ಆದರೆ ಇದರಿಂದಾಗಿ ಓದಿನತ್ತ ಏಕಾಗ್ರತೆ ಬರುತ್ತಿಲ್ಲ. ಏನು ಮಾಡಲಿ?

ಕಾಲೇಜಿಗೆ ಹೋಗುವ ಸಮಯದಲ್ಲಿ ಪ್ರೀತಿಯ ಆಕರ್ಷಣೆ ಸಹಜ. ಅವಳು ನಿರಾಕರಿಸಿದ್ದರಿಂದ ಅವಮಾನ ಆಗಿದೆ ಎಂಬ ಮನೋಭಾವವನ್ನು ಮನಸ್ಸಿನಿಂದ ತೆಗೆದುಬಿಡಿ. ಪದೇಪದೇ ಇದನ್ನೇ ಚಿಂತಿಸುತ್ತಾ ಮನಸು ಹಾಳು ಮಾಡಿಕೊಳ್ಳಬೇಡಿ. ಏಕಾಏಕಿಯಾಗಿ ಇದರಿಂದ ಹೊರಕ್ಕೆ ಬರುವುದು ನಿಮಗೆ ಕಷ್ಟವಾಗಬಹುದು.  ಸಮಯ ಎಲ್ಲವನ್ನೂ ಮರೆಸುತ್ತದೆ. ಈಗ ನಿಮ್ಮ ಭವಿಷ್ಯದ ದೃಷ್ಟಿಯಿಂದ ನಿಮಗೆ ಬೇಕಿರುವುದು ಓದು. ಅದರತ್ತ ಮನಸ್ಸನ್ನು ಕೇಂದ್ರೀಕರಿಸಿ. ಭವಿಷ್ಯದ ಚಿಂತನೆಯತ್ತ ಮನಸ್ಸನ್ನು ಹರಿಸಿ. ಎಲ್ಲವೂ ಒಳ್ಳೆಯದಾಗುತ್ತದೆ.

*
ನನಗೆ ಕಲಾ ವಿಭಾಗದಲ್ಲಿ ಆಸಕ್ತಿ. ಆದರೆ ಅದನ್ನು ಕಲಿತರೆ ಮುಂದೆ ಕೆಲಸ ಸಿಗುವುದಿಲ್ಲ ಎನ್ನುವುದು ಪೋಷಕರ ಮಾತು. ವಾಣಿಜ್ಯ ಅಥವಾ ವಿಜ್ಞಾನ ತೆಗೆದುಕೊಳ್ಳಲು ಅವರು ಬಲವಂತ ಮಾಡುತ್ತಿದ್ದಾರೆ. ನನಗೆ ಅದು ಸ್ವಲ್ಪವೂ ಇಷ್ಟವಿಲ್ಲ. ಅಪ್ಪ–ಅಮ್ಮನಿಗೆ ಹೇಗೆ ಬುದ್ಧಿ ಹೇಳಲಿ?
ಸಂಜಯ, ಕೋರಮಂಗಲ
ಕಲಾ ವಿಭಾಗವನ್ನು ಆಯ್ಕೆ ಮಾಡಿಕೊಂಡರೆ ಉತ್ತಮ ಭವಿಷ್ಯವಿಲ್ಲ ಎಂದು ನಿಮ್ಮ ಪೋಷಕರು ಅಂದುಕೊಂಡಿರುವುದು ತಪ್ಪು. ಅದರಲ್ಲೂ ಉಜ್ವಲ ಭವಿಷ್ಯವಿದೆ. ಮುಂದೆ, ಕಾನೂನು, ಮಲ್ಟಿಮೀಡಿಯಾ, ಸಂಶೋಧನೆ ಇತ್ಯಾದಿ ಅಧ್ಯಯನ ನಡೆಸಲು ಕಲಾ ವಿಭಾಗವೇ ಸಹಕಾರಿ. ಕಲಾ ವಿಭಾಗದಲ್ಲಿಯೇ ಕಲಿತು ಬೃಹತ್‌ ಮಟ್ಟದಲ್ಲಿ ಸಾಧನೆ ಮಾಡಿದವರು ಲಕ್ಷಾಂತರ ಮಂದಿ ಇದ್ದಾರೆ. ಕಲಾ ವಿಭಾಗವನ್ನು ಕೇವಲವಾಗಿ ತೆಗೆದುಕೊಳ್ಳಬಾರದು. ಬದ್ಧತೆಯಿಂದ ಅಧ್ಯಯನ ನಡೆಸುವುದು ಮುಖ್ಯ.

ಪ್ರಶ್ನೆ ಕಳುಹಿಸಿ : ನಮ್ಮ ಇಮೇಲ್‌– metropv@prajavani.co.in ವಾಟ್ಸ್‌ಆ್ಯಪ್: 9513322931