ಬಡ್ತಿ ಮೀಸಲಾತಿ: ದುರುದ್ದೇಶವಿಲ್ಲ

ಉದ್ಯೋಗದಲ್ಲಿ ಬಡ್ತಿ ಮೀಸಲಾತಿಯ ಬಗ್ಗೆ ಹೇಳಹೊರಟು ಒಟ್ಟಾರೆ ಮೀಸಲಾತಿಯ ಔಚಿತ್ಯದ ಬಗೆಗೇ ಹೆಚ್ಚು ಚರ್ಚಿಸಿರುವ ಮಹೇಶ ಸಿ.ಎಚ್‌. ಅವರು (ಸಂಗತ, ಫೆ. 17) ಮೀಸಲಾತಿಯ ಪರಿಕಲ್ಪನೆಯನ್ನು ಅರ್ಥ ಮಾಡಿಕೊಂಡಿಲ್ಲವೇನೋ ಎನಿಸುತ್ತದೆ.

ಮೀಸಲಾತಿಯ ಪ್ರಯೋಜನ ಪಡೆಯುತ್ತಿರುವವರು ಕೇವಲ ಪರಿಶಿಷ್ಟರು ಎಂಬಂತೆ ಬಿಂಬಿಸಿ, ಅವರೆಲ್ಲರೂ ಭಾರತದ ಕೋಟ್ಯಧೀಶ್ವರರ ಸಾಲಿನಲ್ಲಿ ಇದ್ದಾರೆ ಎನ್ನುವ ಹಾಗೆ ಹೇಳಿರುವುದು ಉತ್ಪ್ರೇಕ್ಷೆಯೇ ಸರಿ.

ದಲಿತರು ಸಂಪತ್ತು, ಅಧಿಕಾರ ಅನುಭವಿಸಿದರೆ ಕಣ್ಣು ಕುಕ್ಕುತ್ತದೆ. ಅದೇ ಸಾವಿರಾರು ಕೋಟಿ ರೂಪಾಯಿ ವಂಚಿಸಿ ದೇಶದಿಂದ ಪಲಾಯನ ಆದವರು, ತೆರಿಗೆ ವಂಚಕರು, ದೇಶದ ಸಂಪತ್ತಿನ ಹೆಚ್ಚಿನ ಪಾಲನ್ನು ಅನುಭವಿಸುತ್ತಿರುವವರು ಯಾವ ವರ್ಗಕ್ಕೆ ಸೇರಿದವರೆಂಬ ಅರಿವಿಲ್ಲವೇ?
ದಲಿತರಿಗೆ ಮಾತ್ರ ಹಾಸ್ಟೆಲ್‌ಗಳು ಇಲ್ಲ. ಹಿಂದುಳಿದ ವರ್ಗದವರಿಗೂ ಪ್ರತ್ಯೇಕ ಹಾಸ್ಟೆಲ್‌ಗಳಿವೆ.

ಅಲ್ಲಿ ಅವರಿಗೂ ದಲಿತರಿಗೆ ನೀಡಲಾಗುತ್ತಿರುವ ಸೌಲಭ್ಯಗಳನ್ನೆಲ್ಲ ನೀಡಲಾಗುತ್ತಿದೆ. ಹಿಂದುಳಿದ ಹೈದರಾಬಾದ್ ಕರ್ನಾಟಕ ಪ್ರದೇಶದವರಿಗೆ ಪ್ರತ್ಯೇಕ ಮೀಸಲಾತಿ ನೀಡಲಾಗಿದೆ. ರೈತರಿಗೆ ಹಲವು ರೀತಿಯ ಸಬ್ಸಿಡಿ ಯೋಜನೆಗಳು ಜಾರಿಯಲ್ಲಿವೆ. ಸಂಕಷ್ಟದ ಸಂದರ್ಭದಲ್ಲಿ ಸಾಲ ಮನ್ನಾ ಮಾಡಲಾಗಿದೆ. ಮಠಗಳಿಗೆ, ದೇಗುಲಗಳ ಅಭಿವೃದ್ಧಿಗೆ ಕೋಟಿಗಟ್ಟಲೆ ಅನುದಾನ ನೀಡಲಾಗಿದೆ.

ಬಡತನ ರೇಖೆಗಿಂತ ಕೆಳಗಿರುವ ಎಲ್ಲಾ ವರ್ಗದವರ ಅಭಿವೃದ್ಧಿಗಾಗಿ, ಜಾತಿಯ ಗತ್ಯಂತರವಿಲ್ಲದೆ ರಾಜ್ಯ ಹಾಗೂ ಕೇಂದ್ರ ಸರ್ಕಾರಗಳ ಹತ್ತು ಹಲವು ಸಹಾಯಾನುದಾನ ಯೋಜನೆಗಳನ್ನು ಜಾರಿಗೆ ತರಲಾಗಿದೆ. ವಿಧವೆಯರಿಗೆ, ಕಲಾವಿದರಿಗೆ, ಲೈಂಗಿಕ ಅಲ್ಪಸಂಖ್ಯಾತರಿಗೆ, ವಿಚ್ಛೇದಿತರಿಗೆ, ಪರಿತ್ಯಕ್ತ ಮಹಿಳೆಯರಿಗೆ... ಹೀಗೆ ಹಲವು ವರ್ಗಗಳಿಗೆ ಮಾಸಾಶನ ನೀಡಲಾಗುತ್ತಿದೆ.

ಸಣ್ಣ ಕೈಗಾರಿಕೆ, ಬೃಹತ್ ಕೈಗಾರಿಕೆ, ಸಿನಿಮಾ, ವ್ಯಾಪಾರ, ಸಾರಿಗೆ ಸಂಪರ್ಕ, ಮೀನುಗಾರಿಕೆ, ಪ್ರವಾಸೋದ್ಯಮ, ಮಾಹಿತಿ ತಂತ್ರಜ್ಞಾನದಂತಹ ವಿವಿಧ ಕ್ಷೇತ್ರಗಳವರೂ ಒಂದಲ್ಲ ಒಂದು ರೀತಿಯಲ್ಲಿ ಸರ್ಕಾರದ ಯೋಜನೆಗಳ ಫಲಾನುಭವಿಗಳೇ  ಆಗಿದ್ದರೂ ದಲಿತರು ಮಾತ್ರ ಸಕಲ ‘ಭಾಗ್ಯ’ಗಳ ಒಡೆಯರು ಎಂಬಂತೆ ಬಿಂಬಿಸಿರುವುದು ದುರದೃಷ್ಟಕರ.

ಅನುಭವ, ದಕ್ಷತೆಯನ್ನೇ ಆಧರಿಸಿ ಹೇಳುವುದಾದರೆ, ಬಹುಶಃ ದಲಿತ ನಾಯಕರು ಎಂದೋ ಈ ರಾಜ್ಯದ ಮುಖ್ಯಮಂತ್ರಿ ಮತ್ತು ದೇಶದ ಪ್ರಧಾನಿ ಆಗಬಹುದಿತ್ತು. ಆರ್ಥಿಕವಾಗಿ ಹಿಂದುಳಿದವರ ಬಗ್ಗೆ ಇರುವ ಕನಿಕರ ದಲಿತರ ವಿಷಯದಲ್ಲಿ ಕಾಣುವುದಿಲ್ಲ. ಇಂದಿಗೂ ದಲಿತರಿಗೆ ಹಳ್ಳಿಗಳಲ್ಲಿ ಕ್ಷೌರ ನಿರಾಕರಣೆ, ದೇಗುಲ ಪ್ರವೇಶ ನಿರಾಕರಿಸುವುದು, ಹೂಳಲು ಸ್ಮಶಾನವಿಲ್ಲದಿರುವುದು, ನಗರ ಪ್ರದೇಶಗಳಲ್ಲಿ ಒಂದು ಬಾಡಿಗೆ ಮನೆ ಗಿಟ್ಟಿಸಲು ಅವರು ಅನುಭವಿಸಬೇಕಾದ ಯಾತನೆಗಳ ಅರಿವಿದ್ದೂ ಕೆಲವರು ಜಾಣ ಕುರುಡರಂತೆ ವರ್ತಿಸುತ್ತಿರುವುದು ವಿಷಾದನೀಯ.

ಬಡವರಾದರೂ ಮೇಲ್ವರ್ಗದವರು ದೇವಸ್ಥಾನವನ್ನು ಪ್ರವೇಶಿಸಬಹುದು. ಆದರೆ, ಮಹತ್ವದ ಸ್ಥಾನವನ್ನು ಅಲಂಕರಿಸಿದ್ದರೂ ದಲಿತರೆಂಬ ಒಂದೇ ಕಾರಣಕ್ಕೆ ದೇಗುಲದ ಹೊರಗೆ ನಿಲ್ಲಬೇಕಾದ ಪರಿಸ್ಥಿತಿ ಇನ್ನೂ ಕೆಲವೆಡೆ ಇದೆ.

ಇನ್ನು ಬಡ್ತಿ ಮೀಸಲಾತಿಯ ಬಗ್ಗೆ ಹೇಳುವುದಾದರೆ, ಕರ್ತವ್ಯ ನಿರತರಾಗಿದ್ದ ಒಟ್ಟು ನೌಕರ ವೃಂದದಲ್ಲಿ ದಲಿತರ ಪ್ರಾತಿನಿಧ್ಯದ ಕೊರತೆಯನ್ನು ಸರಿದೂಗಿಸುವ ಸಲುವಾಗಿ ಅದನ್ನು ಜಾರಿಗೆ ತರಲಾಯಿತೇ ಹೊರತು ಯಾವುದೇ ದುರುದ್ದೇಶದಿಂದಲ್ಲ. ನಿಜವಾಗಿ ಹೇಳಬೇಕೆಂದರೆ, ದಲಿತರಿಗೆ ನ್ಯಾಯಯುತವಾಗಿ ಸಿಗಬೇಕಾದ ಪ್ರಾತಿನಿಧ್ಯ ದೊರಕದೆ ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳಲ್ಲಿ ಸಾವಿರಾರು ಬ್ಯಾಕ್‌ಲಾಗ್ ಹುದ್ದೆಗಳು ಖಾಲಿ ಉಳಿದಿವೆ.