ಕೃಷಿ ಮಾಹಿತಿಯ ಕಣಜ ಈ ಎಂಜಿನಿಯರ್‌

 

ಈ ಯುವಕನ ಹೆಸರು ಬಸನಗೌಡ ವೆಂಕನಗೌಡ ಪೊಲೀಸ್‌ಪಾಟೀಲ. ಬಿ.ಇ ಮೆಕ್ಯಾನಿಕಲ್‌ನಲ್ಲಿ ರ್‍ಯಾಂಕ್‌ ವಿಜೇತ. ಒಳ್ಳೊಳ್ಳೆ ಕಂಪೆನಿಯಲ್ಲಿ ನೌಕರಿ ಪಡೆದುಕೊಳ್ಳುವ ಅವಕಾಶವೂ ಒದಗಿಬಂದಿತ್ತು. ಆದರೆ ‘ಅಂಥ ನೌಕರಿಗಳು ಗುಲಾಮಗಿರಿ ಇದ್ದಂತೆ’ ಎನ್ನುತ್ತಲೇ ಕೃಷಿಯಲ್ಲಿ ಖುಷಿ ಕಂಡುಕೊಂಡಿದ್ದಾರೆ.

ಒಳ್ಳೊಳ್ಳೆ ಉದ್ಯೋಗ ತೊರೆದು ಕೃಷಿ ಮಾಡುವವರ ಸಂಖ್ಯೆ ಇಂದು ಹೆಚ್ಚುತ್ತಲೇ ಇದೆ. ಅವರ ಪೈಕಿ ಬಸನಗೌಡ ಅವರೂ ಒಬ್ಬರು ನಿಜ. ಆದರೆ ಇವರ ಕೆಲಸ ಅಷ್ಟಕ್ಕೇ ನಿಂತಿಲ್ಲ. ಕೃಷಿ ಕ್ಷೇತ್ರದ ಮಹತ್ವದ ವಿಷಯಗಳು ಇವರ ಬಳಿ ಲಭ್ಯ ಇವೆ. ಸುಮಾರು 180 ಕೃಷಿ ಪಂಡಿತರ ಅಲ್ಬಮ್ ಇವರ ಬಳಿ ಇದೆ. ರಾಜ್ಯದಲ್ಲಿರುವ ಮತ್ತು ಪಕ್ಕದ ರಾಜ್ಯಗಳಲ್ಲಿರುವ ಯಶಸ್ವಿ ಕೃಷಿಕರ ಸಂಪೂರ್ಣ ಮಾಹಿತಿ, ಅವರು ಯಾವ ಬೆಳೆಗಳಲ್ಲಿ ಪರಿಣತರು, ಪ್ರತಿ ಎಕರೆಗೆ ಎಷ್ಟು ಫಸಲು ತೆಗೆಯುತ್ತಾರೆ, ಯಾವ ಸಮಯದಲ್ಲಿ ಬಿತ್ತನೆ ಮಾಡುತ್ತಾರೆ, ಯಾವ ಗೊಬ್ಬರ ಬಳಸುತ್ತಾರೆ ಎಂಬಿತ್ಯಾದಿ ಸಮಗ್ರ ಮಾಹಿತಿಯನ್ನು ಕಲೆ ಹಾಕಿರುವ ಇವರು, ಯಶಸ್ವಿ ಕೃಷಿಕರ ಸಂಪೂರ್ಣ ವಿಳಾಸದ ಜೊತೆ ಅಂಥ ಕೃಷಿಕರ ಸಾಧನೆಗಳನ್ನೂ ಸಂಗ್ರಹಿಸಿದ್ದಾರೆ.  ಬೇರೆ ಬೇರೆ ಕೃಷಿ ಆಧಾರಿತ ಮೂರು ಸಾವಿರಕ್ಕೂ ಹೆಚ್ಚು ಪುಸ್ತಕಗಳ ಸಂಗ್ರಹ ಇವರ ಬಳಿ ಇದೆ. ಕೃಷಿಯಲ್ಲಿ ಹೊಸ ತಂತ್ರಜ್ಞಾನ, ನಾಟಿಪದ್ಧತಿಗಳು, ನೀರು ಪೋಲಾಗದಂತೆ ಬೆಳೆ ಬೆಳೆಯುವ ವಿಧಾನಗಳು, ಸರ್ಕಾರದಿಂದ ಕೃಷಿಗೆ ಲಭಿಸುವ ಸೌಲಭ್ಯಗಳ ಮಾಹಿತಿಗಳೂ ಇವರಲ್ಲಿ ಲಭ್ಯ. ‘ಕೃಷಿ ಕ್ಷೇತ್ರದ ಸಂಪೂರ್ಣ ವಿವರಣೆ ಒಂದೆಡೆ ಇರಬೇಕೆನ್ನುವ ಉದ್ದೇಶ ನನ್ನದು’ ಎನ್ನುತ್ತಾರೆ ಬಸನಗೌಡ.