ಪೂಜಾ ‘ಸಿಹಿ ಅಂಗಡಿ’

ಹೆಚ್ಚು ಇಂಗ್ಲಿಷ್‌ ಬೆರೆತ ವಿಶಿಷ್ಟಗನ್ನಡದ ತಮ್ಮ ಎಂದಿನ ಶೈಲಿಯಲ್ಲಿ ಮಾತಿಗಿಳಿದ ನಟಿ–ನಿರ್ಮಾಪಕಿ ಪೂಜಾ ಗಾಂಧಿ ದನಿಯಲ್ಲಿ ‘ಸಿಹಿತನ’ ತುಸು ಹೆಚ್ಚಾಗಿತ್ತು. ‘ಜಿಲೇಬಿ’ಯ ಪದರಗಳ ಸೊಗಸನ್ನು ವರ್ಣಿಸುವುದೆಂದರೆ ಅವರಿಗೆ ಬಲು ಖುಷಿ. ‘ಜಿಲೇಬಿ’ ಎಂದರೆ ಗಾಢ ಸಿಹಿ ಇರಲೇಬೇಕಲ್ಲ? ಸುರುಳಿಯಾಕಾರದ ಜಿಲೇಬಿ ಬಾಯಲ್ಲಿ ನೀರೂರಿಸುತ್ತದೆ. ಅದರ ತುಣುಕನ್ನು ಬಾಯಿಗಿರಿಸಿದರೆ ಸಣ್ಣನೆ ಜಿನುಗುವ ಸಕ್ಕರೆ ಪಾಕದ ರಸ ನಾಲಿಗೆ ಸ್ಪರ್ಶಿಸಿದಾಗ ಆಹಾ! ಎನಿಸುವಷ್ಟು ರುಚಿ. ಅದರ ಸಿಹಿಯಲ್ಲಿ ಅಂಟಿಕೊಳ್ಳುವ ಗುಣವಿದೆ. ಕೊನೆಯಲ್ಲಿ ಬೆರಳನ್ನು ನಾಲಿಗೆ ಮೇಲೆ ಹೊರಳಿಸುವ ತುಂಟತನಕ್ಕೆ ಸಾಟಿಯಿಲ್ಲ. ಬಿಸಿಬಿಸಿಯಿದ್ದಾಗ ಗರಿಗರಿಯೂ ಆಗಿರುತ್ತದೆ. ತಿಂದು ಅರ್ಧಗಂಟೆಯ ಬಳಿಕವೂ ಅದರ ಘಮಲು ಮತ್ತು ಸಿಹಿ ಉಳಿದಿರುತ್ತದೆ. ಜಿಲೇಬಿ ತಿನಿಸಿನ ರಸಾಸ್ವಾದ ತಮ್ಮ ಸಿನಿಮಾದಲ್ಲಿಯೂ ಇದೆ ಎಂಬ ವರ್ಣನೆ ಅವರದು.