ಸಮುದಾಯ ಸಾಮರಸ್ಯ ಕುಸಿದರೆ ಉಳಿಗಾಲವಿಲ್ಲ
ದೇಶದ ಭವಿಷ್ಯ ಮಕ್ಕಳ ಹಾಗೂ ಯುವಕರ ಮೇಲೆ ನಿಂತಿದೆ. ಅವರಲ್ಲಿ ದೇಶ, ಭಾಷೆ, ಸಂಸ್ಕೃತಿ ಬಗ್ಗೆ ಬದ್ಧತೆ ಬೆಳೆಸಬೇಕು. ಮಕ್ಕಳ ಮನಸ್ಸಿಗೆ ಸಾಂಸ್ಕೃತಿಕ ಬದ್ಧತೆ ತುಂಬಿದಾಗ ಮಾತ್ರ ಸಮಾಜ, ಸಮುದಾಯಗಳಲ್ಲಿ ಉಂಟಾಗುತ್ತಿರುವ ಕಂದಕ, ಒಡಕು ಸ್ವಲ್ಪಮಟ್ಟಿಗೆ ತಡೆಗಟ್ಟಬಹುದು’ ಎಂದು ಮಾರ್ಮಿಕವಾಗಿ ಹೇಳಿದರು.
ಸನ್ಮಾನಕ್ಕಾಗಿ ಕಾದು ಸುಸ್ತಾದ ಕಲಾವಿದೆ...
ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಕಲಾವಿದೆ ಪಾರ್ವತಮ್ಮ ಇಡೀ ಸಮ್ಮೇಳನದುದ್ದಕ್ಕೂ ಕಾದರೂ ಒಬ್ಬರೂ ಮಾತನಾಡಿಸಲಿಲ್ಲ. ಹಿರಿಯ ಸಾಹಿತಿ ಗೋರುಚ ಸಮ್ಮೇಳನ ಉದ್ಘಾಟನೆ ಮಾಡಿದ ಮೇಲೆ ಉದ್ಘಾಟನೆಯ ಭಾಷಣಕ್ಕೂ ಅವಕಾಶ ಕೊಡದೇ ಗಂಟಗಟ್ಟಲೇ ಸನ್ಮಾನ ಸಮಾರಂಭ ನಡೆಯಿತು.
ರೈತನಿಕ್ಕದಿರೆ ಬಿಕ್ಕುವುದು ಜಗವೆಲ್ಲಾ...
ಶಾಂತವೀರಸ್ವಾಮೀಜಿ ಪ್ರಧಾನ ವೇದಿಕೆ( ಗುರುಮಠಕಲ್): ‘ಜಿಲ್ಲೆಯಲ್ಲಿ ಭೀಮಾ ನದಿ ಹರಿಯುತ್ತಿದ್ದರೂ ಇಲ್ಲಿನ ಕೃಷಿಕರಿಗೆ ಸಮಗ್ರ ನೀರಾವರಿ ಕನಸಾಗಿದೆ. ಕೂಡಲೇ ಸರ್ಕಾರ ಜಿಲ್ಲೆಗೆ ಸಮಗ್ರ ನೀರಾವರಿ ಯೋಜನೆ ಜಾರಿಗೊಳಿಸಿ ಕೃಷಿಕರ ಬದುಕನ್ನು ಸುಸ್ಥಿರ ಮತ್ತು ಸದೃಢಗೊಳಿಸ ಬೇಕು’ ಎಂದು ಯಾದಗಿರಿ ತಾಲ್ಲೂಕು ಮೂರನೇ ಕನ್ನಡ ಸಾಹಿತ್ಯ ಸಮ್ಮೇಳನದ ಸರ್ವಾಧ್ಯಕ್ಷ ಜ್ಞಾನೇಶ್ವರ ಸಂದೇನಕರ ಒತ್ತಾಯಿಸಿದರು.
ಸಮ್ಮೇಳನದ ಸರ್ವಾಧ್ಯಕ್ಷರ ಆಶಯ ನುಡಿ ಆಡಿದ ಅವರು,‘ಯಾದಗಿರಿ ಜಿಲ್ಲೆಯಲ್ಲಿರುವ ಎಲ್ಲಾ ಕೆರೆಗಳಿಗೆ ನೀರು ಹರಿಸಿ ದುಡಿಯುವ ಕೈಗಳಿಗೆ ಉದ್ಯೋಗ ಕಲ್ಪಿಸಬೇಕು’ ಎಂದರು.
‘ರೈತರ ಕಡೆಗಣನೆಯಿಂದಾಗಿ ರೈತ ಆತ್ಮಹತ್ಯೆಗಳು ಹೆಚ್ಚುತ್ತಿವೆ. ರೈತನಿಕ್ಕಿದಕೆ ಉಕ್ಕುವುದು ಜಗವೆಲ್ಲಾ; ರೈತನಿಕ್ಕದಿರೆ ಬಿಕ್ಕುವುದು ಜಗವೆಲ್ಲಾ... ಎಂಬ ಸರ್ವಜ್ಞನ ನುಡಿಯಂತೆ ರೈತರ ಹಿತಕಾಪಾಡದಿದ್ದರೆ ಮುಂದಿನ ದಿನಗಳಲ್ಲಿ ನಾವು ಬಿಕ್ಕದೇ ಬದುಕಿಲ್ಲ’ ಎಂದು ವಿಷಾದಿಸಿದರು.
‘ಯಾದಗಿರಿ ತಾಲ್ಲೂಕಿನಲ್ಲಿ 140ಕ್ಕೂ ಹೆಚ್ಚು ಕೆರೆಗಳಿವೆ. ಆದರೆ ಮಳೆಯ ಸರಾಸರಿ ಪ್ರಮಾಣ ಕಡಿಮೆ ಇರುವುದ ರಿಂದ ಕೆರೆ ಅವಲಂಬಿತ ನೀರಾವರಿ ಕುಂಠಿತಗೊಂಡಿದೆ. ಸಣ್ಣ ಹಿಡುವಳಿದಾ ರರು ಪರದಾಡುವಂತಾ ಗಿದೆ. ಕೆಲವು ಜಲಾಶಯ, ಬ್ಯಾರೇಜುಗಳು ನಿರ್ಮಾಣ ಗೊಂಡಿವೆಯಾದರೂ ಕೆಲಭಾಗಕ್ಕೆ ಮಾತ್ರ ಉಪಯೋಗ ವಾಗುತ್ತಿವೆ. ಇದರಿಂದ ರೈತರಿಗೆ ತೃಪ್ತಿ ಇಲ್ಲ’ ಎಂದರು.
‘ಸರ್ಕಾರ ಮತ್ತು ಸ್ಥಳೀಯ ಜನಪ್ರತಿನಿಧಿಗಳು ರೈತರ ಮಹತ್ವವನ್ನು ಎತ್ತಿಹಿಡಿಯಬೇಕು. ಈ ಭಾಗದಲ್ಲಿ ಜವಳಿ ಪಾರ್ಕ್, ರೈಲುಬೋಗಿ ನಿರ್ಮಾಣ ಕಾರ್ಖಾನೆ, ಬಸ್‌ ತಯಾರಿಕಾ ಘಟಕ ಸ್ಥಾಪನೆಯಾಗಿವೆಯಾದರೂ ಸ್ಥಳೀಯ ಯುವ ಪೀಳಿಗೆಗೆ ಹೆಚ್ಚಿನ ಉದ್ಯೋಗ ನೀಡುವ ಬೃಹತ್‌ ಮಧ್ಯಮ ಕೈಗಾರಿಕೆಗಳನ್ನು ಈ ಭಾಗದಲ್ಲಿ ಸರ್ಕಾರ ಸ್ಥಾಪಿಸಬೇಕು ಎಂದು ಒತ್ತಾಯಿಸಿದರು.
ಮಠಗಳು ಜನಸೇವೆ ನೀಡುವ ಗದ್ದುಗೆಗಳಾಗಲಿ: ಗೊರುಚ
ಯಾದಗಿರಿ: ರಾಜ್ಯದಲ್ಲಿರುವ ಮಠಗಳು ಪೂಜೆ, ಪುನಸ್ಕಾರಗಳ ಗದ್ದುಗೆಗಳಾಗದೇ ಜನಸೇವೆ ಮಾಡುವ ಗದ್ದುಗೆಯಾಗಬೇಕು ಎಂದು ಹಿರಿಯ ಜಾನಪದ ವಿದ್ವಾಂಸ ಗೊ.ರು.ಚನ್ನಬಸಪ್ಪ ಹೇಳಿದರು.
ಸಮೀಪದ ಗುರುಮಠಕಲ್‌ನ ಖಾಸಾಮಠದಲ್ಲಿ ಬುಧವಾರ ಮೂರನೇ ತಾಲ್ಲೂಕು ಕನ್ನಡ ಸಾಹಿತ್ಯ ಸಮ್ಮೇಳನ ಉದ್ಘಾಟಿಸಿ ಅವರು ಮಾತನಾಡಿದರು. ಸಮಾಜದಲ್ಲಿ ನೈತಿಕತೆ ಕುಸಿಯುತ್ತಿದೆ. ಜಾತಿ, ಪಂಥ, ಧರ್ಮಗಳ ಕರಿನೆರಳಿನಲ್ಲಿ ಜಾತ್ಯತೀತ ಮನೋಧರ್ಮ ಛಿದ್ರಗೊಂಡಿದೆ. ಇದರಿಂದಾಗಿ ಅಖಂಡ ಭಾರತದ ಕನಸು ಹಗಲುಗನಸಿನಂತಾಗಿದೆ. ಜಾತ್ಯತೀತ ಕೈಂಕರ್ಯ ಕಣ್ಮರೆಯಾಗಿದೆ. ಮುಗ್ಧ ಮಕ್ಕಳ ಮನೋಭೂಮಿಕೆ ಮೇಲೆ ಜಾತಿಬೀಜಗಳನ್ನು ಬಿತ್ತಲಾಗುತ್ತಿದೆ.
ಇದರಿಂದ ಮುಗ್ಧ ಮಕ್ಕಳಲ್ಲೂ ಜಾತಿ ವೈಷಮ್ಯ ಬೆಳೆಯುತ್ತಿದೆ. ಜಾತಿವರ್ಗಗಳನ್ನು ಮೀರಿ ರಾಜ್ಯದಲ್ಲಿನ ಮಠಗಳು ಜನಾನುರಾಗಿಯಾಗಿ ಸಮುದಾಯ ಸಾಮರಸ್ಯ ಬೆಳೆಸಬೇಕಿದೆ ಎಂದು ಅವರು ಸಲಹೆ ನೀಡಿದರು.
ಅಧಿಕಾರ ಎಂಬುದು ಒಂದು ಅವಕಾಶ. ಅಧಿಕಾರ ಸಿಕ್ಕಾಗ ಅದನ್ನು ಸಮಾಜದ ಒಳಿತಿಗೆ ಬಳಸಿದರೆ ಜನ ಎಂದೂ ನಿಮ್ಮನ್ನು ಮರೆಯುವುದಿಲ್ಲ. ಜನ ಮರೆತರೂ ಸೇವಾಕೈಂಕರ್ಯ ಮಾಡಿದ ಆತ್ಮತೃಪ್ತಿ ಸದಾ ಇರುತ್ತದೆ ಎಂದು ಅವರು ಪರೋಕ್ಷವಾಗಿ ಗಡಿ ಅಭಿವೃದ್ಧಿ ಪ್ರಾಧಿಕಾರ ಬಾಬುರಾವ್ ಚಿಂಚಿನಸೂರ್ ಅವರಿಗೆ ಸಲಹೆ ನೀಡಿದರು.
ಸಮ್ಮೇಳನಾಧ್ಯಕ್ಷರ ಬೇಡಿಕೆಗಳು
- ಪ್ರಾಥಮಿಕ ಶಿಕ್ಷಣ ಕನ್ನಡದಲ್ಲಿಯೇ ನಡೆಯಬೇಕು
- ಗಡಿ ಭಾಗದ ಕನ್ನಡ ಶಾಲೆಗಳಿಗೆ ಪೂರ್ಣ ಶಿಕ್ಷಕ ವರ್ಗ, ಪಾಠೋಪಕರಣ, ಪೀಠೋಪಕರಣ, ಸುಸಜ್ಜಿತ ಕಟ್ಟಡಕ್ಕೆ ಅನುದಾನ ನೀಡಬೇಕು.
- ಜಿಲ್ಲಾ ಕೇಂದ್ರದಲ್ಲಿ ರಂಗಮಂದಿರ ನಿರ್ಮಿಸಬೇಕು.
- ಕನ್ನಡ ಮಾಧ್ಯಮ ವಿದ್ಯಾರ್ಥಿಗಳಿಗೆ ಉದ್ಯೋಗದಲ್ಲಿ ಪ್ರಥಮ ಆದ್ಯತೆ ನೀಡಬೇಕು.
- ಸ್ಥಳೀಯ ಗ್ರಂಥಾಲಯಗಳಿಗೆ ಸ್ಥಳೀಯ ಸಾಹಿತಿಗಳ ಹೆಚ್ಚೆಚ್ಚು ಪುಸ್ತಕಗಳನ್ನು ಖರೀದಿಸಬೇಕು.
- ಗಡಿಭಾಗದಲ್ಲಿ ಕನ್ನಡ ಭಾಷಾ ಬಾಂಧವ್ಯ ಮೂಡಿಸುವ ಕನ್ನಡಪರ ಕಾರ್ಯಕ್ರಮಗಳನ್ನು ಹೆಚ್ಚೆಚ್ಚು ಆಯೋಜಿಸಬೇಕು.
- ಎಲ್ಲಾ ನಾಮಫಲಕಗಳನ್ನು ಕನ್ನಡದಲ್ಲಿಯೇ ಬರೆಯಿಸಲು ಜಾಗೃತಿ ಮೂಡಿಸಬೇಕು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.