‘‘ಚುಂಬನದ ದೃಶ್ಯಗಳಲ್ಲಿ ನಟನೆಗೆ ಧೈರ್ಯ ಬೇಕು...

‘ತೆರೆಯ ಮೇಲೆ ಚುಂಬನದ ದೃಶ್ಯಗಳಲ್ಲಿ ಅಭಿನಯಿಸಲು ಧೈರ್ಯ–ಆತ್ಮವಿಶ್ವಾಸ ಎರಡೂ ಬೇಕು. ಅದು ನನ್ನಲ್ಲಿ ಇರಲಿಲ್ಲ. ಈಗಲೂ ಇಲ್ಲ. ಹಾಗಾಗಿ ಅದನ್ನು ಪ್ರಯತ್ನಿಸಲೂ ನಾನು ತಯಾರಿಲ್ಲ’. ಯುವನಟಿ ಅಪೂರ್ವ ಭಾರದ್ವಾಜ್‌ ಅವರ ಸ್ಪಷ್ಟ ನುಡಿಗಳಿವು.

ಹುಡುಕಿಕೊಂಡು ಬಂದ ಕೆಲವು ಅವಕಾಶಗಳನ್ನು ಒಲ್ಲೆ ಎಂದದ್ದೇಕೆ ಎನ್ನುವ ಪ್ರಶ್ನೆಗೆ ಉತ್ತರಿಸಿದ ಅಪೂರ್ವ – ‘ತೀರಾ ಬೋಲ್ಡ್‌ ಆಗಿ ನಟಿಸಬಲ್ಲೆ ಎಂಬ ಧೈರ್ಯ ನನಗಿಲ್ಲ. ಮೊದಲು ಬಂದ ಸಿನಿಮಾ ಪಾತ್ರಗಳು ಬೋಲ್ಡ್ ಆಗಿದ್ದವು. ಅದಕ್ಕಾಗಿ ಹಿಂಜರಿದೆ’ ಎಂದರು. ಇಂಥ ಬೋಲ್ಡ್‌ ಅಲ್ಲದ, ಆದರೆ ಮಹತ್ವಾಕಾಂಕ್ಷಿಯಾದ ನಟಿಗೆ ವರದಾನದಂತೆ ಒಲಿದ ಪಾತ್ರ ‘ಉಪ್ಪಿನ ಕಾಗದ’ದ್ದು.

‘ಈ ಮಾತನ್ನು ನಾನು ಸ್ವಲ್ಪ ಜಂಬದಿಂದ ಹೇಳುತ್ತಿದ್ದೇನೆ ಎಂದುಕೊಂಡರೂ ಪರವಾಗಿಲ್ಲ. ನಾಗಾಭರಣ ಸರ್ ಮತ್ತು ಮಂಡ್ಯ ರಮೇಶ್ ಅವರಿಗೆ ಇಂಥದ್ದೊಂದು ಗಟ್ಟಿ ಪಾತ್ರ ಸಿಗಲು ಇಷ್ಟು ವರ್ಷ ಕಾಯಬೇಕಾಯಿತು. ಆದರೆ ನನಗೆ ಮೊದಲ ಸಿನಿಮಾದಲ್ಲೇ ಇಷ್ಟು ಒಳ್ಳೆಯ ಪಾತ್ರ ಸಿಕ್ಕಿದೆ’ ಎಂದರು ಅಪೂರ್ವ.

‘ಭರಣ ಸರ್ ಜೊತೆ ತೆರೆ ಹಂಚಿಕೊಳ್ಳುತ್ತೇನೆ ಎಂದರೆ ಅವರಷ್ಟೇ ಸ್ಕ್ರೀನ್ ಸ್ಪೇಸ್ ನನಗೂ ಇರುತ್ತದೆ. ಈವರೆಗೆ ಧಾರಾವಾಹಿಗಳಲ್ಲಿ ಜೋರು ಕಂಠದ ಪಾತ್ರಗಳಲ್ಲೇ ನಟಿಸಿದ್ದೇನೆ. ಅಲ್ಲಿ ಪಾತ್ರದ ವೈಭವೀಕರಣ ಇರುತ್ತದೆ. ಆದರೆ ಈ ಚಿತ್ರದಲ್ಲಿ ಹಾಗಲ್ಲ.

ನನ್ನ ವಯಸ್ಸಿಗೆ ಎಷ್ಟು ಪ್ರಬುದ್ಧತೆ ಇರಬೇಕೋ ಅಷ್ಟು ಮೆಚ್ಯೂರ್, ಸಟಲ್ ಪಾತ್ರ. ಚೀರಾಟದ ಸಂಭಾಷಣೆಗಳ ಹೊರತಾಗ್ಯೂ ನಾನು ಸಂವಹಿಸಬಲ್ಲೆ ಎಂಬ ಧೈರ್ಯ ಕೊಟ್ಟ ಪಾತ್ರ ಇದು. ನನಗೆ ಇದೊಂದು ಧ್ಯಾನದ ರೀತಿಯಲ್ಲಿ ಪರಿಣಮಿಸಿದೆ’ ಎಂದು ತಾವಾಡಿದ ಮಾತನ್ನು ಅವರು ಸಮರ್ಥಿಸಿಕೊಂಡರು.

ಮಣಿಪಾಲ ವಿಶ್ವವಿದ್ಯಾಲಯದಿಂದ ಸಮೂಹ ಸಂವಹನದಲ್ಲಿ ಸ್ನಾತಕೋತ್ತರ ಪದವಿ ಪೂರೈಸುತ್ತಿದ್ದಂತೆ ಅಪೂರ್ವ ‘ಬಿಗ್‌ ಬಾಸ್’ ಎರಡನೇ ಆವೃತ್ತಿಯ ಟಾಸ್ಕ್ ಪ್ರೊಡ್ಯೂಸರ್ ಆಗಿ ವೃತ್ತಿಜೀವನ ಆರಂಭಿಸಿದರು. ಅಲ್ಲಿ ‘ಬಿಗ್ ಬಾಸ್’ ಸ್ಪರ್ಧಿಗಳಿಗೆ ಆಟಗಳನ್ನು ವಿನ್ಯಾಸ ಮಾಡುವುದು ಅವರ ಕೆಲಸ. ನಂತರ ‘ಸೂಪರ್ ಮಿನಿಟ್’ ಷೋನಲ್ಲಿ ಅನುಭವ ಪಡೆದರು. ‘ಬಿಗ್ ಬಾಸ್’ ಸಂದರ್ಭದಲ್ಲಿ ಅಪೂರ್ವ ಅವರ ಪ್ರತಿಭೆಯನ್ನು ಗುರ್ತಿಸಿ, ಧಾರಾವಾಹಿಗೆ ಆಡಿಷನ್ ಕೊಡುವಂತೆ ಹೇಳಲಾಯಿತು.

ಮೊದಲ ಆಡಿಷನ್‌ನಲ್ಲಿಯೇ ‘ಅನುರೂಪ’ ಧಾರಾವಾಹಿಗೆ ಆಯ್ಕೆಯೂ ಆದರು. ಅದುವರೆಗೆ ತೆರೆಯ ಹಿಂದೆ ತಂತ್ರಜ್ಞೆಯಾಗಿ ಷೋಗಳಿಗೆ ದುಡಿಯುತ್ತಿದ್ದ ಅಪೂರ್ವ ತೆರೆಯ ಮೇಲೆ ಕಾಣಿಸಿಕೊಳ್ಳಲು ಅಣಿಯಾದರು. ಅಂದಹಾಗೆ, ಅಪೂರ್ವ ಬೆಂಗಳೂರಿನವರು, ಅಪ್ಪಟ ಕನ್ನಡತಿ.

ಅಪೂರ್ವ ಅವರ ನಟನೆಯ ಬಯಕೆ ಅವರ ತಂದೆಗೇನೂ ಖುಷಿ ಕೊಟ್ಟ ಸಂಗತಿಯಾಗಿರಲಿಲ್ಲ. ಆದರೆ ‘ಅನುರೂಪ’ ತಂಡ ನೋಡಿದ ನಂತರ ಅವರೇ ಸ್ವತಃ ನಟನೆಗೆ ಪ್ರೋತ್ಸಾಹ ನೀಡಿದ್ದಾರೆ. ಧಾರಾವಾಹಿಗಳಿಂದ ಸಿನಿಮಾಗಳತ್ತ ಮಗಳ ಗಮನ ಹರಿಯಲಿ ಎಂಬುದು ತಂದೆಯ ಆಶಯ.

ಧಾರಾವಾಹಿಗಳಲ್ಲಿ ನಟಿಸುತ್ತಲೇ ಸಿನಿಮಾ ಅವಕಾಶಗಳಿಗಾಗಿಯೂ ಹುಡುಕಾಡುತ್ತಿದ್ದ ಅಪೂರ್ವ, ಕಥೆಯ ಕಾರಣಕ್ಕೆ ಆರಂಭದಲ್ಲೇ ಎರಡು ಅವಕಾಶಗಳನ್ನು ಒಲ್ಲೆ ಎಂದ ಗಟ್ಟಿಗಿತ್ತಿ. ತಾನಾಗಿಯೇ ಮತ್ತೆ ಸಿನಿಮಾದತ್ತ ಹೊರಳಬಾರದು ಎಂದೂ ನಿರ್ಧರಿಸಿದ್ದರು. ಅಷ್ಟರಲ್ಲಾಗಲೇ ಸ್ನೇಹಿತರು ತಯಾರಿಸಿದ ‘ತುಂತುರು’ ಎಂಬ ವಿಡಿಯೊ ಹಾಡೊಂದರಲ್ಲಿ ನಟಿಸಿದ್ದರು. ಅದನ್ನು ನೋಡಿದ ಬಿ. ಸುರೇಶ್ ತಮ್ಮ ‘ಉಪ್ಪಿನ ಕಾಗದ’ದ ಆಡಿಷನ್‌ಗೆ ಆಹ್ವಾನಿಸಿದರು.

ಆ ಚಿತ್ರದಲ್ಲಿ, ಚಿಕ್ಕ ವಯಸ್ಸಿನಲ್ಲೇ ತನ್ನನ್ನು ತಾಯಿಯ ಜೊತೆ ಬಿಟ್ಟು ಹೋದ ಅಪ್ಪನನ್ನು ಹುಡುಕಿ ಹೊರಡುವ ಮಗಳು ಅಪೂರ್ವ. ತಂದೆಯನ್ನು ಭೇಟಿಯಾದಾಗ ಅವರ ವ್ಯಕ್ತಿತ್ವ, ಮನಸ್ಥಿತಿಯ ಇನ್ನೊಂದು ಮಗ್ಗುಲನ್ನು ಅರ್ಥೈಸಿಕೊಳ್ಳುವ ಸಮಾಧಾನಿ ಪಾತ್ರ.

‘ನಾನು ಯಾವ ರೀತಿ ಸಂಭಾಷಣೆ ಹೇಳಿದರೂ ಸುರೇಶ್ ಸರ್‌ಗೆ ಸಮಾಧಾನ ಆಗುತ್ತಿರಲಿಲ್ಲ. ನಾನು ಬರೀ ಡೈಲಾಗ್ ಹೇಳುತ್ತಿದ್ದೆ. ಆಗ ಅವರು, ನೀನು ಸಂಭಾಷಣೆ ತಪ್ಪಿದರೂ ಪರವಾಗಿಲ್ಲ. ಮುಖದಲ್ಲಿ ಭಾವನೆ ಕಾಣಿಸಬೇಕು ಎನ್ನುತ್ತಿದ್ದರು’ ಎಂದು ಚಿತ್ರೀಕರಣದ ಅನುಭವ ನೆನಪಿಸಿಕೊಳ್ಳುತ್ತಾರೆ.