ಚಿಟ್ಟೆ ಜೂಲಿಯಾ ಹೋರಾಟದ ದಿನಗಳು...

ಕೆಲವು ಹೋರಾಟಗಾರರು ದಿನಗಟ್ಟಲೆ ಮರದ ಮೇಲೆಯೇ ಕುಳಿತದ್ದೂ ಇದೆ. ಜೂಲಿಯಾ 55 ಮೀಟರ್ ಎತ್ತರದ ಮರವನ್ನು ಏರಲು ಆಯ್ಕೆ ಮಾಡಿಕೊಂಡರು. 1500 ವರ್ಷಗಳಷ್ಟು ಹಳೆಯದಾದ ಆ ಮರವನ್ನು 1997ರ ಡಿಸೆಂಬರ್ 10ರಂದು ಏರಿದರು. ಹುಣ್ಣಿಮೆಯ ದಿನ ಅದನ್ನು ಏರಿದ್ದರಿಂದ, ಆ ಮರಕ್ಕೆ ‘ಲ್ಯೂನಾ’ ಎಂದು ಹೆಸರಿಟ್ಟರು.

ಮರ ಏರಿದಾಗ ಎಷ್ಟು ದಿನಗಳವರೆಗೆ ಹೋರಾಟ ನಡೆಯಬಹುದು ಎಂದು ಜೂಲಿಯಾಗೆ ಅಂದಾಜಿರಲಿಲ್ಲ. 42 ದಿನಗಳ ಕಾಲ ಮರದ ತುದಿಯಲ್ಲೇ ಬದುಕಬೇಕಾಯಿತು. ಎಲ್ಲ ಹೋರಾಟಗಾರರಿಗಿಂತ ಹೆಚ್ಚು ಅವಧಿ ಮರದ ಮೇಲೆ ಉಳಿದವರು ಜೂಲಿಯಾ. ‘ಅರ್ತ್ ಫಸ್ಟ್’ ಎಂಬ ಸ್ವಯಂ ಸೇವಾ ಸಂಸ್ಥೆಯಿಂದ ಎಲ್ಲ ಹೋರಾಟಗಾರರೂ ಮರಗಳನ್ನು ಏರಿದ್ದರು.

ಹೋರಾಟ ಅಷ್ಟಕ್ಕೇ ನಿಲ್ಲಲಿಲ್ಲ. ಮರದ ಮೇಲೆಯೇ ಸಣ್ಣ ಮನೆ ಮಾಡಿಕೊಳ್ಳಲು ಹೋರಾಟಗಾರರೆಲ್ಲ ಜೂಲಿಯಾಗೆ ಸಹಾಯ ಮಾಡಿದರು. ಚಳವಳಿಕಾರರ ಉತ್ಸಾಹ ಉಡುಗಿಸಲು ಕಂಪೆನಿಯವರು ಬೃಹತ್ ದೀಪದ ಬೆಳಕನ್ನು ಕಣ್ಣಿಗೆ ರಾಚುವಂತೆ ಬಿಟ್ಟರು. ಶಬ್ದ ಮಾಡುವ ವಾದ್ಯಗಳನ್ನು ಬಡಿದು ತೊಂದರೆ ಕೊಟ್ಟರು. ಹೆಲಿಕಾಪ್ಟರನ್ನು ಮರದ ಪಕ್ಕದಲ್ಲೇ ಹಾರಿಸಿ, ಅದರ ಗಾಳಿ ತಡೆಯಲಾಗದೆ ಜೂಲಿಯಾ ಇಳಿದುಹೋಗಲಿ ಎಂದು ಯತ್ನಿಸಿದರು. ಇವ್ಯಾವುದಕ್ಕೂ ಜೂಲಿಯಾ ಜಗ್ಗಲಿಲ್ಲ.

ಕ್ಯಾಲಿಫೋರ್ನಿಯಾ ಹಿಂದೆಂದೂ ಕಂಡರಿಯದ ಚಳಿಗಾಲದಲ್ಲಿಯೂ ಆ ಮರದ ಮೇಲೆ ವರ್ಷಗಟ್ಟಲೆ ಕಳೆದರು. 1999ರ ಡಿಸೆಂಬರ್ 18ರಂದು ಮರದಿಂದ ಅವರು ಕೆಳಗಿಳಿದದ್ದು. ‘ಲ್ಯೂನಾ’ ರಕ್ಷಿಸಲು ಕಂಪೆನಿಯವರು ಒಪ್ಪಿದ್ದೇ ಅಲ್ಲದೆ, ಆ ಮರದ ಸುತ್ತಮುತ್ತಲಿನ ಮೂರು ಎಕರೆ ಸ್ಥಳವನ್ನು ಸಂರಕ್ಷಿತ ಪ್ರದೇಶ ಎಂದು ಘೋಷಿಸಿದರು.

‘ದಿ ಲೆಗಸಿ ಆಫ್ ಲ್ಯೂನಾ’ ಎಂಬ ಕೃತಿಯನ್ನು ಜೂಲಿಯಾ ಬರೆದರು. ಕಾಡುನಾಶದ ವಿರುದ್ಧ ಹೋರಾಟ ಮುಂದುವರಿಸಿದ ಅವರು, ‘ಸರ್ಕಲ್ ಆಫ್ ಲೈಫ್’ ಎಂಬ ಸಂಸ್ಥೆ ಹುಟ್ಟುಹಾಕಿದರು. ಪ್ರಕೃತಿಗೆ ಹಾನಿ ಮಾಡದಂತೆ ಬದುಕುವುದು ಹೇಗೆ ಎನ್ನುವುದನ್ನು ಪ್ರಚಾರಪಡಿಸಿದ ಸಂಸ್ಥೆ ಅದು.