ಮೈಸೂರು: ಇಲ್ಲಿನ ಚಾಮರಾಜೇಂದ್ರ ಮೃಗಾಲಯದಲ್ಲಿ ಎರಡು ಗಂಡು ಕಾಡುನಾಯಿಗಳು ಮೃತಪಟ್ಟಿವೆ.
‘ಕಾಡುನಾಯಿಗಳ ಮರಣೋತ್ತರ ಪರೀಕ್ಷೆ ನಡೆಸಲಾಗಿದ್ದು, ವರದಿಗಾಗಿ ಕಾಯುತ್ತಿದ್ದೇವೆ’ ಎಂದು ಮೃಗಾಲಯದ ಕಾರ್ಯನಿರ್ವಾಹಕ ನಿರ್ದೇಶಕಿ ಕೆ.ಕಮಲಾ ತಿಳಿಸಿದ್ದಾರೆ.
ಈ ನಡುವೆ, ಮೃಗಾಲಯಕ್ಕೆ ಹೊಸ ಅತಿಥಿಗಳು ಸೇರ್ಪಡೆಯಾಗಿವೆ. ತೋಳ ಜಾತಿಯ ಸಸ್ತನಿಯೊಂದು ನಾಲ್ಕು ಮರಿ ಹಾಗೂ ಕೋತಿ (ಬಬೂನ್‌) ಒಂದು ಮರಿ ಹಾಕಿವೆ. ಕಾಡೆಮ್ಮೆ ಒಂದು ಕರುವಿಗೆ ಜನ್ಮ ನೀಡಿದೆ.
ಚಿಂಪಾಂಜಿಗೆ ಅನಾರೋಗ್ಯ: ಗಂಗಾ ಹೆಸರಿನ ಹೆಣ್ಣು ಚಿಂಪಾಂಜಿಯೊಂದು ಅಸ್ವಸ್ಥಗೊಂಡಿದೆ. 56 ವರ್ಷ 9 ತಿಂಗಳ ಈ ಚಿಂಪಾಂಜಿ ಕಳೆದ ಹತ್ತು ದಿನಗಳಿಂದ ಸರಿಯಾಗಿ ಆಹಾರ ಸೇವಿಸುತ್ತಿಲ್ಲ. ಚಿಕಿತ್ಸೆ ನೀಡಲಾಗುತ್ತಿದೆ ಎಂದು ಮೃಗಾಲಯದ ವೈದ್ಯರು ತಿಳಿಸಿದ್ದಾರೆ.
ಈ ಚಿಂಪಾಂಜಿಯನ್ನು 2003ರಲ್ಲಿ ಚೆನ್ನೈನ ಸರ್ಕಸ್‌ ಕಂಪೆನಿಯಿಂದ ಚಾಮರಾಜೇಂದ್ರ ಮೃಗಾಲಯಕ್ಕೆ ತರಲಾಗಿತ್ತು. ಇದು ಇಲ್ಲಿರುವ ಚಿಂಪಾಂಜಿಗಳಲ್ಲಿ ಹಿರಿಯದಾದುದು.
