ನವದೆಹಲಿ: ನಗದು ರೂಪದಲ್ಲಿ ನಡೆಸುವ ವಹಿವಾಟಿನ ಮಿತಿಯನ್ನು ಕೇಂದ್ರ ಸರ್ಕಾರವು ₹ 3 ಲಕ್ಷದಿಂದ ₹ 2 ಲಕ್ಷಕ್ಕೆ ಇಳಿಸಿದೆ.
ಫೆಬ್ರುವರಿ 1ರಂದು ಮಂಡಿಸಿದ್ದ 2017–18ರ ಹಣಕಾಸು ವರ್ಷದ ಬಜೆಟ್ನಲ್ಲಿ ನಗದು ರೂಪದಲ್ಲಿ ನಡೆಸುವ ವಹಿವಾಟಿನ ಮಿತಿಯನ್ನು ₹ 3 ಲಕ್ಷಕ್ಕೆ ಮಿತಗೊಳಿಸಲಾಗಿತ್ತು.
ನಗದನ್ನು ಅಕ್ರಮವಾಗಿ ಸಂಗ್ರಹಿಸಿ ಇಟ್ಟುಕೊಳ್ಳುವುದನ್ನು ತಡೆಯಲು ಈ ಕಠಿಣ ಕ್ರಮ ಕೈಗೊಳ್ಳಲಾಗಿದೆ. ಏಪ್ರಿಲ್ 1ರಿಂದ ಈ ನಿರ್ಬಂಧ ಜಾರಿಗೆ ಬರಲಿದೆ ಎಂದು ಹಣಕಾಸು ಸಚಿವಾಲಯ ತಿಳಿಸಿದೆ.
ತಿದ್ದುಪಡಿ: ಲೋಕಸಭೆಯಲ್ಲಿ ಮಂಗಳವಾರ ಮಂಡಿಸಿದ ಹಣಕಾಸು ಮಸೂದೆಯಲ್ಲಿ ಈ ಮಿತಿ ಇಳಿಕೆಯೂ ಸೇರಿದಂತೆ 40 ತಿದ್ದುಪಡಿಗಳನ್ನು ಸೂಚಿಸಲಾಗಿದೆ.
ಕಂಪನಿ ಕಾಯ್ದೆ, ಉದ್ಯೋಗಿಗಳ ಭವಿಷ್ಯ ನಿಧಿ, ಕಳ್ಳಸಾಗಣೆ ಮತ್ತು ವಿದೇಶ ವಿನಿಮಯ ಕಾಯ್ದೆ, ಟ್ರಾಯ್ ಕಾಯ್ದೆ, ಮಾಹಿತಿ ತಂತ್ರಜ್ಞಾನ ಕಾಯ್ದೆಗಳಲ್ಲಿ ತಿದ್ದುಪಡಿ ಮಾಡಲಾಗಿದೆ.
ಸಣ್ಣ – ಪುಟ್ಟ ನ್ಯಾಯಮಂಡಳಿಗಳನ್ನು ವಿಲೀನಗೊಳಿಸುವ ಮೂಲಕ ನ್ಯಾಯಮಂಡಳಿಗಳು ಹೆಚ್ಚು ದಕ್ಷತೆಯಿಂದ ಕಾರ್ಯನಿರ್ವಹಿಸುವ ಉದ್ದೇಶ ಹೊಂದಲಾಗಿದೆ ಎಂದು ಸರ್ಕಾರ ತಿಳಿಸಿದೆ. ತಿದ್ದುಪಡಿಗಳಿಗೆ ಪ್ರತಿಪಕ್ಷಗಳು ಸಲ್ಲಿಸಿದ ಆಕ್ಷೇಪಗಳನ್ನು ಲೋಕಸಭಾಧ್ಯಕ್ಷೆ ಸುಮಿತ್ರಾ ಮಹಾಜನ್ ತಿರಸ್ಕರಿಸಿದರು.
**
₹ 2 ಲಕ್ಷಕ್ಕಿಂತ ಹೆಚ್ಚಿನ ವಹಿವಾಟನ್ನು ನಗದು ರೂಪದಲ್ಲಿ ಮಾಡಿದರೆ ಅಷ್ಟೇ ಮೊತ್ತದ ದಂಡ ವಿಧಿಸಲಾಗುವುದು
ಹಸ್ಮುಖ ಆಧಿಯಾ, ರೆವೆನ್ಯೂ ಕಾರ್ಯದರ್ಶಿ