ಪರಿಮಳವಾದವಳ ಹಾಡು

ಕಣ್ಣಿನಲ್ಲಿ ಚುಕ್ಕಿ ಕಿತ್ತು ಮಾಲೆ ಕಟ್ಟಿದೆ
ಬಾಡದಂತೆ ಚಂದ್ರಕಾಂತಿ ಬಟ್ಟೆ ಹೊದೆಸಿದೆ
ಗುಡಿಸಲಲ್ಲಿ ಹಣತೆ ಮುಡಿಸಿ ಬೆಳಕನಿರಿಸಿದೆ
ಘಲುಗುಡುವ ಕಾಲಗೆಜ್ಜೆ ದಾರಂದಕೆ ಸಿಗಿಸಿದೆ

ದುಡಿಯ ಬಡಿದು ಜೀವ ಬರಿಸು ಕೀಲುಕುದುರೆಗೆ
ಅಯ್ಯಾ, ಹಗ್ಗ ಹರಿದ ಗೂಳಿಯಂತೆ ಹೋದವನಾ
ಹೊತ್ತು ತಂದು ಬಾಗಿಲಲ್ಲಿ ಕುದುರೆ ಕೆನೆಯಲಿ
ಅದರ ಉಲಿಗೆ ಗೆಜ್ಜೆ ಜಾರಿ ಒಳಗೆ ಕರೆಯಲಿ

ಮೇಳದಯ್ಯ ಬಡಿಯೊ ಆಗ ಜೋರು ಮದ್ದಳೆ
ನಾದ ಅವನ ನರನರಕೆ ಇಳಿದು ಆಸೆ ಕೆಣಕಲಿ
ಅಮಲು ಏರಿ ಕುಣಿದ ಮೈಯಿ ದಣಿದು ಹೋಗಲಿ
ಹರಿದ ಬೆವರ ಹೊಳೆಯಲಿ ಮದನ ಜಳಕವಾಡಲಿ

ದುಡಿಯ ದುಡಿಸಿದವಗೆ ಏನು ಕೊಡುವೆ ಎಂದೆಯೇನೊ
ತಂದೆ ನಿನ್ನ ಕರುಣೆಯಿಂದ ಚಂದ್ರೋದಯ ಭಾಗ್ಯವರಳಿ
ಪರಿಮಳವಾದ ಬಡವಿ ನಿನ್ನ ಮೊಗವ ನೋಡಿ
ನಗುವ ಕೂಸ ಹಡೆದು ಅದರ ನಗೆಯ ಕುಡಿಸುವೆ