ಬೇಸಿಗೆಯ ಮೂರು ಚಿತ್ರಗಳು

1
ಬಾಯಾರಿದ ಜಿಂಕೆಮರಿ
ಊರ ಹೊಕ್ಕಿತು
ಹಳ್ಳ ಕೊಳ್ಳ ಸುತ್ತು ಹಾಕಿ
ಸಾಕುಗೊಂಡಿತು

ಬಾವಿಯೊಂದರಲ್ಲಿಯೆಲ್ಲೋ
ರಾಡಿನೀರ ಕಂಡಿತು
ಆಸೆಗೊಂಡು ಆಳಕಿಳಿದು
ಮೂತಿಯಿಕ್ಕಿತು

ಬೀದಿನಾಯಿ–ಗುಂಪುಜನ
ದಾಳಿಯಿಟ್ಟರು
ಪಾಲು ಮಾಡಿ ತಿಂದು ತೇಗಿ
ಡರ್... ಎಂದರು!

2
ಮರದಲಿದ್ದ ಕೋತಿಯೊಂದು
ಮನೆಗೆ ನುಸುಳಿತು
ಹಂಡೆಯೊಳಗೆ ಕತ್ತು ತೂರಿ
ನೀರ ಹುಡುಕಿತು

ಕೊರಳು ಸಿಕ್ಕು ವಿಲವಿಲೆಂದು
ಕಿರುಚಹತ್ತಿತು
ನಿಷ್ಕರುಣಿಯ ಬಂದೂಕು
ಢಂ...ಎಂದಿತು

ನೀರು... ನೀರು... ಶೋಕರಾಗ
ಮುಗಿಲು ಮುಟ್ಟಿತು!

3
ಹಾರಾಡುವ ಹಕ್ಕಿಕುಲಕೂ
ನೀರದಾಹವು
ಹಾರಿ ಹಾರಿ ಏರಿ ಏರಿ
ಬಸವಳಿದವು

ರೆಕ್ಕೆ ಸೋತು ನೆಲಕೆ ಇಳಿದು
ಕುಸಿದು ಬಿದ್ದವು
ನೀರದಾರಿ ಕಾಣದಾಗಿ
ಉಸಿರಬಿಟ್ಟವು..!
***

ಕರುಣೆರಹಿತ ಬದುಕಪಥವು
ನಮ್ಮದಾಗಿದೆ;
ಇದನು ತೊರೆವ ನಡೆನುಡಿ
ತೋರಬೇಕಿದೆ!

ಸಕಲ ಜೀವ – ಸಸ್ಯಕುಲವು
ನಮ್ಮಂತೆಯೇ;
ಅವಕೂ ಬದುಕ ಹಕ್ಕಿದೆ 
ನಿಮ್ಮಂತೆಯೇ!