ಸುಖಾನುಭೂತಿಗೆ ತಡೆಯಾದೀತೆ...

ಸಾಮಾನ್ಯವಾಗಿ ಭಾರತೀಯರು ಲೈಂಗಿಕ ಸಮಸ್ಯೆಗಳನ್ನು ಚರ್ಚಿಸುವ ವಿಷಯದಲ್ಲಿ ಹಿಂಜರಿಕೆಯ ಮನೋಭಾವದವರು. ತಮ್ಮ ಲೈಂಗಿಕ ಜೀವನದ ಹಿನ್ನೆಲೆ ಹಾಗೂ ತಾವು ಅನುಭವಿಸುತ್ತಿರುವ ಲೈಂಗಿಕ ಸಮಸ್ಯೆಗಳ ಕುರಿತು ವೈದ್ಯರ ಬಳಿ ಹೇಳಿಕೊಳ್ಳಲೂ ಹಿಂದೇಟು ಹಾಕುತ್ತಾರೆ.
ಇತ್ತೀಚೆಗೆ ನನಗೆ ಬಂದಿದ್ದ ಪ್ರಶ್ನೆಯೊಂದು ಹೀಗಿತ್ತು...

‘ನನಗೆ ಮದುವೆಯಾಗಿ ಮೂರು ವರ್ಷವಾಗಿದೆ. ಆದರೆ ಇತ್ತೀಚೆಗೆ ನನ್ನ ಪತಿ ಲೈಂಗಿಕ ಕ್ರಿಯೆಯಲ್ಲಿ ಆಸಕ್ತಿ ತೋರುತ್ತಿಲ್ಲ. ಆರೋಗ್ಯಕರ ಲೈಂಗಿಕ ಜೀವನವನ್ನು ಮತ್ತೆ ಅನುಭವಿಸುವ ದಾರಿ ಯಾವುದು? ನನ್ನ ಪತಿಗೆ ಈ ಸಮಸ್ಯೆ ಕುರಿತು ಚರ್ಚಿಸಲು ಹಿಂಜರಿಕೆಯಿರಬಹುದೇ?’

ಇಂಥ ಲೈಂಗಿಕ ಸಮಸ್ಯೆಗಳು ದಾಂಪತ್ಯ ಜೀವನದ ಸುಖವನ್ನು ಕಸಿದುಕೊಳ್ಳುವ ಮಟ್ಟಕ್ಕೂ ಹೋಗಬಹುದು. ಆದ್ದರಿಂದ ಅವುಗಳ ಕುರಿತು ತಿಳಿದುಕೊಳ್ಳಲೇಬೇಕಾದ ಅಗತ್ಯವಿದೆ.

ನಿಮಿರು ದೌರ್ಬಲ್ಯ ಅಂಥ ಲೈಂಗಿಕ ಸಮಸ್ಯೆಗಳಲ್ಲಿ ಒಂದು. ಪುರುಷರಲ್ಲಿ ಲೈಂಗಿಕ ಕ್ರಿಯೆಯಲ್ಲಿ ತೊಡಗಲು ಅಗತ್ಯವಿರುವ ಶಿಶ್ನದ ನಿಮಿರುವಿಕೆ ಸಾಧ್ಯವಾಗದಿದ್ದಲ್ಲಿ ಅದು ನಿಮಿರು ದೌರ್ಬಲ್ಯ ಎನಿಸಿಕೊಳ್ಳುತ್ತದೆ. ಇದು ಎಷ್ಟೋ ಪುರುಷರ ಸಮಸ್ಯೆ.

ಆದರೆ ಸಮಸ್ಯೆಯನ್ನು ಸಮಸ್ಯೆ ಎಂದುಕೊಂಡು ಕೂರದೆ ಅದನ್ನು ನಿವಾರಿಸಿಕೊಳ್ಳುವ ದಾರಿಗಳೆಡೆಗೂ ಯೋಚಿಸಬೇಕು. ಅದೇ ರೀತಿ ನಿಮಿರು ದೌರ್ಬಲ್ಯಕ್ಕೆ ನಿಖರ ಕಾರಣವನ್ನು ತಿಳಿದುಕೊಂಡರೆ ಅದರ ಪರಿಹಾರವೂ ಸುಲಭಸಾಧ್ಯವಾಗುತ್ತದೆ. ಮೊದಲು ಈ ಸಮಸ್ಯೆಗೆ ಕಾರಣವಾಗಬಹುದಾದ ಕೆಲವು ಅಂಶಗಳ ಕುರಿತು ತಿಳಿಯೋಣ...

ಖಿನ್ನತೆ ಹಾಗೂ ಲೈಂಗಿಕತೆ ಮೇಲಿನ ಪರಿಣಾಮ: ಮೆದುಳು ಕಾಮಪ್ರಚೋದಕವಾಗಿಯೂ ಕೆಲಸ ಮಾಡುತ್ತದೆ. ಲೈಂಗಿಕ ಆಸಕ್ತಿ, ಉತ್ಸಾಹ ಆರಂಭಗೊಳ್ಳುವುದು ಅಲ್ಲೇ. ಆದರೆ ಖಿನ್ನತೆ, ಈ ಆಸೆಗೆ ಅಡ್ಡವಾಗುತ್ತದೆ. ಇದು ನಿಮಿರುವಿಕೆಗೆ ತೊಡಕಾಗುತ್ತದೆ. ವಿಪರ್ಯಾಸವೆಂದರೆ, ಖಿನ್ನತೆ ನಿವಾರಣೆಗೆ ಸೇವಿಸುವ ಹಲವು ಔಷಧಗಳೂ ಲೈಂಗಿಕ ಆಸಕ್ತಿಯನ್ನು ನಿಗ್ರಹಿಸುವ ಕೆಲ ಅಂಶಗಳನ್ನು ಹೊಂದಿರುತ್ತವೆ. ಈ ಔಷಧಗಳು ನಿಮಿರುವಿಕೆ ಪ್ರಕ್ರಿಯೆ ಕ್ಲಿಷ್ಟಕರವಾಗುವಂತೆ ಮಾಡುತ್ತವೆ. ಒಟ್ಟಾರೆ  ಲೈಂಗಿಕ ಅನುಭವದ ಮೇಲೆ ಪರಿಣಾಮ  ಬೀರುತ್ತವೆ.

ಮದ್ಯಪಾನದಿಂದ ಆಸಕ್ತಿ ಹೆಚ್ಚುವುದೇ?: ಮದ್ಯಪಾನ ಮಾಡಿದರೆ ಲೈಂಗಿಕ ಆಸಕ್ತಿ ಹೆಚ್ಚುತ್ತದೆ ಎಂಬ ನಂಬಿಕೆ ಕೆಲವರಲ್ಲಿದೆ. ಆದರೆ ಅತಿಯಾದ ಮದ್ಯಪಾನ ಲೈಂಗಿಕ ಸುಖ ಅನುಭವಿಸದೇ ಇರುವಂತೆಯೂ ಮಾಡಬಹುದು. ಮಿತಿ ಮೀರಿದ ಕುಡಿತ ನಿಮಿರುವಿಕೆಗೆ ತೊಂದರೆ ಮಾಡುತ್ತದೆ. ಆದರೆ ಇದು ತಾತ್ಕಾಲಿಕವಷ್ಟೆ. ವಾರದಲ್ಲಿ ಎರಡು ದಿನ ಮಿತವಾಗಿ  ಮದ್ಯ ಸೇವಿಸಿದರೆ, ಹೃದಯ ಸಮಸ್ಯೆಯ ಅಪಾಯಗಳನ್ನು ದೂರವಿರಿಸುತ್ತದೆ. ಪರೋಕ್ಷವಾಗಿ ಇದು ನಿಮಿರುವಿಕೆಗೆ ಸಹಕಾರಿಯಾಗುತ್ತದೆ.

ಔಷಧಗಳು ಹಾಗೂ ಸಮಸ್ಯೆಯ ಆಳ: ಕೆಲವು ಔಷಧಗಳು ಲೈಂಗಿಕ ಸುಖದ ಮೇಲೆ ಅಡ್ಡಪರಿಣಾಮ ಬೀರಬಹುದು. ಕೆಲ ಸಾಮಾನ್ಯ ಔಷಧಗಳು, ಅಂದರೆ, ರಕ್ತದೊತ್ತಡ, ನೋವು ನಿವಾರಕ, ಖಿನ್ನತೆ ನಿವಾರಕ ಔಷಧಗಳು ನಿಮಿರು ದೌರ್ಬಲ್ಯಕ್ಕೆ ಕಾರಣವಾಗುತ್ತವೆ. ಆಂಫೆಟಮೈನ್‌ಗಳು, ಕೊಕೇನ್ ಇವೆಲ್ಲ ಪುರುಷರಲ್ಲಿ ಲೈಂಗಿಕ ಸಮಸ್ಯೆಗಳು ತಲೆದೋರಲು ಹಾದಿಮಾಡಿಕೊಡುತ್ತವೆ. ಹಾಗೆಂದು ಔಷಧ ಸೇವನೆಯನ್ನೇ ನಿಲ್ಲಿಸಿಬಿಡಬೇಕೆಂದಲ್ಲ. ನಿಮ್ಮ ವೈದ್ಯರನ್ನು ಸಂಪರ್ಕಿಸಿ, ಚರ್ಚಿಸಿ ಮುಂದುವರೆದರೆ ಒಳಿತು.

ಒತ್ತಡ ಹಾಗೂ ಪರಿಹಾರದ ಹಾದಿ: ನೌಕರಿಯಲ್ಲಿ, ಮನೆಯಲ್ಲಿ ಸಾಕಷ್ಟು ಜವಾಬ್ದಾರಿಗಳು ತಲೆಯ ಮೇಲಿದ್ದಾಗ ಲೈಂಗಿಕ ಜೀವನದಲ್ಲಿ  ಸಹಜವಾಗೇ ಆಸಕ್ತಿ ಕಡಿಮೆಯಾಗುತ್ತದೆ. ಒತ್ತಡ ಎನ್ನುವುದು ದೇಹದ ವಿವಿಧ ಅಂಗಗಳ ಮೇಲೆ ತನ್ನ ಪಾರುಪತ್ಯ  ಸಾಧಿಸಬಲ್ಲದು. ಇದು ಜನನಾಂಗಕ್ಕೂ ಹೊರತಲ್ಲ. ಆದರೆ ಪರಿಣಾಮಗಳಿಗೆ ಪರಿಹಾರವೂ ಇದ್ದೇ ಇರುತ್ತದೆ. ಒತ್ತಡಕ್ಕೆ ಜೀವನಶೈಲಿಯ ಬದಲಾವಣೆ ಸೂಕ್ತ ಮದ್ದು. ನಿಯಮಿತ ವ್ಯಾಯಾಮ, ಸಾಕಷ್ಟು ನಿದ್ದೆ, ಆರೋಗ್ಯಕರ ಆಹಾರ ಸೇವನೆ ಇವೆಲ್ಲವೂ ಉತ್ತಮ ಜೀವನಶೈಲಿ ರೂಪಿಸಿ ವಿಶ್ರಾಂತ ಮನಸ್ಥಿತಿ ಮತ್ತು ಆರೋಗ್ಯಕರ ಜೀವನ ನೀಡಬಲ್ಲದು. ಇದು ಲೈಂಗಿಕ ಜೀವನ ಸಮತೋಲನವಾಗಿರುವಂತೆ  ನೋಡಿಕೊಳ್ಳುತ್ತದೆ.

ಕೋಪ ಮಾಡಿಕೊಳ್ಳುವ ಮುನ್ನ: ಕೋಪದಿಂದ ಮನಸ್ಸು ಹಾಗೂ ದೇಹ ಎರಡೂ ಪರಿಣಾಮ ಎದುರಿಸುತ್ತವೆ. ಅದರಲ್ಲೂ, ವ್ಯಕ್ತಪಡಿಸದ ಕೋಪ ಅಥವಾ ಸೂಕ್ತ ರೀತಿ ವ್ಯಕ್ತಪಡಿಸದ ಕೋಪ ಲೈಂಗಿಕ ಕ್ರಿಯೆಯ ಸಮಯದಲ್ಲೂ ವ್ಯಕ್ತವಾಗಬಲ್ಲದು.