ವಾಷಿಂಗ್ಟನ್: ಅಮೆರಿಕದ 45ನೇ ಅಧ್ಯಕ್ಷರಾಗಿ ಅಧಿಕಾರ ವಹಿಸಿಕೊಂಡು ನೂರು ದಿನ ಪೂರೈಸಿರುವ ಡೊನಾಲ್ಡ್ ಟ್ರಂಪ್, ತಮ್ಮ ಮೊದಲ ನೂರು ದಿನಗಳ ಆಡಳಿತ ಅಮೆರಿಕದ ಇತಿಹಾಸದಲ್ಲಿಯೇ ಹೊಸ ದಾಖಲೆ ನಿರ್ಮಿಸಿದೆ ಎಂದು ಹೇಳಿಕೊಂಡಿದ್ದಾರೆ.
ನೂರು ದಿನ ತುಂಬಿದ್ದ ಹಿನ್ನೆಲೆಯಲ್ಲಿ ಮಾಡಿದ ಬಾನುಲಿ ಭಾಷಣದಲ್ಲಿ, ‘ಈ ನೂರು ದಿನಗಳ ನನ್ನ ಆಡಳಿತ ಅಮೆರಿಕದಲ್ಲಿ ಹೊಸ ಇತಿಹಾಸ ಬರೆದಿದೆ. ಇಷ್ಟು ಸಣ್ಣ ಅವಧಿಯಲ್ಲಿ ಅಮೆರಿಕನ್ನರು ಕಳೆದುಕೊಂಡಿದ್ದ ಕೆಲಸ ಮರಳಿ ಕೊಡುವುದು ಸಾಧ್ಯವಾಗಿದೆ.
ಅನೇಕ ಕಾರು ಉತ್ಪಾದನಾ ಕಂಪೆನಿಗಳು ಮರಳಿ ಬಂದಿವೆ. ಅವರು ಇಲ್ಲಿಯೇ ಇರಲು ಬಯಸುತ್ತಿದ್ದಾರೆ. ಅಮೆರಿಕದ ಕಂಪೆನಿಗಳು ಉತ್ತಮವಾಗಿ ಕಾರ್ಯನಿರ್ವಹಿಸುತ್ತಿವೆ. ಹೆಚ್ಚು ಲಾಭದಲ್ಲಿ ನಡೆಯುತ್ತಿವೆ’ ಎಂದು ತಮ್ಮನ್ನು ತಾವು ಶ್ಲಾಘಿಸಿಕೊಂಡಿದ್ದಾರೆ.
‘ಇದು ಆರಂಭವಷ್ಟೇ. ಮುಂದಿನ ದಿನಗಳಲ್ಲಿ ಮಧ್ಯಮ ವರ್ಗದವರಿಗೆ ಮತ್ತು ವ್ಯಾಪಾರಗಳಿಗೆ ಬಹಳಷ್ಟು ತೆರಿಗೆ ಕಡಿತಗೊಳಿಸಲಿದ್ದೇವೆ. ಇದು ಮಹತ್ವದ ಬದಲಾವಣೆ ತರಲಿದೆ ಎಂದು ಆತ್ಮವಿಶ್ವಾಸದಿಂದ ಹೇಳಿದ್ದಾರೆ.
ದೇಶದ ಕಾನೂನನ್ನು ಸಮರ್ಥಿಸಿಕೊಂಡ ಅವರು ಅಮೆರಿಕದ ಕಾರ್ಮಿಕರಿಗಾಗಿ ಹೋರಾಡುವುದು ನಮ್ಮ ಸರ್ಕಾರದ ಕೆಲಸವಾಗಿದೆ. ಅಮೆರಿಕನ್ನರಿಗೆ ಮತ್ತೆ ಅಧಿಕಾರ ತಂದುಕೊಡುವುದು ನಮ್ಮ ಗುರಿಯಾಗಿದೆ ಎಂದು ಹೇಳಿದ್ದಾರೆ.
ಬಹಳ ವರ್ಷಗಳಿಂದ ಇಲ್ಲಿನ ರಾಜಕಾರಣಿಗಳು ಎಲ್ಲ ಅಮೆರಿಕನ್ನರ ಭವಿಷ್ಯಕ್ಕೆ ಭದ್ರ ಬುನಾದಿ ಹಾಕುವುದನ್ನು ಮರೆತಿದ್ದರು. ಇಲ್ಲಿನ ಪ್ರಜೆಗಳಿಂದ ತೆರಿಗೆ ವಸೂಲಿ ಮಾಡಿ, ಅವರ ಕೆಲಸ ಮತ್ತು ಸಂಪತ್ತನ್ನು ಬೇರೆ ದೇಶದ ಜನರಿಗೆ ಹಂಚಿದ್ದರು ಎಂದು ಆರೋಪಿಸಿದ್ದಾರೆ.