ಲಿಪ್ಸ್ಟಿಕ್ ಬಳಿದುಕೊಂಡಂತಿರುವ ತುಟಿ ಇರುವ ಈ ವಿಚಿತ್ರ ಪ್ರಾಣಿ ಯಾವುದು ಗೊತ್ತೆ? ಅಯ್ಯೋ, ಅಷ್ಟೇಕೆ ತಲೆ ಕೆರೆದುಕೊಂಡು ಯೋಚ್ನೆ ಮಾಡ್ತೀರಿ. ಇದು ಒಂದು ‘ಮೀನು’ ಅಷ್ಟೇ.
ಈ ಜಲಚರವನ್ನು ಕೆಂಪು ತುಟಿಯ ಬಾವಲಿ ಮೀನು (ರೆಡ್ ಲಿಪ್ಡ್ ಬ್ಯಾಟ್ಫಿಶ್) ಎಂದು ಕರೆಯಲಾಗುತ್ತದೆ. ವಿಕಾಸವಾದವನ್ನು ಪ್ರತಿಪಾದಿಸಿದ ವಿಜ್ಞಾನಿ, ಚಾರ್ಲ್ಸ್ ಡಾರ್ವಿನ್ನ ನೆನಪಿಗಾಗಿ ‘ಆಗ್ಸೋಸೆಫಲಸ್ ಡಾರ್ವಿನ್” ಎಂದೂ ಸಹ ಇದನ್ನು ಕರೆಯುತ್ತಾರೆ.
ಇದು ಮೀನಿನ ಜಾತಿಗೆ ಸೇರಿದ್ದರೂ ಇದಕ್ಕೆ ಈಜಲು ಬರುವುದಿಲ್ಲ. ಇದರ ಕಿವಿರುಗಳು ಮಾರ್ಪಾಡು ಹೊಂದಿರುವ ಕಾರಣ ಇದು ಕಡಲ ತಳದ ಮರಳ ನೆಲದ ಮೇಲೆ ಕುಳಿತುಕೊಳ್ಳಬಲ್ಲದು ಅಷ್ಟೇ. ನಡೆಯುವಾಗ ಅಡ್ಡಾದಿಡ್ಡಿ ಹೆಜ್ಜೆ ಹಾಕಿದಂತೆ ಕಾಣಿಸುತ್ತದೆ.
ಸಾಮಾನ್ಯವಾಗಿ ಕೆಂಪು ತುಟಿಯ ಬಾವಲಿ ಮೀನುಗಳು, ಪೆಸಿಫಿಕ್ ಸಮುದ್ರದ ಆಳದಲ್ಲಿ ಹಾಗೂ ಪೆರುವಿನ ಹತ್ತಿರವಿರುವ ಗ್ಯಾಲಾಪಗೋಸ್ ದ್ವೀಪಗಳ ಸುತ್ತಮುತ್ತಲಿರುವ ಸಮುದ್ರದಲ್ಲಿ, ಸುಮಾರು 30 ಅಡಿ ಅಳದಲ್ಲಿ ಜೀವಿಸುತ್ತವೆ.
ಈ ಮೀನು 25 ಸೆಂಟಿಮೀಟರ್ (10 ಇಂಚು) ಉದ್ದ ಬೆಳೆಯುತ್ತದೆ. ಇದರ ಚಪ್ಪಟೆ ದೇಹವನ್ನು ನೋಡಿದವರಿಗೆ ರೆಕ್ಕೆ ಚಾಚಿಕೊಂಡಿರುವ ಬಾವಲಿಯಂತೆ ಕಾಣುವುದರಿಂದ ಇದಕ್ಕೆ ಬಾವಲಿ ಮೀನು ಎಂಬ ಹೆಸರು ಬಂದಿದೆ.
ತಲೆಯ ಭಾಗದಲ್ಲಿ ಚೂಪಾಗಿರುವ, ಕೊಂಬಿನ ರೀತಿಯ ಮೂತಿಯು ಕೆಲವು ರೋಮಗಳನ್ನು ಹೊಂದಿರುತ್ತದೆ. ಎರಡು ಕಣ್ಣುಗಳ ಮಧ್ಯ ಭಾಗದಲ್ಲಿ ಮುಂದೆ ಚಾಚಿಕೊಂಡಿರುವ ಈ ಮೂತಿಯು ಬೇಟೆಯನ್ನು ಹಿಡಿಯಲು ಸಹಾಯಕ.