ಚೀಮನಹಳ್ಳಿ ರಮೇಶಬಾಬು
ಬೊಗಸೆಯೊಡ್ಡಿದ್ದೇನೆ ನಾನು
ಜಗದ ಮುಂದೆ
ಬೊಗಸೆಯೆಂಬುದು ಅರಳುತ್ತಿರುವ ಮೊಗ್ಗು
ಬೆರಳ ದಳ ದಳ ಬಿರಿದು
ಗಾಳಿಯಲ್ಲಿ ನಿಂತ ನವಿರು ಹೂವು
ಹೂವ ಬೊಗಸೆ ಎಲೆಯ ಬೊಗಸೆ ಭೂತಾಯ ಬೊಗಸೆ
ಆಗಸವೂ ಬೊಗಸೆಯೊಡ್ಡಿದೆ ಭೂಮಿ ಮುಂದೆ
ನನ್ನ ಬೊಗಸೆಯ ಕಂಡು ನಕ್ಕರು ಕೆಲವು ಮಂದಿ
ಹುಚ್ಚನೆಂದರು ಹಲವು ಮಂದಿ
ಭಿಕ್ಷಾಟನೆಯೆಂದು ಹರುಕು ಮುರುಕು ನೋಟು
ತಂಗಳ ಕೂಳು ಸುರಿದರೊಂದಿಷ್ಟು ಮಂದಿ
ಹಲವರ ಕಣ್ಣಿಗದು ಎಣ್ಣೆ ತೀರಿದ ಹಣತೆ
ಎಣ್ಣೆ ಸುರಿದು ಬೆರಳ ಬತ್ತಿಗೆ ಕಡ್ಡಿ ಗೀರಿದರು
ಹಣತೆ ಬೆಳಗಲೆಂದು
ಮತ್ಯಾರೋ ಸುಡುವ ಬೆಂಕಿಯೆಂದು ಕೂಗಿ
ನೀರ ಕೊಡ ಸುರಿದರು
ಬೊಗಸೆ ಎಲ್ಲವನ್ನು ತುಂಬಿಕೊಂಡು
ಮತ್ತೆ ಖಾಲಿಯಾದಂತೆ ಕಾಣುತ್ತದೆ
ಕೊಡುತ್ತೇನೆ ಪಡೆದುಕೊಳ್ಳುತ್ತೇನೆ
ನಿತ್ಯ ಹರಿವು ನಿತ್ಯ ಖಾಲಿ
ಬೊಗಸೆಯೊಡ್ಡುತ್ತೇನೆ
ಅದರ ತುಂಬಾ ನಕ್ಷತ್ರಗಳ ನಗು ಚಂದ್ರನ ಬೆಳದಿಂಗಳು
ಆಗಸಕ್ಕೆ ಋಣಿಯಾಗಿ ನೆಲದ ಮೇಲೆ ಚೆಲ್ಲುತ್ತೇನೆ
ನೆಲದ ಮಕ್ಕಳ ಬೊಗಸೆಯಲ್ಲಿ ಅವು ಹೂವಾಗುತ್ತವೆ
ಬೊಗಸೆಯೊಡ್ಡುತ್ತೇನೆ
ಅದು ಮಳೆ ಹನಿಗಳಿಗೆ ಕುಡಿಕೆಯಾಗುತ್ತದೆ
ಮೋಡಗಳ ಋಣಕ್ಕೆ ಮರುಳಾಗಿ ನೆಲಕ್ಕೆ ಚೆಲ್ಲುತ್ತೇನೆ
ಅಲ್ಲಿ ನೀರಡಿಕೆಯ ಅನಂತ ಬಾಯಿಗಳು ಬೊಗಸೆಯಾಗಿವೆ
ನನ್ನಂತೆ... ನನ್ನದೇ ನೆರಳಂತೆ
ಜೀವದ ಬೊಗಸೆ ಜೀವಕ್ಕೆ ಮಾತ್ರ ಕಂಡೀತು
ಅಪಮಾನವಲ್ಲವದು
ಪ್ರೀತಿಯ ಹಿಡಿದ ಗರ್ಭ!
ಬೊಗಸೆಯೊಡ್ಡಿದ್ದೇನೆ ನಾನು ಜಗದ ಮುಂದೆ... ಬೆತ್ತಲಾಗಿ.