ಬೆಂಗಳೂರು: ಅಮೆರಿಕದ ತಂತ್ರಜ್ಞಾನ ದೈತ್ಯ ಕಂಪೆನಿ ಆ್ಯಪಲ್‌, ಭಾರತದಲ್ಲಿ ಪ್ರಾಯೋಗಿಕವಾಗಿ ಜೋಡಣೆ ಮಾಡಿದ ಐಫೋನ್‌ಗಳ ಮಾರಾಟ ಆರಂಭಿಸಿದೆ.
ಸೀಮಿತ ಸಂಖ್ಯೆಯ ‘ಐಫೋನ್‌ ಎಸ್ಇ’ಗಳನ್ನು ದೇಶದ ಆಯ್ದ ಮಳಿಗೆಗಳಲ್ಲಿ ಮಾತ್ರ ಮಾರಾಟ ಮಾಡಲಾಗುವುದು ಎಂದು ಉದ್ಯಮದ ಮೂಲಗಳು ತಿಳಿಸಿವೆ. ಆದರೆ, ಈ ಬಗ್ಗೆ ಆ್ಯಪಲ್‌ ಯಾವುದೇ ಸ್ಪಷ್ಟನೆ ವಿವರಣೆ ನೀಡಿಲ್ಲ.
ಅಮೆರಿಕದ ಕ್ಯಾಲಿಫೋರ್ನಿಯಾದಲ್ಲಿ ವಿನ್ಯಾಸ ಮಾಡಿದ ಮತ್ತು ಭಾರತದಲ್ಲಿ ಜೋಡಣೆ ಮಾಡಿದ ಫೋನ್‌ ಎಂದು ಬಾಕ್ಸ್‌ ಮೇಲೆ ಮುದ್ರಿಸಲಾಗಿದೆ. 32 ಜಿ.ಬಿ ಸಂಗ್ರಹಣಾ ಸಾಮರ್ಥ್ಯದ ಐಫೋನ್‌ ಎಸ್ಇ ಬೆಲೆ ₹27,800 ಎಂದು ನಮೂದಿಸಲಾಗಿದೆ.
ಬೆಂಗಳೂರು ಘಟಕದಲ್ಲಿ ಏಪ್ರಿಲ್‌ನಲ್ಲಿ ಈ ಫೋನ್‌ಗಳ ಜೋಡಣಾ ಕಾರ್ಯ ಮುಗಿದಿದೆ ಎಂದು ಮೂಲಗಳು ತಿಳಿಸಿವೆ.
ಆ್ಯಪಲ್‌ ತನ್ನ ಬಹು ಜನಪ್ರಿಯ 4 ಇಂಚು ಪರದೆಯ ‘ಐಫೋನ್‌ ಎಸ್ಇ’ಗಳ ಪ್ರಾಯೋಗಿಕ ಜೋಡಣೆಗೆ ಬೆಂಗಳೂರಿನ ಪೀಣ್ಯ ಕೈಗಾರಿಕಾ ಪ್ರದೇಶದಲ್ಲಿರುವ ಘಟಕದಲ್ಲಿ ಕೆಲವು ದಿನಗಳ ಹಿಂದೆ ಚಾಲನೆ ನೀಡಿತ್ತು.
ಸಣ್ಣ ಪ್ರಮಾಣದಲ್ಲಿ ಜೋಡಣೆ ಆರಂಭಿಸಿದ್ದ ಕಂಪೆನಿ, ಈ ತಿಂಗಳ ಒಳಗೆ ದೇಶಿ ಮಾರುಕಟ್ಟೆಗೆ ಮೊಬೈಲ್‌ ಬಿಡುಗಡೆ ಮಾಡುವುದಾಗಿಯೂ ಹೇಳಿತ್ತು. ಆ್ಯಪಲ್‌ ಸಂಸ್ಥೆ ಪರವಾಗಿ ತೈವಾನಿನ ವಿಸ್ಟ್ರನ್‌ ಈ ಫೋನ್‌ ತಯಾರಿಸಿದೆ.
