ಲಂಡನ್‌: ಮ್ಯಾಂಚೆಸ್ಟರ್‌ ಬಾಂಬ್‌ ದಾಳಿ ಪ್ರಕರಣದ ಬಳಿಕ, ಇಂಗ್ಲೆಂಡ್‌ನಲ್ಲಿ ಹಲವೆಡೆ ಮುಸ್ಲಿಂ ಸಮುದಾಯದವರನ್ನು ನಿಂದಿಸಿದ ಘಟನೆಗಳು ವರದಿಯಾಗಿವೆ.
ಮಹಿಳೆಯೊಬ್ಬರ ಮೇಲೆ ಉಗುಳಲಾಗಿದ್ದು, ದಾರಿಯಲ್ಲಿ ತೆರಳುತ್ತಿದ್ದ ಯುವತಿಯನ್ನು ಉದ್ದೇಶಿಸಿ ‘ಬಾಂಬ್‌ ದಾಳಿಯನ್ನು ಯಾವಾಗ ನಿಲ್ಲಿಸುತ್ತೀರ’ ಎಂದು ಕೆಲವರು ಕೂಗಾಡಿದ್ದಾರೆ. ಮ್ಯಾಂಚೆಸ್ಟರ್‌ನ ಬಾಲಕಿಯರ ಪ್ರೌಢಶಾಲೆಗೆ ತೆರಳುತ್ತಿದ್ದ 14 ವರ್ಷದ ವಿದ್ಯಾರ್ಥಿನಿಯನ್ನು ನಿಂದಿಸಲಾಗಿದೆ.
ಈ ಶಾಲೆಯ ಮುಖ್ಯ ಶಿಕ್ಷಕಿ ಮೊನಾ ಮೊಹಮ್ಮದ್ ಅವರು ರೇಡಿಯೊ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿ, ಇಂತಹ ನಡವಳಿಕೆಯಿಂದ ವಿದ್ಯಾರ್ಥಿನಿಯ ಮನಸ್ಸಿಗೆ ಅತೀವ ನೋವಾಗಿದೆ ಎಂದು ಹೇಳಿದ್ದಾರೆ.
‘ನಮ್ಮ ಪ್ರಕಾರ ಇಸ್ಲಾಂ ಶಾಂತಿ ಸಾರುತ್ತದೆ. ಯಾರೋ ಕೆಲವರು ತಾವು ಮುಸ್ಲಿಮರೆಂದು ಹೇಳಿಕೊಂಡು ಅಂತಹ ಕೃತ್ಯಗಳನ್ನು ಎಸಗಿದರೆ ಅವರು ನಮಗೆ ಸೇರಿದವರಲ್ಲ. ಅವರ ಪರವಾಗಿ ಕ್ಷಮೆ ಯಾಚಿಸುವ ಅಗತ್ಯ ನಮಗಿಲ್ಲ’ ಎಂದಿದ್ದಾರೆ.
