ನವದೆಹಲಿ: ನೋಟು ಅಪಮೌಲ್ಯೀಕರಣದ ನಂತರ ಬ್ಯಾಂಕ್‌ ಮತ್ತು ಅಂಚೆ ಕಚೇರಿಗಳಲ್ಲಿ ಸಂಗ್ರಹಿಸಲಾಗಿರುವ ಹಳೆಯ ₹500 ಮತ್ತು ₹1000 ಮುಖಬೆಲೆಯ ನೋಟುಗಳನ್ನು ಭಾರತೀಯ ರಿಸರ್ವ್‌ ಬ್ಯಾಂಕ್‌ನಲ್ಲಿ ಜಮೆ ಮಾಡಲು ಸರ್ಕಾರ ಅನುಮತಿ ನೀಡಿದೆ.
ಆರ್‌ಬಿಐನಲ್ಲಿ ಹಳೆಯ ನೋಟುಗಳ ಠೇವಣಿಗೆ ಬ್ಯಾಂಕ್‌, ಅಂಚೆ ಕಚೇರಿ ಹಾಗೂ ಸಹಕಾರಿ ಬ್ಯಾಂಕ್‌ಗಳಿಗೆ ಸರ್ಕಾರ ಎರಡನೇ ಬಾರಿ ಅವಕಾಶ ಕಲ್ಪಿಸಿದೆ. ನೋಟು ಅಪಮೌಲ್ಯೀಕರಣಗೊಂಡು 50 ದಿನಗಳ ನಂತರ ಡಿ.31ರಂದು ಮೊದಲ ಬಾರಿಗೆ ಹಳೆಯ ನೋಟು ಜಮೆಗೆ ಅವಕಾಶ ನೀಡಲಾಗಿತ್ತು.
ಜುಲೈ 20ರೊಳಗೆ ಹಳೆಯ ನೋಟುಗಳನ್ನು ಆರ್‌ಬಿಐನಲ್ಲಿ ಜಮೆ ಮಾಡಬಹುದು ಎಂದು ಪ್ರಕಟಣೆ ತಿಳಿಸಿದೆ.
ಕಪ್ಪು ಹಣ ಹಾಗೂ ಖೋಟಾ ನೋಟು ಹಾವಳಿ ತಪ್ಪಿಸುವ ನಿಟ್ಟಿನಲ್ಲಿ ಸರ್ಕಾರ 2016ರ ನವೆಂಬರ್‌ 8ರಂದು ₹500, ₹1000 ಮುಖಬೆಲೆ ನೋಟುಗಳನ್ನು ಅಪಮೌಲ್ಯೀಕರಿಸಿ ಆದೇಶಿಸಿತ್ತು.
ನೋಟು ಅಪಮೌಲ್ಯೀಕರಣಕ್ಕೂ ಮುನ್ನ ದೇಶದಲ್ಲಿ ₹17.7 ಲಕ್ಷ ಕೋಟಿ ಮೌಲ್ಯದ ₹500, ₹1000 ಮುಖಬೆಲೆ ನೋಟುಗಳು ಚಲಾವಣೆಯಲ್ಲಿತ್ತು.
