ಶುಭ ತರುವ ಜೋಡಿ ಹಕ್ಕಿ

ಚೀನಾದ ಫೆಂಗ್‌ ಶುಯಿ ವಾಸ್ತು ಹಾಗೂ ಭಾರತೀಯ ವಾಸ್ತು ಶಾಸ್ತ್ರದಲ್ಲಿ ಹಕ್ಕಿಗಳಿಗೆ ವಿಶೇಷ ಪ್ರಾಮುಖ್ಯತೆ ನೀಡಲಾಗಿದೆ.

* ಹಕ್ಕಿಗಳು ಮನೆಗೆ ಬರುವುದು, ಗೂಡು ಕಟ್ಟುವುದು, ಮರಿ ಹಾಕುವುದು ಎಂದರೆ ಶುಭ ಸಂಕೇತ.
* ವಾಸ್ತುಶಾಸ್ತ್ರದಲ್ಲಿ ಪಾರಿವಾಳಕ್ಕೆ ಹೆಚ್ಚಿನ ಪ್ರಾಧಾನ್ಯವಿದೆ. ಅವುಗಳನ್ನು ಓಡಿಸುವುದು ಒಳಿತಲ್ಲ ಎನ್ನುವ ನಂಬಿಕೆ ಅನೇಕರದ್ದು.
* ಮದುವೆ ಆಗದೇ ಇದ್ದಲ್ಲಿ ಪ್ರಣಯ ಹಕ್ಕಿಗಳನ್ನು ಇಟ್ಟರೆ ಮದುವೆ ಆಗುತ್ತದೆಯಂತೆ.
* ಲವ್‌ ಬರ್ಡ್ಸ್‌, ಬಾತುಕೋಳಿ ಅಥವಾ ಯಾವುದೇ ಜಾತಿಯ ಜೋಡಿ ಹಕ್ಕಿಗಳ ಚಿತ್ರ, ಪ್ರತಿಕೃತಿಗಳನ್ನೂ ಮನೆಯಲ್ಲಿ ಇಟ್ಟುಕೊಂಡರೆ ಸಂಬಂಧಗಳು ಗಟ್ಟಿಗೊಳ್ಳುತ್ತವೆ ಎನ್ನುವ ನಂಬಿಕೆ ಇದೆ.
* ಅಂದಹಾಗೆ ಜೋಡಿಹಕ್ಕಿಗಳನ್ನು ಮನೆಯ ನೈಋತ್ಯ ಭಾಗದಲ್ಲಿ ಇಡುವುದು ಉತ್ತಮ.

ಫೆಂಗ್‌ಶುಯಿ ಹಕ್ಕಿಗಳು
ವಾಸ್ತು ಪ್ರಕಾರ ಫೆಗ್‌ಶುಯಿ ಹಕ್ಕಿಗಳು ಅದೃಷ್ಟ ತರುತ್ತವೆ. ಮನೆಯಲ್ಲಿ ಖುಷಿಯ ವಾತಾವರಣವನ್ನು ಹೆಚ್ಚಿಸುತ್ತದೆ. ಪ್ರೀತಿ ಹಾಗೂ ಬದ್ಧತೆಯ ಸಂಕೇತ ಇವು. ಹೊಸ ಹೊಸ ಅವಕಾಶಗಳನ್ನೂ  ಈ ಹಕ್ಕಿಗಳು ಹೊತ್ತು ತರುತ್ತವೆ ಎಂಬ ನಂಬಿಕೆಯೂ ಇದೆ.

* ಫೈರ್‌ಬರ್ಡ್‌ಗಳು ಶಕ್ತಿ ಹಾಗೂ ದೃಢತೆಯ ಸಂಕೇತ. ವೈವಾಹಿಕ ಜೀವನ ಸುಖಕರವಾಗಿರಲೆಂದು ಅನೇಕರು ಇದನ್ನು ಮನೆಯಲ್ಲಿಡುತ್ತಾರೆ. ಮುಖ್ಯದ್ವಾರದಲ್ಲಿ ಇವುಗಳನ್ನಿಟ್ಟರೆ ದುಷ್ಟಶಕ್ತಿಗಳು ಮನೆಪ್ರವೇಶಿಸದಂತೆ ತಡೆಯುತ್ತವೆ. 
* ಕ್ರೇನ್‌ಬರ್ಡ್‌ಗಳು ಸ್ವಚ್ಛ ಹಾಗೂ ಪರಿಶುದ್ಧತೆಯ ಸಂಕೇತ. ಪೀಚ್‌ ಹಾಗೂ ದೇವದಾರು ಮರ, ತಾವರೆ ಗಿಡದ ಚಿತ್ರವಿರುವ ಕ್ರೇನ್‌ಬರ್ಡ್‌ ಮನಸ್ಸಿಗೆ ನೆಮ್ಮದಿ ಹಾಗೂ ಸಂತೋಷವನ್ನು ತರುತ್ತವೆ.
* ಮ್ಯಾಂಡರಿನ್‌ ಬಾತುಕೋಳಿಗಳ ಫೋಟೊ ಅಥವಾ ಪ್ರತಿಕೃತಿ ಮನೆಯಲ್ಲಿದ್ದರೆ ಸಂಬಂಧಗಳು ಗಟ್ಟಿಗೊಳ್ಳುತ್ತವೆ. ಇವುಗಳನ್ನು ಮನೆ ಅಥವಾ ಮಲಗುವ ಕೋಣೆಯ ನೈಋತ್ಯ ಭಾಗದಲ್ಲಿ ಇರಿಸಬೇಕು.
* ಜೋಡಿ ಪಾರಿವಾಳಗಳ ಪ್ರತಿಮೆಯನ್ನು ಮನೆಯಲ್ಲಿಟ್ಟರೆ ಶುಭ. ಅವು ಒಂದಕ್ಕೊಂದು ಎದುರು ಬದುರಾಗಿ ಕುಳಿತ ಪ್ರತಿಮೆ ಇರಲಿ. ಮಲಗುವ ಕೋಣೆಯ ನೈಋತ್ಯ ಭಾಗದಲ್ಲಿ ಸ್ಥಾಪಿಸಿ. ಕೋಣೆ ಪ್ರವೇಶಿಸಿದಾಗ ಹಾಗೂ ಕೋಣೆಯಿಂದ ಹೊರನಡೆಯುವಾಗ ಜೋಡಿ ಪಾರಿವಾಳಗಳ ಪ್ರತಿಮೆ ಕಣ್ಣಿಗೆ ಬೀಳುವಂತಿರಲಿ.
* ಶ್ರದ್ಧೆ, ಧೈರ್ಯ, ನಂಬಿಕೆ, ಪರಿಶ್ರಮದ ಸಂಕೇತವಾದ ಹುಂಜದ ಪ್ರತಿಮೆಯನ್ನೂ ಮನೆಯಲ್ಲಿಟ್ಟುಕೊಳ್ಳುವುದು ವಾಸ್ತು ಪ್ರಕಾರ ಒಳ್ಳೆಯದು.  ನವಿಲು ಪ್ರೀತಿ, ಸಮೃದ್ಧಿ, ಪರಿಶುದ್ಧತೆ, ನೆಮ್ಮದಿಯ ಸಮ್ಮಿಶ್ರಣದ ಸಂಕೇತ. ಖುಷಿ, ಯಶಸ್ಸು, ಪ್ರೀತಿ, ಅವಕಾಶಗಳನ್ನು ಹೊತ್ತು ತರುವ ನವಿಲಿನ ಪ್ರತಿಮೆಯನ್ನು ಮನೆ ಹಾಗೂ ಕಚೇರಿಯಲ್ಲಿ ಇಟ್ಟುಕೊಳ್ಳಬಹುದು.