‘ಪ್ರಾಮಾಣಿಕತೆ ಯಶಸ್ಸಿನ ಗುಟ್ಟು’

‘ಪ್ರತಿಯೊಂದು ಕಾರ್ಯವನ್ನು ಪ್ರಾಮಾಣಿಕತೆಯಿಂದ ಕೈಗೊಂಡಾಗ ಮಾತ್ರ ಯಶಸ್ಸು ಗಳಿಸಲು ಸಾಧ್ಯ’ ಎಂದು ಕಿವಿಮಾತು ಹೇಳಿದರು. ‘ವಿದ್ಯಾರ್ಥಿ ಜೀವನದಲ್ಲಿ ಅನೇಕ ರೀತಿಯ ಅವಮಾನಗಳು ಆಗಬಹುದು. ಆ ಅವಮಾನಗಳಿಗೆ ಎದೆಗುಂದಬಾರದು, ಅವುಗಳನ್ನೇ ಸವಾಲಾಗಿ ಸ್ವೀಕರಿಸಿ ಸಾಧನೆ ಮೂಲಕ ಉತ್ತರ ನೀಡಬೇಕು’ ಎಂಬ ಸಲಹೆ ನೀಡಿದರು.

ಕೊಪ್ಪಳ ಕನಕಗಿರಿಮಠದ ಡಾ.ಚನ್ನಮಲ್ಲಿಕಾರ್ಜುನ ಸ್ವಾಮೀಜಿ ಆಶೀವರ್ಚನ ನೀಡಿ ‘ನಮ್ಮ ಅಂತಃಕರಣವನ್ನು ಗಟ್ಟಿ ಮಾಡಿಕೊಂಡಾಗ ಮಾತ್ರ ನಾವು ಸಾಧನೆ ಮಾಡಲು ಸಾಧ್ಯ. ನಮ್ಮ ಮನಸ್ಸಿನಲ್ಲಿ ಗೊಂದಲಗಳಿದ್ದರೆ ಸಾಧನೆ ಮಾಡಲು ಸಾಧ್ಯವಾಗುವುದೇ ಇಲ್ಲ.

ನಮ್ಮಲ್ಲಿ ಬಾಹ್ಯಕರಣ, ಅಂತಃಕರಣ ಎಂಬ ಎರಡು ವಿಭಾಗಗಳಿವೆ, ಬಾಹ್ಯ ಕರಣಗಳಲ್ಲಿ ಕಣ್ಣು, ಕಿವಿ ಮೊದಲಾದ ಪಂಚೇಂದ್ರಿಯಗಳಿವೆ. ಕಣ್ಣು ನೋಡುವ ಕಾರ್ಯವನ್ನೇ ಮಾಡುತ್ತದೆ ಹೊರತು ಕೇಳಿಸುವ ಕಾರ್ಯ ಮಾಡುವುದಿಲ್ಲ, ಈ ಎಲ್ಲ ಅಂಗಗಳ ಕಾರ್ಯವ್ಯಾಪ್ತಿ ನಿರ್ದಿಷ್ಟವಾಗಿದೆ. ಈ ಎಲ್ಲವನ್ನೂ ನಿಯಂತ್ರಿಸು ವುದು ಮಾತ್ರ ಅಂತಃಕರಣ. ಈ ಕಾರಣಕ್ಕಾಗಿ ಅಂತಃಕರಣ ಗಟ್ಟಿ ಯಾಗಿದ್ದರೆ ಎಲ್ಲವನ್ನೂ ಸಾಧಿಸಬಹುದು’ ಎಂದು ನುಡಿದರು.

ವಿಧಾನ ಪರಿಷತ್ ಸದಸ್ಯ ಹಣಮಂತ ನಿರಾಣಿ ಮಾತನಾಡಿ ‘ಸಾಧನೆಗೆ ಬಡತನ, ಶ್ರೀಮಂತಿಕೆ ಎಂಬ ಕಟ್ಟುಪಾಡುಗಳಿಲ್ಲ. ನಿರಂತರ ಪ್ರಯತ್ನದಿಂದ ಸಾಧನೆಯ ಶಿಖರವನ್ನು ತಲುಪಬಹುದು’ ಎಂದರು.

‘ಸಾಲ ಮಾಡಿದರೂ ಚಿಂತೆಯಿಲ್ಲ, ಮಕ್ಕಳನ್ನು ದುಬಾರಿ ಕಾನ್ವೆಂಟ್ ಶಾಲೆಗೆ ಸೇರಿಸುವ ಪರಿಪಾಠ, ಮನೋಭಾವನೆ ಪಾಲಕರಲ್ಲಿ ಹೆಚ್ಚುತ್ತಿದೆ’ ಎಂದು ಮಾಜಿ ಸಚಿವ ಅಪ್ಪಾಸಾಹೇಬ ಪಟ್ಟಣಶೆಟ್ಟಿ ಕಳವಳ ವ್ಯಕ್ತಪಡಿಸಿದರು.

‘ಸರ್ಕಾರಿ ಶಾಲೆಗಳಲ್ಲಿಯೂ ಗುಣಮಟ್ಟದ ಶಿಕ್ಷಣ ದೊರಕುತ್ತದೆ. ಸರ್ಕಾರಿ ಶಾಲೆಯಲ್ಲಿ ಕಲಿತ ಅನೇಕರು ಇಂದು ಉನ್ನತವಾದ ಹುದ್ದೆ ಅಲಂಕರಿಸಿದ ಉದಾಹರಣೆ ಸಾಕಷ್ಟಿವೆ. ಆದ್ದ ರಿಂದ ಸಾಲ ಮಾಡಿ ಮಕ್ಕಳನ್ನು ದುಬಾರಿ ಶಾಲೆಗೆ ಕಳುಹಿಸುವ ಮನೋಭಾವದಿಂದ ಪಾಲಕರು ಹೊರ ಬರಬೇಕಾದ ಅವಶ್ಯಕತೆಯಿದೆ’ ಎಂದರು.

ಚಿಂತಕ ಅರವಿಂದ ಚೊಕ್ಕಾಡಿ ಮಾತನಾಡಿದರು. ಪ್ರೊ.ವೆಂಕಟೇಶ, ಚಾಣಕ್ಯ ಕೆರಿಯರ್ ಅಕಾಡೆಮಿಯ ಮುಖ್ಯಸ್ಥ ಎನ್.ಎಂ.ಬಿರಾದಾರ, ಮೂಲಿಮನಿ ಇದ್ದರು. ಕೆಎಎಸ್ ಅಧಿಕಾರಿಗಳಾಗಿ ಆಯ್ಕೆಯಾದ ಅಭ್ಯರ್ಥಿ ಗಳನ್ನು ಗೌರವಿಸಲಾಯಿತು.