ಪಂಡಿತ ಪರಂಪರೆಗೆ ಸಂದ ಗೌರವ: ಸ್ವಾಮೀಜಿ

‘ಇದು ಕೇವಲ ಮಧ್ವ ಸಮಾಜಕ್ಕೆ ಮಾತ್ರ ಹೆಮ್ಮೆಯ ವಿಷಯವಲ್ಲ, ಇಡೀ ಪಂಡಿತ ಪರಂಪರೆಗೆ ಸಂದ ಗೌರವ. ಅವರು ತಿರುಪತಿ ಸಂಸ್ಕೃತ ವಿಶ್ವವಿದ್ಯಾಲಯದಲ್ಲಿ ಕುಲಪತಿಯಾಗಿದ್ದ ಸಂದರ್ಭದಲ್ಲಿ ದಕ್ಷವಾಗಿ ಕೆಲಸ ಮಾಡಿದ ಅವರನ್ನು ಈಗಲೂ ನೆನಪಿಸಿಕೊಳ್ಳಲಾಗುತ್ತದೆ. ಮೊದಲು ಅವರು ನನಗೆ ಶಿಷ್ಯರಾಗಿದ್ದರು, ಆದರೆ ಈಗ ಅವರೂ ಪೀಠಾಧಿಪತಿ ಆಗಿರುವುದರಿಂದ ಇಬ್ಬರೂ ಸಹೋದರರಂತೆ. ಅವರು ನನ್ನ ಐದನೇ ಪರ್ಯಾಯದ ಅವಧಿಯಲ್ಲಿಯೇ ಮಠಾಧೀಶರಾದದ್ದು ಸಂತಸದ ಸಂಗತಿ’  ಎಂದರು.

ಅಭಿನಂದನೆ ಸ್ವೀಕರಿಸಿ ಮಾತನಾಡಿದ ವಿದ್ಯಾಶ್ರೀಶತೀರ್ಥ ಸ್ವಾಮೀಜಿ, ‘ನಾನು ಪೇಜಾವರ ಶ್ರೀಗಳಂತೆ ಸಮಾಜಮುಖಿ ಕಾರ್ಯದಲ್ಲಿ ತೊಡಗಿಸಿಕೊಳ್ಳಲು ಇಚ್ಛಿಸುತ್ತೇನೆ. ಅವರ ಹಾದಿಯಲ್ಲಿಯೇ ನಡೆಯುತ್ತೇನೆ. ವ್ಯಾಸರಾಜರು ಕೇವಲ ಶಾಸ್ತ್ರ ಸಂರಕ್ಷಣೆ ಮಾತ್ರವಲ್ಲದೆ ಹಲವಾರು ಸಮಾಜಮುಖಿ ಕೆಲಸ ಸಹ ಮಾಡಿದ್ದರು. ವಿದ್ವಾಂಸರಿಗೆ ಆಶ್ರಯ ನೀಡಿದ್ದರು, ಕೆರೆ–ಕಟ್ಟೆಗಳನ್ನು ನಿರ್ಮಿಸಿದ್ದರು’ ಎಂದರು.

ಪೇಜಾವರ ಕಿರಿಯ ವಿಶ್ವಪ್ರಸನ್ನ ಸ್ವಾಮೀಜಿ ಮಾತನಾಡಿ, ‘ವಿದ್ಯಾಶ್ರೀಶತೀರ್ಥ ಸ್ವಾಮೀಜಿ ಅವರು ಎತ್ತರದ ಪದವಿ ಕುಲಪತಿ ಸ್ಥಾನದಲ್ಲಿದ್ದರು. ಅದಕ್ಕೂ ಎತ್ತರದ ಸ್ಥಾನ ಬಾಕಿ ಇದ್ದದ್ದು ಪೀಠದ ಸ್ಥಾನ, ಈಗ ಅದನ್ನೂ ಪಡೆದುಕೊಂಡಿದ್ದಾರೆ. ಬದುಕಿನಲ್ಲಿ ಇದಕ್ಕಿಂತ ಹೆಚ್ಚಿನದನ್ನು ಪಡೆಯಲು ಸಾಧ್ಯವಿಲ್ಲ. ಭಗವಂತ ಅವರಿಗೆ ಎಲ್ಲ ನೀಡಿದ್ದಾರೆ. ಇರುವ ವಿದ್ಯೆ ಸಮಾಜಕ್ಕೆ ನೀಡಲು ಭಗವಂತ ಆರೋಗ್ಯ ಭಾಗ್ಯ ಕರುಣಿಸಲಿ’ ಎಂದು ಹಾರೈಸಿದರು. ಸ್ವಾಮೀಜಿ ಅವರನ್ನು ಸಂಸ್ಕೃತ ವಿದ್ಯಾಲಯದಿಂದ ಮಠದ ವರೆಗೆ ಮೆರವಣಿಗೆಯಲ್ಲಿ ಕರೆತರಲಾಯಿತು.