ಶಾಂತಿಗೆ ಮಾದರಿ ನೀಮಾ ಹೊಸಳ್ಳಿ

ಸುಮಾರು 250ರಿಂದ 300 ಮನೆಗಳಿರುವ ಗ್ರಾಮದಲ್ಲಿ 50ರಿಂದ 60 ಮನೆಗಳು ಹಿಂದೂಗಳಿಗೆ ಸೇರಿವೆ. ಉಳಿದ ಮನೆಗಳು ಮುಸ್ಲಿಮರದ್ದಾಗಿವೆ. ಮದ್ಯ, ಜೂಜು ಸೇರಿದಂತೆ ಕೆಟ್ಟ ಚಟುವಟಿಕೆಗಳಿಗೆ ಇಲ್ಲಿ ಆಸ್ಪದವಿಲ್ಲ. ಗ್ರಾಮಸ್ಥರು ಕಲಬುರ್ಗಿಯ ಖಾಜಾ ಬಂದಾನವಾಜ್ ಅವರ ವಂಶಸ್ಥರಾದ ‘ಹಜ್ರತ್ ಫಸಿ ಉಲ್ಲಾ ಹಸ್ನಿ ಉಲ್‌ ಹುಸೇನಿ’ ಅವರ ಮೇಲಿಟ್ಟುವ ನಂಬಿಕೆಯೇ ಇದಕ್ಕೆ ಕಾರಣ.

ಗೌಡನಹಳ್ಳಿಯ ಸೀಮೆ ದಾಟಿ ವ್ಯಕ್ತಿಯೊಬ್ಬ ಮಡಿಕೆಯಲ್ಲಿ ಸೇಂದಿ ಮಾರಾಟ ಮಾಡಲು ಬಂದಾಗ ಜನರು ಅದನ್ನು ಧ್ವಂಸಗೊಳಿಸಿದ್ದರು. 1996ರಲ್ಲಿ ವ್ಯಕ್ತಿಯೊಬ್ಬ ಸಾರಾಯಿ ಪಾಕೀಟ್‌ ಮಾರಾಟಕ್ಕಾಗಿ ಊರ ಹೊರಗಡೆ ಗುಡಿಸಲು ಹಾಕಿ ಒಂದು ದಿನ ವ್ಯಾಪಾರ ನಡೆಸಿದ್ದಾನೆ. ಆದರೆ, ಅದೇ ದಿನ ರಾತ್ರಿ ಗ್ರಾಮಸ್ಥರು ಆ ಗುಡಿಸಲು ಸುಟ್ಟು
ಹಾಕಿದ್ದರು.

‘ನೆರೆಯ ದೇಗಲಮಡಿಯ ಸೀಮೆಯಲ್ಲಿ ಒಂದು ದಿನ ಮದ್ಯ ಮಾರಾಟ ಮಾಡುತ್ತಿರುವುದು ಗಮನಕ್ಕೆ ಬಂದಿತ್ತು. ಇದನ್ನು ತಿಳಿದು ಹೋದ ಜನರು ಮದ್ಯದ ಬಾಟಲಿ ವಶಕ್ಕೆ ಪಡೆದು ಹಾಳು ಬಾವಿಗೆ ಎಸೆದು ಅದರ ಮೇಲೆ ಕಲ್ಲು ಬಂಡೆ ಹಾಕಿದರು’ ಎಂದು ಮೋದಿನಸಾಬ್‌ ದಸ್ತಾಪುರವಾಲೆ ಮತ್ತು ಗೂಡುಸಾಬ್ ಪಟೇಲ್‌ವಾಲೆ ಹೇಳುತ್ತಾರೆ.
ಗೌಡನಹಳ್ಳಿ ಹಿಂದಿನಿಂದಲೂ ಸೇಂದಿಗೆ ಪ್ರಸಿದ್ಧವಾಗಿತ್ತು. ಆದರೂ ಇದಕ್ಕೆ ಗ್ರಾಮದಲ್ಲಿ ಮಾತ್ರ ಸ್ಥಾನ ಸಿಕ್ಕಿಲ್ಲ.

ಹಿಂದೂ ಮುಸ್ಲಿಮರೆಂಬ ಭೇದ ಎಣಿಸದೇ ಫಸಿ ಉಲ್ಲಾ ಹುಸೇನಿ ಅವರು ನೀಮಾ ಹೊಸಳ್ಳಿಯಲ್ಲಿ ಹಿಂದೂಗಳಿಗೆ ಭೂಮಿ ನೀಡಿ ಉಪ ಜೀವನಕ್ಕೆ ಆಸರೆ ಒದಗಿಸಿದ್ದಾರೆ.
ಜಗನ್ನಾಥ ಡಿ.ಶೇರಿಕಾರ