ಶಾಲೆಗಳಲ್ಲಿ ಮಕ್ಕಳ ಸುರಕ್ಷತೆ ನಿರ್ಲಕ್ಷ್ಯ ಅಕ್ಷಮ್ಯ

ರಾಯನ್ ಶಾಲೆಯ ದುರಂತದ ಆಚೆಗೆ ಈ ಪ್ರಕರಣವನ್ನು ನೋಡಬೇಕು. ಶಿಕ್ಷಣ ಎಂಬುದು ಇತ್ತೀಚಿನ ದಶಕಗಳಲ್ಲಿ ಲಾಭದಾಯಕ ವಾಣಿಜ್ಯ ಚಟುವಟಿಕೆ ಆಗಿದ್ದು ಹಣ ಗಳಿಕೆಯೇ ಮುಖ್ಯವಾಗಿದೆ. ಇದಕ್ಕೆ ನಮ್ಮ ಭ್ರಷ್ಟ ವ್ಯವಸ್ಥೆಯೂ ಪೂರಕವಾಗಿದೆ. ವಿದ್ಯಾಮಂದಿರಗಳೆಂದು ಕರೆಯಲಾಗುವ ಶಾಲೆಗಳಲ್ಲಿ ಮಕ್ಕಳ ಸುರಕ್ಷತೆಗೆ ಕನಿಷ್ಠ ಗ್ಯಾರಂಟಿಯೂ ಒದಗಿಸಲು ಸಾಧ್ಯವಾಗದಿದ್ದಲ್ಲಿ ಅದು ನಾಗರಿಕ ಸಮಾಜದ ವೈಫಲ್ಯ. ಬೋಧಕೇತರ ಸಿಬ್ಬಂದಿ ನೇಮಕ ಮಾಡಿಕೊಳ್ಳುವ ಸಂದರ್ಭದಲ್ಲಿ ವ್ಯಕ್ತಿಗಳ ಹಿನ್ನೆಲೆ ಪರಿಶೀಲಿಸದೆ ಕಡೆಗಣಿಸಿದ್ದು ಅಕ್ಷಮ್ಯ. ನೇಮಕಾತಿಗೆ ಸಂಬಂಧಿಸಿದಂತೆ ಇಂತಹ ನಿಯಮಗಳ ಉಲ್ಲಂಘನೆ ರಾಷ್ಟ್ರದಾದ್ಯಂತ ಪದೇ ಪದೇ ಆಗುತ್ತಿರುವುದು ವಿಷಾದನೀಯ. ಶಾಲೆಗಳಲ್ಲಿ ಹವಾನಿಯಂತ್ರಿತ ತರಗತಿ ಕೋಣೆಗಳು, ಅತ್ಯಾಧುನಿಕ ವ್ಯವಸ್ಥೆಗಳಿಗಿಂತ ಮೂಲಭೂತ ವಿಚಾರಗಳು ಮುಖ್ಯವಾಗಬೇಕು. ಹಲವು ಶಾಲೆಗಳು ವಿಶ್ವ ದರ್ಜೆಯ ಸೌಲಭ್ಯಗಳ ಬಗ್ಗೆ ಹೇಳಿಕೊಳ್ಳುತ್ತವೆ. ಆದರೆ ಚಾಕು ಇಟ್ಟುಕೊಂಡ ವ್ಯಕ್ತಿ ಶಾಲಾ ಆವರಣ ಪ್ರವೇಶಿಸುವುದು ಹೇಗೆ ಸಾಧ್ಯ?

ಹೆಣ್ಣುಮಕ್ಕಳು ಮಾತ್ರವಲ್ಲ ಗಂಡು ಮಕ್ಕಳೂ ಲೈಂಗಿಕ ದೌರ್ಜನ್ಯಕ್ಕೆ ಗುರಿಯಾಗುತ್ತಿದ್ದಾರೆ ಎಂಬುದೂ ಈ ಪ್ರಕರಣದಿಂದ ವ್ಯಕ್ತ. ಹೀಗಾಗಿ ಈ ವಿಚಾರದಲ್ಲಿ ಸಮಾಜದ ಸಂವೇದನಾಶೀಲತೆ ಹೆಚ್ಚಾಗಬೇಕು. ಮತ್ತೆ ಇಂತಹ ಘಟನೆಗಳು ನಡೆಯದಂತೆ ಎಚ್ಚರ ವಹಿಸಬೇಕಾದದ್ದು ಅವಶ್ಯ. ಮಕ್ಕಳನ್ನು ಶಾಲೆಗೆ ಕಳುಹಿಸಿದ ಪೋಷಕರಿಗೆ ಯಾವುದೇ ಭೀತಿ ಹಾಗೂ ಅಭದ್ರತೆಯ ಭಾವ ಇಲ್ಲದಂತಹ ಸ್ಥಿತಿ ಸೃಷ್ಟಿಯಾಗಬೇಕು. ಶಾಲಾ ಅವಧಿಯಲ್ಲಿ ತಮ್ಮ ಸುಪರ್ದಿಯಲ್ಲಿ ಇರುವ ಮಕ್ಕಳ ಸುರಕ್ಷತೆಯ ಹೊಣೆಯನ್ನು ಶಾಲಾ ಆಡಳಿತ ವರ್ಗ ಹೊರಬೇಕು. ಈ ಬಗ್ಗೆ ಶಾಲಾ ಆಡಳಿತ ವರ್ಗ ಉತ್ತರದಾಯಿಯಾಗಿರಬೇಕಾದುದೂ ಅಗತ್ಯ.