ಧರಣಿಗೆ ವ್ಯಾಪಕ ಬೆಂಬಲ

ಶಿವಾಪುರ ಗ್ರಾಮದ ಜನರು ಜಾಂಜ್ ಪಥಕ್ ವಾದ್ಯದೊಂದಿಗೆ ವಿವಿಧ ಕಸರತ್ತುಗಳನ್ನು ಮಾಡುತ್ತಾ ಧರಣಿ ಸ್ಥಳ ತಲುಪಿದ್ದು ವಿಶೇಷವಾಗಿತ್ತು.‘ಮೂಡಲಗಿ ತಾಲ್ಲೂಕು ಆಗಲೇ ಬೇಕು’ ‘ತಾಲ್ಲೂಕು ಆಗುವವರೆಗೆ ಹೋರಾಟ’ ಎಂದು ಘೋಷಣೆಗಳನ್ನು ಹಾಕಿದರು. ಕ್ರಾಂತಿಕಾರಕ ಹಾಡುಗಳನ್ನು ಹಾಡುವ ಮೂಲಕ ಕಲಾವಿದರು ಪ್ರತಿಭಟನೆ ವ್ಯಕ್ತಪಡಿಸಿದರು.

ಕರ್ನಾಟಕ ರಾಜ್ಯ ರೈತ ಸಂಘ ಮತ್ತು ರೈತ ಸೇನೆಯ ನೂರಾರು ಸದಸ್ಯರು ಹಸಿರು ಟವಲ್‌ಗಳನ್ನು ಗಾಳಿಯಲ್ಲಿ ಬೀಸುತ್ತಾ ನಡೆಸಿದ ಪ್ರತಿಭಟನೆಯು ಗಮನ ಸೆಳೆಯಿತು.
ಮೂಡಲಗಿ ತಾಲ್ಲೂಕು ಆಗುವ ವರೆಗೆ ನಿರಂತರ ಬೆಂಬಲ ಇರುತ್ತದೆ ಎಂದು ತಾಲ್ಲೂಕು ಹೋರಾಟ ಸಮಿತಿ ಅವರಿಗೆ ಶಿವಾಪುರ ಗ್ರಾಮದ ಮಾಜಿ ತಾಲ್ಲೂಕು ಪಂಚಾಯ್ತಿ ಸದಸ್ಯ ಕೆಂಪಣ್ಣ ಮುಧೋಳ, ತಾಲ್ಲೂಕು ಪಂಚಾಯ್ತಿ ಸದಸ್ಯ ಶಿವಬಸು ಜುಂಜರ ವಾಡ, ಸಿದಗೌಡ ಪಾಟೀಲ, ಬಸವರಾಜ ಸಾಯನ್ನವರ, ಟಿಎಪಿಎಂಸಿ ನಿರ್ದೇಶಕ ಈಶ್ವರ ಬೆಳಗಲಿ, ದುಂಡಯ್ಯ ಹಿರೇಮಠ, ಗ್ರಾಮ ಪಂಚಾಯ್ತಿ ಅಧ್ಯಕ್ಷ ಶೇಖರ ರಡ್ಡೇರಟ್ಟಿ, ನಾಗಪ್ಪ ಬೆಳಗಲಿ ಮನವಿ  ಅರ್ಪಿಸಿದರು.

ಶಾಸಕರು ಎಷ್ಟೇ ಭರವಸೆ, ಆಣೆ ಗಳನ್ನು ಮಾಡಿದರೂ ಸಹ ತಾಲ್ಲೂಕು ಅದೇಶ ಪ್ರತಿಯು ಕೈಸೇರಿದ ಮೇಲೆ  ಧರಣಿ, ಹೋರಾಟ ನಿಲ್ಲುತ್ತದೆ. ಅಲ್ಲಿಯ ವರೆಗೆ ಧರಣಿ ಮುಂದುವರಿಯುವುದು ಎಂದು ಘೋಷಿಸಿಸಿದರು.

ಧರಣಿಯ ವೇದಿಕೆಯ ಮುಂದೆ ಅಪಾರ ಸಂಖ್ಯೆಯಲ್ಲಿ ರಸ್ತೆಯ ಮೇಲೆ ಕುಳಿತಿದ್ದರಿಂದ ಕೆಲ ಹೊತ್ತು ವಾಹನಗಳ ಸಂಚಾರಕ್ಕೆ ಅಡೆತಡೆಯಾಯಿತು. ಪೊಲೀಸರು ಸಂಚಾರ ನಿಯಂತ್ರಿಸಲು ಹರ ಸಾಹಸ ಪಡಬೇಕಾಯಿತು.

ಹಳ್ಳೂರಿನ ಅಲ್ಲಮಪ್ರಭು ಸ್ವಾಮೀಜಿ, ಕಲ್ಲೋಳಿಯ ಈರಪ್ಪ ಬೆಳಕೂಡ, ಲಖನ್ ಸವಸುದ್ದಿ, ಅವರಾದಿಯ ರಮೇಶ ಉಟಗಿ ಅವರು ಸಚಿವ ರಮೇಶ ಜಾರಕಿಹೊಳಿ ಅವರ ಪತ್ರಿಕಾ ಹೇಳಿಕೆಯನ್ನು ಖಂಡಿಸಿದರು. ಸಾಮಾಜಿಕ ಕಾರ್ಯಕರ್ತೆ ಎಂ.ವಿ. ಆಶ್ರಿತ್‌, ನಿರ್ಮಲಾ ಹಿರೇಮಠ, ಸುಜಾತಾ ಹಿರೇಮಠ ಭಾಗವಹಿಸಿದ್ದರು.