ನವದೆಹಲಿ: ಬಾಲಿವುಡ್ ಆ್ಯಕ್ಷನ್ ಕಿಂಗ್ ಅಜಯ್ ದೇವಗನ್ ಅಭಿನಯದ ತಮಾಷೆ ಮಿಶ್ರಿತ ಹಾರರ್ ಗೋಲ್‌ಮಾಲ್ ಅಗೇನ್ ಸಿನಿಮಾದ ಟ್ರೇಲರ್ ಬಿಡುಗಡೆಯಾಗಿದ್ದು, ಕೇವಲ 24 ಗಂಟೆಗಳಲ್ಲಿ 2 ಕೋಟಿ ಜನರು ವೀಕ್ಷಿಸಿದ್ದಾರೆ.
ಮೂರು ನಿಮಿಷಗಳ ಕಾಲ ಜನರಲ್ಲಿ ನಗುವಿನ ಬುಗ್ಗೆ ಎಬ್ಬಿಸುವ ಈ ಟ್ರೇಲರ್‌ನ್ನು ಮುಂಬೈನಲ್ಲಿ ಬಿಡುಗಡೆ ಮಾಡಲಾಗಿದೆ. ರೋಹಿತ್ ಶೆಟ್ಟಿ ಈ ಸಿನಿಮಾದ ನಿರ್ಮಾಪಕರು ಹಾಗೂ ನಿರ್ದೇಶಕರು.
ರೋಹಿತ್ ಶೆಟ್ಟಿ ನಿರ್ಮಾಣದ ಟ್ರೇಲರ್ ಪ್ರಾರಂಭದಿಂದಲೂ ಭಯ ಮಿಶ್ರಿತ ಹಾಗೂ ತಮಾಷೆಯಿಂದಲೂ ಕೂಡಿದ್ದು, ಸಾಮಾಜಿಕ ಜಾಲತಾಣಗಳಾದ ಯೂಟ್ಯೂಬ್ ಹಾಗೂ ಫೇಸ್‌ಬುಕ್‌ನಲ್ಲಿ ಹೊಸ ಅಲೆ ಎಬ್ಬಿಸಿದೆ. ಈ ಮೂಲಕ ಸಿನಿಮಾ ರಂಗದಲ್ಲಿ ಹೊಸ ದಾಖಲೆ ನಿರ್ಮಿಸಿದೆ.
ಅಜಯ್ ದೇವಗನ್, ತುಷಾರ್ ಕಪೂರ್, ಶ್ರೇಯಸ್ ತಲ್ಪಾಡೆ, ಕುನಾಲ್ ಕೆಮು, ಪರಿಣಿತಿ ಚೋಪ್ರಾ, ಪ್ರಕಾಶ್ ರಾಜ್ ಮತ್ತು ನೇಲ್ ನಿತಿನ್ ಮುಖೇಶ್ ತಾರಾಗಣದಲ್ಲಿದ್ದಾರೆ. ದೀಪಾವಳಿ ಸಂದರ್ಭದಲ್ಲಿ ಅಕ್ಟೋಬರ್ 20ರಂದು ಈ ಸಿನಿಮಾ ತೆರೆ ಕಾಣಲಿದೆ.
ಈ ಸಿನಿಮಾಕ್ಕೆ ಜಮೋನ್ ಟಿ ಜಾನ್ ಅವರ ಕ್ಯಾಮರ ಕೈಚಳಕವಿದೆ. ಅಮಲ್ ಮಲ್ಲಿಕ್, ಎಸ್.ತಮನ್, ಡಿಜೆ ಚೇತಸ್, ಅಭಿಷೇಕ್ ಅರೋರಾ, ನುಕ್ಲೇಯಾ ಅವರ ಸಂಗೀತ ಈ ಸಿನಿಮಾಕ್ಕಿದೆ.
