ಮಿತಿಮೀರಿದ ನಾಯಿಗಳ ಹಾವಳಿ

ಖಾಸಗಿ ಬಸ್ಟ್ಯಾಂಡ್, ಬನಶಂಕರಿ ಬಡಾವಣೆ, ಮಹಾಲಕ್ಷ್ಮಿ ಬಡಾವಣೆ, ಕುರುಬರ ಹಳ್ಳಿ ರಸ್ತೆ ಭಾಗದಲ್ಲಿ ನಾಯಿಗಳ ಹಾವಳಿ ಹೆಚ್ಚಾಗಿದೆ. ಖಾಸಗಿ ಬಸ್‌ಸ್ಟ್ಯಾಂಡ್‌ ಪಕ್ಕ ಇರುವ ಕೋಳಿ ಅಂಗಡಿಗಳ ಸಮಚ್ಛಯವೇ ಇದಕ್ಕೆ ಕಾರಣ. ಕೋಳಿ ವ್ಯಾಪಾರಿಗಳು ಕೋಳಿ ತ್ಯಾಜ್ಯವನ್ನು ಪಕ್ಕದಲ್ಲೇ ಇರುವ ಪಾಳು ಬಾವಿಗೆ ಹಾಕುತ್ತಿದ್ದು, ನಾಯಿಗಳು ಅಲ್ಲಿ ಜಮಾಯಿಸುತ್ತವೆ. ಮಾಂಸದ ರುಚಿ ಕಂಡಿರುವ ನಾಯಿಗಳು ಮನುಷ್ಯರು ಹಾಗೂ ಸಾಕು ಪ್ರಾಣಿಗಳ ಮೇಲೆ ಎರಗುತ್ತಿವೆ ಎಂಬುದು ಸಾರ್ವಜನಿಕರ ಆರೋಪ.

ಈ ಕುರಿತ ಪುರಸಭೆ ಸದಸ್ಯ ಮಾತನಾಡಿ, ‘ಕೋಳಿ ಮಾರುಕಟ್ಟೆ ಪಟ್ಟಣದ ಹೃದಯಭಾಗವಾದ ಖಾಸಗಿ ಬಸ್‌ಸ್ಟ್ಯಾಂಡ್‌ ಬಳಿ ಇರುವುದು ಸಾರ್ವಜನಿಕರಿಗೆ ತೊಂದರೆಯಾಗುತ್ತಿದೆ. ಸುತ್ತಮುತ್ತಲಿನ ಬಡಾವಣೆಗಳಿಗೆ ಕೋಳಿ ತ್ಯಾಜ್ಯದಿಂದ ತೊಂದರೆಯಾಗುತ್ತಿದೆ.

ನಾಯಿಗಳ ಹಾವಳಿಗೂ ಕಾರಣವಾಗುತ್ತಿದೆ ಎಂಬ ದೂರುಗಳು ಬಂದಿವೆ. ಕೋಳಿ ಮಾರಾಟ ಮಳಿಗೆಗಳು ಖಾಸಗಿ ಜಾಗದಲ್ಲಿ ಇರುವುದರಿಂದ ಪುರಸಭೆ ವತಿಯಿಂದ ಕ್ರಮ ಕೈಗೊಳ್ಳಲು ಸಾಧ್ಯವಾಗುತ್ತಿಲ್ಲ. ಸಾಮೂಹಿಕ ಕೋಳಿ ಮಳಿಗೆಗಳನ್ನು ನಿರ್ಮಿಸಲು ಪಟ್ಟಣದ ವ್ಯಾಪ್ತಿಯಲ್ಲಿ ಜಾಗ ಗುರುತಿಸಿಕೊಡುವಂತೆ ಮನವಿ ಮಾಡಲಾಗಿದೆ ಎಂದರು.

ಪುರಸಭೆ ವತಿಯಿಂದ ತ್ಯಾಜ್ಯ ಸಂಗ್ರಹಣಾ ತೊಟ್ಟಿಗಳನ್ನು ಇಡಲಾಗಿದೆ. ಪ್ರತೀ ಅಂಗಡಿಯವರೂ ತ್ಯಾಜ್ಯ ನಿರ್ವಹಣೆಗೆ ನಿತ್ಯ ₹ 10ರಂತೆ ಪುರಸಭೆಗೆ ನೀಡುತ್ತಿದ್ದೇವೆ. ನಿತ್ಯ ಕೋಳಿ ತ್ಯಾಜ್ಯವನ್ನು ವರ್ಗಾಯಿಸಲಾಗುತ್ತದೆ. ಪುರಸಭೆಯವರು ನಿಯಮಿತವಾಗಿ ಕಸ ತೆಗೆಯದೇ ಇರುವುದರಿಂದ ಸಮಸ್ಯೆ ಆಗಿದೆ ಎಂದು ಕೋಳಿ ಅಂಗಡಿ ಮಾಲೀಕರು ದೂರುತ್ತಾರೆ.

ನಾಯಿ ಕಡಿತಕ್ಕೆ ಔಷಧಿ ಇಲ್ಲ: ಪಟ್ಟಣದ ಬಸವೇಶ್ವರ ನಗರದಲ್ಲಿ ಕಳೆದ ಎರಡು ದಿನಗಳ ಹಿಂದೆ ಹುಚ್ಚು ನಾಯಿಯೊಂದು 11ವರ್ಷದ ವೇದ ಎಂಬ ಮಗುವಿಗೆ ಕಡಿದಿದ್ದು, ಪೋಷಕ ಜಯರಾಮ್ ಎಂಬುವರು ಮಗುವನ್ನು ಪಟ್ಟಣದ ಸರ್ಕಾರಿ ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದರು.

ಆದರೆ ಹುಚ್ಚು ನಾಯಿ ಕಡಿದ ಪರಿಣಾಮ ಅದಕ್ಕೆ ಚಿಕಿತ್ಸೆಗೆ ಔಷಧಿ ಇಲ್ಲದೇ ಜಿಲ್ಲಾ ಆಸ್ಪತ್ರೆಗೆ ಕರೆದುಕೊಂಡು ಹೋಗುವಂತೆ ಪಟ್ಟಣದ ಸಾರ್ವಜನಿಕ ಆಸ್ಪತ್ರೆಯ ವೈದ್ಯರು ಬರೆದುಕೊಟ್ಟಿದ್ದಾರೆ. ಅದರಂತೆ ಮಗುವನ್ನು ಜಿಲ್ಲಾ ಆಸ್ಪತ್ರೆಯಲ್ಲಿ ದಾಖಲಿಸಿ, ವೈದ್ಯರಿಗೆ ತೋರಿಸಿದಾಗ ಅವರು ಔಷಧಿಯನ್ನು ಖಾಸಗಿ ಔಷಧಿ ಅಂಗಡಿಯಿಂದ ತರುವಂತೆ ತಿಳಿಸಿರುತ್ತಾರೆ. ಪೋಷಕರು ಖಾಸಗಿ ಅಂಗಡಿಯಲ್ಲಿ ₹ 5,287 ಕೊಟ್ಟು ಔಷಧಿಯನ್ನು ತಂದು ಚಿಕಿತ್ಸೆ ಕೊಡಿಸಿದ್ದಾರೆ.