ಮದ್ದೂರು: ನಮ್ಮ ಗ್ರಾಮ ನಮ್ಮ ರಸ್ತೆ ಯೋಜನೆಯಡಿ ತಾಲ್ಲೂಕಿನಾದ್ಯಂತ ಗುಣಮಟ್ಟದ ರಸ್ತೆ ಅಭಿವೃದ್ಧಿ ಕಾಮಗಾರಿಗೆ ಆದ್ಯತೆ ನೀಡಲಾಗಿದೆ ಎಂದು ಶಾಸಕ ಡಿ.ಸಿ.ತಮ್ಮಣ್ಣ ತಿಳಿಸಿದರು. ಸಮೀಪದ ಕುದರಗುಂಡಿ ಗ್ರಾಮದಲ್ಲಿ 23ನೇ ಬ್ಯಾಂಕ್‌ ನಾಲಾ ಮೇಲಿನ ನಾಲಾ ರಸ್ತೆ ಅಭಿವೃದ್ಧಿ ಕಾಮಗಾರಿಗೆ ಸೋಮವಾರ ಭೂಮಿಪೂಜೆ ನೆರವೇರಿಸಿ ಅವರು ಮಾತನಾಡಿದರು.
ಬಹುದಿನಗಳಿಂದ ಈ ನಾಲೆ ರಸ್ತೆ ಹಾಳಾಗಿತ್ತು. ಇಲ್ಲಿನ ರೈತರ ಬೇಡಿಕೆ ಮೇರೆಗೆ ಮೊದಲ ಹಂತದಲ್ಲಿ ಬಿಡುಗಡೆಗೊಂಡ ₹ 10 ಕೋಟಿ ಅನುದಾನದಲ್ಲಿ ಕುದುರಗುಂಡಿಯಿಂದ ರಸ್ತೆ ಅಭಿವೃದ್ಧಿ ಮಾಡಲಾಗುತ್ತಿದ್ದು, ಈ ನಾಲೆಗೆ ₹ 2.4 ಕೋಟಿ ಬಿಡುಗಡೆಗೊಳಿಸಿ ಸುಧಾರಣಾ ಕಾರ್ಯ ಕೈಗೊಳ್ಳಲಾಗುತ್ತಿದೆ ಎಂದರು.
2ನೇ ಹಂತದಲ್ಲಿ ಈ ಯೋಜನೆಯಡಿ ₹ 10 ಕೋಟಿ ಬಿಡುಗಡೆಗೊಂಡಿದ್ದು, ಈ ಅನುದಾನವನ್ನು ಗ್ರಾಮೀಣ ಭಾಗದ ರಸ್ತೆ ಅಭಿವೃದ್ಧಿಗೆ ವಿನಿಯೋಗಿಸಲು ಯೋಜಿಸಿದ್ದೇನೆ ಎಂದು ತಿಳಿಸಿದರು.
ಮಂಡ್ಯ ಜಿಲ್ಲಾ ಹಾಲು ಒಕ್ಕೂಟದ ನಿರ್ದೇಶಕ ಕೆ.ಎಂ.ಉಮೇಶ್, ಉದ್ಯಮಿ ಎಸ್.ಪಿ.ಸ್ವಾಮಿ, ಮುಖಂಡರಾದ ಕೆ.ಎಲ್.ಪ್ರಭು, ಕೆ.ಬಿ.ಸಿದ್ದೇಗೌಡ, ಶಿವರಾಮು, ಕೆ.ಜೆ.ಉಮೇಶ್, ಸತೀಶ್‌, ಸಿದ್ದಪ್ಪ, ರಾಕೇಶ್‌ ಇದ್ದರು.
