ಎನ್‌ಸಿಎಯಲ್ಲಿ ಯುವರಾಜ್ ಸಿಂಗ್‌ ತರಬೇತಿಗೆ ಅಪಸ್ವರ

ರಣಜಿ ಟ್ರೋಫಿ ಕ್ರಿಕೆಟ್ ಪಂದ್ಯಗಳಲ್ಲಿ ಉತ್ತಮ ಆಟವಾಡುವಲ್ಲಿ ವಿಫಲರಾದ ಯುವರಾಜ್‌ ಸಿಂಗ್‌ ಫಿಟ್‌ನೆಸ್ ತರಬೇತಿ ಪಡೆಯಲು ನಿರ್ಧರಿಸಿದ್ದರು. ಆದರೆ ಗಾಯದ ಸಮಸ್ಯೆ ಅಥವಾ ದೈಹಿಕ ತೊಂದರೆ ಕಾಣಿಸಿಕೊಳ್ಳದೇ ಇರುವಾಗ ಎನ್‌ಸಿಎದಲ್ಲಿ ತರಬೇತಿ ಪಡೆಯುವ ಅಗತ್ಯ ಏನಿದೆ ಎಂದು ಬಿಸಿಸಿಐ ಅಧಿಕಾರಿಗಳು ಪ್ರಶ್ನಿಸಿದ್ದಾರೆ.

ಪಂಜಾಬ್‌ ಆಡಿದ ಒಟ್ಟು ಐದು ಪಂದ್ಯಗಳ ಪೈಕಿ ಯುವರಾಜ್ ಒಂದು ಪಂದ್ಯದಲ್ಲಿ  ಆಡಿದ್ದರು. ವಿದರ್ಭ ವಿರುದ್ಧದ ಆ ಪಂದ್ಯದ ಮೊದಲ ಇನಿಂಗ್ಸ್‌ನಲ್ಲಿ 20 ಮತ್ತು ಎರಡನೇ ಇನಿಂಗ್ಸ್‌ನಲ್ಲಿ 42 ರನ್ ಗಳಿಸಿದ್ದರು. ಭಾರತ ತಂಡಕ್ಕೆ ಮರಳುವ ವಿಶ್ವಾಸದಲ್ಲಿರುವ ಅವರು ಐಪಿಎಲ್ ಹರಾಜಿನಲ್ಲೂ ಹೆಚ್ಚು ಮೊತ್ತ ಗಳಿಸುವ ವಿಶ್ವಾಸದಲ್ಲಿದ್ದಾರೆ.

ಬಿಸಿಸಿಐ ಆಯ್ಕೆ ಸಮಿತಿ ರಣಜಿ ಪಂದ್ಯಗಳ ಮೇಲೆ ಕಣ್ಣಿಟ್ಟಿದ್ದು ಯುವರಾಜ್ ಸಿಂಗ್‌ ಅವರಿಗೆ ತರಬೇತಿ ಅಗತ್ಯವಿದೆ ಎಂದು ಪಂಜಾಬ್‌ ತಂಡದವರಿಗೆ ಹೇಳಿದೆ. ಹೀಗಾಗಿ ಅವರು ತರಬೇತಿಗೆ ತೆರಳಿದ್ದಾರೆ ಎಂದು ಹೇಳಲಾಗಿದೆ.