ಅರ್ಹರಿಗೆ ಲಭಿಸುವುದೇ ವಸತಿ ಭಾಗ್ಯ?

ಶಾಸಕರ ಅಧ್ಯಕ್ಷತೆಯಲ್ಲಿ 220 ನಿವೇಶನಗಳ ಆಯ್ಕೆ ಪಟ್ಟಿ ಸಿದ್ಧಗೊಂಡರೂ, ಹಕ್ಕು ಪತ್ರ ಇನ್ನೂ ವಿತರಣೆ ಆಗಿಲ್ಲ. ಕೆಲವು ಫಲಾನುಭವಿಗಳನ್ನು ಹೊರತುಪಡಿಸಿದರೆ ಬಹುತೇಕ ನಿವೇಶನಗಳು ಈಗಾಗಲೇ ಸ್ವಂತ ಮನೆ ಹಾಗೂ ಜಮೀನು ಇದ್ದವರಿಗೆ ಲಭಿಸಿವೆ ಎಂಬ ಆರೋಪ ಕೇಳಿಬರುತ್ತಿದೆ. ಸ್ಥಳೀಯ ನಾಯಕರ ನಡುವಿನ ತಿಕ್ಕಾಟ, ಆಯ್ಕೆ ಪಟ್ಟಿಯಲ್ಲಿ ಅವಕಾಶ ಲಭಿಸದ ಅರ್ಜಿದಾರರ ಆಕ್ರೋಶ, ಜಿಲ್ಲಾಡಳಿತದ ಜಾಣ ಮೌನ ಇವೆಲ್ಲದರ ನಡುವೆ ಅರ್ಹರಿಗೂ ಇದುವರೆಗೆ ವಸತಿ ಭಾಗ್ಯ ಲಭಿಸಿಲ್ಲ.

‘ಈಗಾಗಲೇ ಮನೆ ಇದ್ದವರಿಗೆ ನಿವೇಶನ ನೀಡಬಾರದು. ಈ ಹಿಂದೆ ಸರ್ಕಾರದ ಫಲಾನುಭವಿ ಆಗಿರಬಾರದು ಎಂಬಿತ್ಯಾದಿ ಮಾನದಂಡಗಳನ್ನು ಆಯ್ಕೆ ಪ್ರಕ್ರಿಯೆಯಲ್ಲಿ ಅನುಸರಿಸಿಲ್ಲ. ವಿಧವೆ, ಅಂಗವಿಕಲರನ್ನು ಪರಿಗಣಿಸಿಲ್ಲ. ಪಟ್ಟಣದಲ್ಲಿ ಈ ಹಿಂದೆ ಬಿದ್ದ ಅಕಾಲಿಕ ಮಳೆಯಿಂದಾಗಿ ಕೃಷಿಕರೇ ಹೆಚ್ಚಾಗಿರುವ ಮ್ಯಾಗೇರಿ, ಕೆಳಗೇರಿ ಸೇರಿ ಹಲವೆಡೆ ಮನೆಗಳು ಬಿದ್ದಿದ್ದು, ಅಂತಹ ಮನೆಗಳ ಫಲಾನುಭವಿಗಳಿಗೆ ಈವರೆಗೆ ಪರಿಹಾರ ನೀಡಿಲ್ಲ. ಅಂತಹ ಫಲಾನುಭವಿಗಳನ್ನು ಗುರುತಿಸಿ ನಿವೇಶನ ನೀಡಿದ್ದರೆ ಮನೆಗಳನ್ನಾದರೂ ನಿರ್ಮಿಸಿಕೊಳ್ಳಲು ಅವಕಾಶವಿತ್ತು’ ಎಂದು ಈ ಆಯ್ಕೆ ಪಟ್ಟಿಯಲ್ಲಿ ಸ್ಥಾನ ಪಡೆಯದ, ಹೆಸರು ಬಹಿರಂಗಪಡಿಸಲು ಇಚ್ಚಿಸದ ವ್ಯಕ್ತಿಯೊಬ್ಬರು ಹೇಳಿದರು.

‘ರಾಜೀವಗಾಂಧಿ ನಿವೇಶನ ನೀಡುವ ಪಟ್ಟಿಯಲ್ಲಿ ಅಕ್ರಮ ಹಾಗೂ ಅನ್ಯಾಯ ಆಗಿದೆ. ಆಯ್ಕೆಯಲ್ಲಿ ರಾಜಕೀಯ ಹಾಗೂ ಹಣ ಪ್ರವೇಶವಾಗಿದೆ. ನಿಜವಾದ ಫಲಾನುಭವಿಗಳನ್ನು ಗುರುತಿಸುವಲ್ಲಿ ಸ್ಥಳೀಯ ಆಡಳಿತ ವಿಫಲವಾಗಿದೆ. ಈ ಕುರಿತು ಸಮಗ್ರ ತನಿಖೆ ಆಗಬೇಕು. ಜಿಲ್ಲಾಡಳಿತ ಕಣ್ತೆರೆದು ನೋಡಬೇಕು’ ಎಂದು ಪಟ್ಟಣದ ಪಕ್ಕಣ್ಣ ಕಬಾಡ್ರ ಹಾಗೂ ನಾಗರಾಜ ತಳವಾರ ಆಗ್ರಹಿಸಿದರು.

* * 

ರಾಜೀವ ಗಾಂಧಿ ವಸತಿ ಯೋಜನೆಯಡಿ ಭೂಮಿ ಖರೀದಿಸಲಾಗಿದ್ದು, ಶೀಘ್ರವೇ ಅರ್ಹ ಫಲಾನುಭವಿಗಳಿಗೆ ನಿವೇಶನ ಹಂಚಿಕೆ ಮಾಡಲಾಗುವುದು
ರಾಮಕೃಷ್ಣ ದೊಡ್ಡಮನಿ
ಶಾಸಕ

220 ನಿವೇಶನಗಳ ಫಲಾನುಭವಿಗಳಿಗೆ ಡಿ. 25 ರಂದು ಮುಖ್ಯಮಂತ್ರಿಗಳ ಸಮ್ಮುಖದಲ್ಲಿ ಹಕ್ಕುಪತ್ರ ವಿತರಣೆ ಮಾಡುವ ಎಲ್ಲ ತಾಂತ್ರಿಕ ಪ್ರಯತ್ನಗಳು ಪ್ರಗತಿಯಲ್ಲಿವೆ.
ಶೋಭಾ ಬೆಳ್ಳಿಕೊಪ್ಪ, ಪಟ್ಟಣ ಪಂಚಾಯ್ತಿ ಮುಖ್ಯಾಧಿಕಾರಿ