ಬೀಜಿಂಗ್: ಬಹುಮಹಡಿ ಕಟ್ಟಡದಲ್ಲಿ ಸಂಭವಿಸಿದ ಬೆಂಕಿ ಅವಘಡದಲ್ಲಿ ಸಿಲುಕಿದ ವ್ಯಕ್ತಿಯೊಬ್ಬ ಪವಾಡ ಸದೃಶ ರೀತಿಯಲ್ಲಿ ಸಾವಿನ ದವಡೆಯಿಂದ ಪಾರಾದ ಘಟನೆ ಇಲ್ಲಿ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ.
ಆ ವ್ಯಕ್ತಿ ಜೀವ ಉಳಿಸಿಕೊಳ್ಳಲು ಹೋರಾಟ ನಡೆಸಿದ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
23 ಮಹಡಿಯ ಕಟ್ಟಡದಲ್ಲಿ ಡಿ.13ರಂದು ಬೆಂಕಿ ಅವಘಡ ಸಂಭವಿಸಿದೆ. ಈ ವೇಳೆ ಇದರಲ್ಲಿ ಸಿಲುಕಿದ ವ್ಯಕ್ತಿಯೊಬ್ಬ ಪಾರಾಗಲು ಯತ್ನಿಸಿದ್ದಾನೆ. ಆಗ ಅವರ ಮೇಲೆ ಬೆಂಕಿಯ ಉಂಡೆಗಳು ಬೀಳಲಾರಂಭಿಸಿದವು.
ಇದರಿಂದ ಧೃತಿಗೆಡದ ವ್ಯಕ್ತಿಯು ಬೆಂಕಿ ಕಾಣಿಸಿಕೊಂಡ ಮಹಡಿಯ ಕೆಳಗಿನ ಮಹಡಿಯ ಗಾಜಿನ ಕಿಟಕಿಯನ್ನು ಕಾಲಿನಿಂದ ಒದ್ದು ಒಡೆಯಲು ಪ್ರಯತ್ನಿಸಿದ್ದಾರೆ. ಆದರೆ ಒಡೆಯಲು ಸಾಧ್ಯವಾಗಲಿಲ್ಲ. ಈ ಸಂದರ್ಭದಲ್ಲಿ ಬಿದ್ದ ಬೆಂಕಿಯ ಉಂಡೆಗಳಿಂದ ಸಣ್ಣ ಪುಟ್ಟ ಗಾಯಗಳಾಗಿವೆ.
ಘಟನಾ ಸ್ಥಳಕ್ಕೆ ದೌಡಾಯಿಸಿದ ಅಗ್ನಿ ಶಾಮಕ ಸಿಬ್ಬಂದಿ ಮಹಡಿಯ ಗಾಜಿನ ಕಿಟಕಿಯನ್ನು ಒಡೆದು ವ್ಯಕ್ತಿಯನ್ನು ಒಳಗೆಳೆದುಕೊಂಡು ರಕ್ಷಣೆ ಮಾಡಿದ್ದಾರೆ. ಪ್ರಾಣ ಉಳಿಸಿಕೊಳ್ಳಲು ಹೋರಾಡುವ ವೇಳೆ ಗಾಯಗಳಾಗಿವೆ. ಆದ ಕಾರಣ ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ಯಾಹೂ ವರದಿ ಮಾಡಿದೆ.
