ಮುಂಬೈ: ಬಾಲಿವುಡ್ ನಟ ಇರ್ಫಾನ್ ಖಾನ್ ಅವರು ಜಿಯೋ ಫಿಲ್ಮ್ಫೇರ್ ಅವಾರ್ಡ್–2018ರ ಅತ್ಯುತ್ತಮ ನಟ ಪ್ರಶಸ್ತಿ ಪಡೆದುಕೊಂಡಿದ್ದಾರೆ. ಫೆಮಿನಾ ಇಂಡಿಯಾ ಇರ್ಫಾನ್ ಅವರನ್ನು ಅಭಿನಂದಿಸುವ ಅವಸರದಲ್ಲಿ ಕ್ರಿಕೆಟಿಗ ಇರ್ಫಾನ್ ಪಠಾಣ್ ಅವರ ಟ್ವಿಟರ್ ಖಾತೆಯನ್ನು ಟ್ಯಾಗ್ ಮಾಡಿ ಶುಭ ಕೋರಿದೆ.
ಹಿಂದಿ ಮೀಡಿಯಂ ಚಿತ್ರದಲ್ಲಿನ ಅಭಿನಯಕ್ಕಾಗಿ ಇರ್ಫಾನ್ ಖಾನ್ ಅವರಿಗೆ ಭಾನುವಾರ ರಾತ್ರಿ ಈ ಪ್ರಶಸ್ತಿ ಲಭಿಸಿದ್ದು, ಈ ಕುರಿತು ಟ್ವಿಟರ್ನಲ್ಲಿ ಶುಭಾಶಯ ಕೋರಲು ಮಂದಾದ ನಿಯತಕಾಲಿಕೆ ಬಾಲಿವುಡ್ ನಟನ ಬದಲಿಗೆ ಭಾರತ ಕ್ರಿಕೆಟ್ ತಂಡದ ವೇಗದ ಬೌಲರ್ ಅನ್ನು ಟ್ಯಾಗ್ ಮಾಡಿ ಯಡವಟ್ಟು ಮಾಡಿದೆ.
ಈ ಕುರಿತು ಪ್ರತಿಕ್ರಿಯಿಸಿರುವ ಪಠಾಣ್, ‘ಧನ್ಯವಾದಗಳು ಹಾಗೂ ಕ್ಷಮೆಯಿರಲಿ. ನಾನು ಅಲ್ಲಿಗೆ ಬರಲಾಗದು. ನನಗೆ ನೀಡುವುದಾದರೆ ನೀವು ನನ್ನ ಮನೆಗೆ ಪ್ರಶಸ್ತಿ ಕಳುಹಿಸಿಕೊಡಬಹುದು’ ಎಂದು ಟ್ವೀಟ್ ಮಾಡಿದ್ದಾರೆ.
Thank u n sorry I couldn’t make it but u can send the award to me at my home ;);)