‘ಮಿಂಚಿನ ನೋಂದಣಿ’ಗೆ ಉತ್ತಮ ಸ್ಪಂದನೆ

ನಗರದಲ್ಲಿ ಬೆಳಿಗ್ಗೆ 10ರಿಂದ ಸಂಜೆ 5ರವರೆಗೆ ನಡೆದ ಈ ಅಭಿಯಾನದಲ್ಲಿ ವಿವಿಧ ಸರ್ಕಾರಿ ಶಾಲೆಗಳಲ್ಲಿ ನಾಗರಿಕರು ಹೆಸರು ನೋಂದಾಯಿಸಿದರು. ಹೊಸ ಮತದಾರರು ತಮ್ಮ ದಾಖಲಾತಿಗಳೊಂದಿಗೆ ನಮೂನೆ 6ರಲ್ಲಿ ಭರ್ತಿ ಮಾಡಿ ಸಲ್ಲಿಸಿದರು. ಬೇರೆ ಕ್ಷೇತ್ರಗಳಿಂದ ಹೆಸರು ವರ್ಗಾವಣೆಗೊಳಿಸುವವರೂ ಇದೇ ನಮೂನೆಯ ಮೂಲಕ ಅರ್ಜಿ ಸಲ್ಲಿಸಬೇಕಿತ್ತು. ತಮ್ಮ ಹಿಂದಿನ ಕ್ಷೇತ್ರದಲ್ಲಿ ಹೆಸರು ರದ್ದುಪಡಿಸಿದ ಅರ್ಜಿ ಸಮೇತ (ನಮೂನೆ 7) ನಮೂನೆ 6ರಲ್ಲಿ ಅರ್ಜಿ ಸಲ್ಲಿಸಿದರು.

ಸಾಕಷ್ಟು ಗೊಂದಲ: ಮತದಾರರ ಪಟ್ಟಿಯಲ್ಲಿರುವ ಹೆಸರು ತಿದ್ದುಪಡಿಗೂ ಅವಕಾಶ ಇದ್ದ ಕಾರಣ ಮತದಾರರ ಪಟ್ಟಿಯಲ್ಲಿ ಹೆಸರು ಹುಡುಕುವುದು ಅಗತ್ಯವಾಗಿತ್ತು. ಆದರೆ, ಮತದಾರರ ಪಟ್ಟಿಯಲ್ಲಿ ಹಲವರ ಹೆಸರು ಇರಲಿಲ್ಲ. ಅಲ್ಲದೇ, ಮತಗಟ್ಟೆಗಳನ್ನು ಹುಡುಕುವುದೇ ಗೊಂದಲವಾಯಿತು. ಯಾವ ಮತಗಟ್ಟೆಗೆ ತೆರಳಿದರೂ ಅಧಿಕಾರಿಗಳಿಂದ ‘ಇನ್ನೊಂದು ಮತಗಟ್ಟೆಯಲ್ಲಿ ಹುಡುಕಿ’ ಎಂಬ ಉತ್ತರವೇ ಸಿಗುತ್ತಿತ್ತು.

ಅನೇಕ ಮತದಾರರು ಈ ಮಾಹಿತಿಯೇ ಸಿಗದೇ ವಾಪಸಾದರು. ಹಲವು ಶಾಲೆಗಳಲ್ಲಿ ಹಳೆಯ ಮತದಾರರ ಪಟ್ಟಿಯನ್ನೇ ಇರಿಸಿಕೊಂಡಿದ್ದರು. ಅಧಿಕಾರಿಗಳು ‘ಈ ಪಟ್ಟಿಯಲ್ಲಿ ಹುಡುಕಲೇಬೇಡಿ. ಇವು ಹಳೆಯ ಪಟ್ಟಿಗಳು‘ ಎಂದು ಜನರಿಗೆ ಹೇಳಿ ಕಳುಹಿಸುತ್ತಿದ್ದರು!

ಕೆಲವೆಡೆ ಮಧ್ಯಾಹ್ನ 12ರ ನಂತರವೂ ಶಾಲೆಗಳಲ್ಲಿ ಅಧಿಕಾರಿಗಳು ಬಾರದೇ ಇದ್ದ ಕಾರಣಕ್ಕೆ ನಾಗರಿಕರು ಪರದಾಡಬೇಕಾಯಿತು. ಹಲವರು
ಖಾಲಿ ಶಾಲೆಯನ್ನು ಕಂಡು ವಾಪಸಾದರು.

ರಾಜಕಾರಣಿಗಳಿಂದಲೂ ಅಭಿಯಾನ: ಹಲವು ರಾಜಕಾರಣಿಗಳು ಮನೆಗಳಿಗೆ ತೆರಳಿ ಮತದಾರರ ಪಟ್ಟಿಗೆ ಹೆಸರು ಸೇರಿಸಿಕೊಳ್ಳುವಂತೆ ಮನವಿ ಮಾಡಿದರು. ಬಿಜೆಪಿ ಮುಖಂಡ ಎಸ್‌.ಎ.ರಾಮದಾಸ್, ಜೆಡಿಎಸ್‌ನ ಕೆ.ವಿ.ಮಲ್ಲೇಶ್‌ ಇತರರು ಮತ ಹಾಕುವಂತೆ ಮನವಿ ಮಾಡಿದರು.