ಬೆಂಗಳೂರು: ನಗರದ ನಿವಾಸಿ ಹರೀಶ್ ಎಂಬುವರಿಗೆ ಫೇಸ್ಬುಕ್ನಲ್ಲಿ ಪರಿಚಯವಾಗಿದ್ದ ಯುವತಿಯೊಬ್ಬಳು, ₹14.28 ಲಕ್ಷ ಪಡೆದುಕೊಂಡು ವಂಚಿಸಿದ್ದಾಳೆ.
ಈ ಸಂಬಂಧ ಸೈಬರ್ ಕ್ರೈಂ ಠಾಣೆಗೆ ಹರೀಶ್ ದೂರು ನೀಡಿದ್ದಾರೆ.
‘ರೋಸ್ ಸ್ಯಾಂಟೋಸ್ ಎಂಬಾಕೆ ಕೆಲ ತಿಂಗಳ ಹಿಂದೆ ಫೇಸ್ಬುಕ್ನಲ್ಲಿ ಫ್ರೆಂಡ್ ರಿಕ್ವೆಸ್ಟ್ ಕಳುಹಿಸಿದ್ದಳು. ಅದನ್ನು ಸ್ವೀಕರಿಸಿದ್ದೆ. ಆ ನಂತರ, ಆಕೆ ನನ್ನೊಂದಿಗೆ ಚಾಟಿಂಗ್ ಮಾಡಲಾರಂಭಿಸಿದ್ದಳು’ ಎಂದು ದೂರಿನಲ್ಲಿ ಹರೀಶ್ ಹೇಳಿದ್ದಾರೆ.
‘ಹರ್ಬಲ್ ಆಯಿಲ್ ವ್ಯಾಪಾರ ಮಾಡುವುದಾಗಿ ಹೇಳಿದ್ದ ಆಕೆ, ನನ್ನನ್ನು ಪಾಲುದಾರನನ್ನಾಗಿ ಮಾಡಿಕೊಳ್ಳುವುದಾಗಿ ತಿಳಿಸಿದ್ದಳು. ವ್ಯಾಪಾರ ಆರಂಭಿಸಲು ಹಣ ಬೇಕೆಂದು ನನ್ನಿಂದ ₹14.28 ಲಕ್ಷ ಪಡೆದಿದ್ದಳು. ಆ ನಂತರ, ಚಾಟಿಂಗ್ ಮಾಡುವುದನ್ನೇ ನಿಲ್ಲಿಸಿದ್ದಾಳೆ’ ಎಂದು ತಿಳಿಸಿದ್ದಾರೆ.