‘ನಗರದಲ್ಲಿ 29 ಕಡೆ ಸ್ಕೈವಾಕ್‌’ ಎಂಬ ವರದಿ (ಪ್ರ.ವಾ., ಮಾ. 1) ಕುರಿತು ಪ್ರತಿಕ್ರಿಯೆ. ಬೆಂಗಳೂರಿನ ಹೆಬ್ಬಾಳ– ಕೆಂಪಾಪುರ ಜಂಕ್ಷನ್‌ನಲ್ಲಿ 15 ದಿನಗಳಲ್ಲಿ ಸ್ಕೈವಾಕ್‌ ನಿರ್ಮಾಣಕ್ಕೆ ಚಾಲನೆ ನೀಡಲು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ಒಪ್ಪಿಗೆ ಸೂಚಿಸಿರುವುದಾಗಿ ವರದಿಯಾಗಿದೆ. ನಗರಗಳಲ್ಲಿ ಕೆಲವೆಡೆ ಸ್ಕೈವಾಕ್‌ಗಳು ನಿರ್ಮಾಣಗೊಂಡಿವೆ.
ಬಹುತೇಕ ಇಂತಹ ಸ್ಕೈವಾಕ್‌ಗಳನ್ನು ಪಾದಚಾರಿಗಳು ಉಪಯೋಗಿಸುತ್ತಿಲ್ಲ. ಸ್ಕೈವಾಕ್‌ ನಿರ್ಮಾಣ ಪ್ರಸ್ತಾಪಿಸುತ್ತಿರುವವರಿಗೆ ಇಂತಹ ಉಪಯೋಗಿಸದಿರುವ ಸ್ಕೈವಾಕ್‌ಗಳು ಕಣ್ಣಿಗೆ ಬೀಳುವುದಿಲ್ಲವೇ? ಯುವಕರು ಕೂಡ ಅಷ್ಟು ಎತ್ತರದ ಎತ್ತರಿಸಿದ ಪಾದಚಾರಿ ಮಾರ್ಗಗಳನ್ನು ಬಳಸುವುದಿಲ್ಲ. ಮಹಿಳೆಯರು, ಮಕ್ಕಳು, ಹಿರಿಯ ನಾಗರಿಕರು, ಅಂಗವಿಕಲರು ಈ ಸ್ಕೈವಾಕ್‌ಗಳನ್ನು ಹತ್ತಿ ಇಳಿಯುವರೆಂದು ಭಾವಿಸಲಾದೀತೆ? ಅದರಲ್ಲೂ ಸಾಮಾನು–ಸರಂಜಾಮು ಇದ್ದರಂತೂ ಕೇಳುವಂತೆಯೇ ಇಲ್ಲ. ಈ ಸ್ಕೈವಾಕ್‌ಗಳಿಗೆ ಲಿಫ್ಟ್‌ಗಳನ್ನು ಜೋಡಿಸಿದರೂ ಅವುಗಳು ದುರಸ್ತಿಗೆ ಒಳಪಟ್ಟರೆ ಹಾಗೂ ಚಾಲಕರಿಲ್ಲದೇ ಇದ್ದಲ್ಲಿ ತೊಂದರೆ ತಪ್ಪಿದ್ದಲ್ಲ. ನಿರ್ವಹಣೆಯ ಖಾತ್ರಿ ಇರುವುದಿಲ್ಲ.
ಸುರಂಗಮಾರ್ಗ ನಿರ್ಮಿಸಿದಲ್ಲಿ ಪಾದಚಾರಿಗಳಿಗೆ ತೊಂದರೆ ಆಗುವುದಿಲ್ಲ. ಇದರ ಸ್ವಚ್ಛತೆಯನ್ನು ಕಾಪಾಡುವಂತೆ, ಆ ಬಡಾವಣೆಯ ಪೌರಕಾರ್ಮಿಕರಿಗೆ ಸೂಚಿಸಬೇಕು. ರಾತ್ರಿ ವೇಳೆ ಎರಡೂ ಕಡೆಯ ಕಬ್ಬಿಣ ಸರಳುಗಳ ಬಾಗಿಲುಗಳನ್ನು ಮುಚ್ಚುವ ಕೆಲಸ ಆಗಬೇಕು. ಪಾದಚಾರಿಗಳಿಗೆ ಓಡಾಡಲು ಸ್ಕೈವಾಕ್‌ಗಿಂತ ಸುರಂಗ ಮಾರ್ಗವೇ ಲೇಸು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.