ತೂಕ ಕಳೆದುಕೊಳ್ಳುವ ಹೊಸ ರೂಲು

ತೂಕ ಕಡಿಮೆ ಮಾಡಿಕೊಳ್ಳಲು ಸಾವಿರಾರು ವಿಧಾನಗಳಿವೆ ಎಂದು ಸಂಶೋಧಕ ಹಾಗೂ ಕಾರ್ನೆಲ್‌ ವಿಶ್ವವಿದ್ಯಾಲಯದಲ್ಲಿ ಪೌಷ್ಟಿಕತೆ ಹಾಗೂ ಮನಃಶಾಸ್ತ್ರ ವಿಭಾಗದ ಪ್ರೊಫೆಸರ್‌ ಡೇವಿಡ್‌ ಲೆವೆಸ್ಕಿ ಹೇಳುತ್ತಾರೆ. ಮೂಲತಃ ತೂಕ ಕಡಿಮೆ ಮಾಡಿಕೊಳ್ಳುವುದು ಸಮಸ್ಯೆಯೇ ಆಗಿರುವುದಿಲ್ಲ. ಬೇಗನೆ ತೂಕ ಕಳೆದುಕೊಳ್ಳಬಹುದು. ಆದರೆ ಕಡಿಮೆ ಮಾಡಿಕೊಂಡ ತೂಕದ ಪ್ರಮಾಣವನ್ನು ಮುಂದುವರೆಸುವುದಿದೆಯಲ್ಲ, ಅದು ಸವಾಲು ಎನ್ನುತ್ತಾರೆ ಇವರು.

ತೂಕ ಕಡಿಮೆ ಮಾಡಿಕೊಳ್ಳುವ ಸಮಯದಲ್ಲಿ ನಾವು ಸೇವಿಸುವ ಆಹಾರದ ಪೌಷ್ಟಿಕಾಂಶ, ಪ್ರಮಾಣ ಸಹ ಅಷ್ಟೇ ಮುಖ್ಯವಾಗಿರುತ್ತದೆ. ಅದೂ ಅಲ್ಲದೆ ದಿನನಿತ್ಯ ತೂಕವನ್ನು ಅಳತೆ ಮಾಡಿಕೊಳ್ಳುವುದು  ತೂಕ ಹೆಚ್ಚುವುದನ್ನು ತಡೆಯುವ ಅತಿ ಪರಿಣಾಮಕಾರಿ ಮಾರ್ಗ ಎಂದು ಟಿಪ್ಸ್ ಕೂಡ ನೀಡಿದ್ದಾರೆ. ಈ ರೀತಿ ಮಾಡುವುದರಿಂದ ಅವರನ್ನು ಹೆಚ್ಚೆಚ್ಚು ತಿನ್ನಲು ಪ್ರೇರಣೆ ಸಿಗುವುದಿಲ್ಲವಂತೆ.

ತೂಕ ಕಡಿಮೆ ಮಾಡಿಕೊಂಡ ನಂತರ ಹಿಂದಿನ ಆಹಾರ ಶೈಲಿಗೆ ಹೊಂದಿಕೊಂಡರೆ ಮತ್ತೆ ತೂಕ ಹೆಚ್ಚಾಗುವುದರಲ್ಲಿ ಯಾವುದೇ ಸಂಶಯವಿಲ್ಲ. ಹಾಗಾಗಿ ನಿಗದಿತ ಪ್ರಮಾಣದ ತೂಕ ಕಡಿಮೆ ಮಾಡಿಕೊಂಡ ನಂತರ ಅದೇ ತೂಕವನ್ನು ಹೊಂದಬೇಕಾದರೆ ವರ್ಕ್‌ಔಟ್‌ ಮಾಡುವಾಗ ಅನುಸರಿದ ನಿಯಮಗಳನ್ನೇ ಯಥಾವತ್ತಾಗಿ ಅನುಸರಿಸಬೇಕು.

ಸಂಶೋಧಕರ ಪ್ರಕಾರ ಒಂದು ವರ್ಷದಲ್ಲಿ 29ರಷ್ಟು ಜನರು ಶೇಕಡ 5ರಷ್ಟು ತೂಕ ಕಳೆದುಕೊಂಡಿದ್ದಾರೆ. ಆದರೆ ಅದನ್ನು ಮುಂದುವರಿಸಿದವರದ್ದು ಕಡಿಮೆ ಸಂಖ್ಯೆ. ಸಂಶೋಧನೆಗೆ ಒಳಗಾಗಿದ್ದವರಿಗೆ ತೂಕ ಹೆಚ್ಚಿಸಿಕೊಳ್ಳದಂತೆ ನಿರಂತರವಾಗಿ ಸಲಹೆಗಳನ್ನು ನೀಡಲಾಗಿದ್ದರಿಂದಲೇ ಅದರ ನಿರ್ವಹಣೆ ಸುಲಭವಾಯಿತು ಎನ್ನುತ್ತಾರೆ ಲೆವಸ್ಕಿ.

ನಾವು ಸೇವಿಸುವ ಆಹಾರದ ಬಗ್ಗೆ ಕಾಳಜಿ ವಹಿಸುವಂತೆ ಮಾಡುವುದರ ಜೊತೆಗೆ ತೂಕ ಕಡಿಮೆ ಮಾಡಿಕೊಳ್ಳುವ ಅಭ್ಯಾಸವನ್ನು  ಮುಂದುವರೆಸಿ ಉತ್ತಮ ಆರೋಗ್ಯ ಹೊಂದುವಂತೆ ಮಾಡುವುದು ಈ ಸಂಶೋಧನೆಯ ಮುಖ್ಯ ಉದ್ದೇಶ. ನಿನ್ನೆ ನಾವು ಮಾಡಿದ ಕೆಲಸ,  ನಾಳಿನ ಹೊಸ ಆಲೋಚನೆಗಳ ಜೊತೆಗೆ ತಳುಕು ಹಾಕಿಕೊಂಡಿರುತ್ತದೆ. ಹಾಗೆಯೇ ದೇಹದ ತೂಕ ಕೂಡ. ಅದಕ್ಕಾಗಿ ನಮ್ಮ ಆಲೋಚನೆಗಳು ಕೂಡ ಸದಾ ಕ್ರೀಯಾಶೀಲವಾಗಿರಬೇಕು, ಆಗ ಮಾತ್ರ ನಾವು ಮಾಡುವ ಪ್ರತಿಯೊಂದು ಕೆಲಸದ ಗುರಿ ತಲುಪಲು ಸಾಧ್ಯ ಎಂದೂ ಹೇಳುತ್ತಾರೆ.

ಸ್ಥೂಲಕಾಯ ಹಲವು ರೀತಿಯ ಅನಾರೋಗ್ಯಗಳಿಗೂ ಕಾರಣವಾಗಿರುವುದರಿಂದ ಎತ್ತರಕ್ಕೆ ತಕ್ಕಂತೆ ತೂಕ ಹೊಂದುವುದು ಅನಿವಾರ್ಯವಾಗಿದ್ದು, ಹೊಸ ಸಂಶೋಧನೆಗಳ ಫಲಿತವಾಗಿ ದೊರೆಯುವ ಸಲಹೆ, ಸೂಚನೆಗಳನ್ನು ಪಾಲಿಸುವುದಕ್ಕೆ ಜನ ಮುಗಿ ಬೀಳುತ್ತಿದ್ದಾರೆ ಎಂಬ ಮಾತೂ ಸುಳ್ಳಲ್ಲ. ಈ ವರದಿ ಪ್ರಕಟವಾಗಿದ್ದು ‘ಜರ್ನಲ್ ಆಫ್ ಒಬೆಸಿಟಿ’ಯಲ್ಲಿ.