ಬೇಹುಗಾರಿಕೆಯಲ್ಲಿ ಚೆಲ್ಲುಗಾರ್ತಿಯರು

ಕೀಲರ್ ಹಿನ್ನೆಲೆ
ಕೀಲರ್ ಬಕ್ಕಿಂಗ್‌ಹ್ಯಾಮ್‌ಷೆಯರ್‌ನ ಮನೆ ಬಿಟ್ಟು ಹೋದಾಗ ಅವಳ ವಯಸ್ಸು ಕೇವಲ 15. ಗ್ರೀಕ್ ಹೋಟೆಲ್‌ವೊಂದರಲ್ಲಿ ಪರಿಚಾರಕಿಯಾಗಿ ಕೆಲಸಕ್ಕೆ ಸೇರಿ ನಂತರ ಹೋಟೆಲ್‌ವೊಂದರಲ್ಲಿ ಕ್ಯಾಬರೆ ನರ್ತಕಿಯಾದಳು. 1961ರಲ್ಲಿ ಸ್ಟಿಫನ್ ವಾರ್ಡ್ ಎಂಬ ವೈದ್ಯರೊಬ್ಬರು ಕ್ರಿಸ್ಟಿನಾ ಕೀಲರ್‌ಳ ಪರಿಚಯವನ್ನು ಪ್ರೊಫುಮೊ ಅವರಿಗೆ ಮಾಡಿಕೊಟ್ಟರು.

ವಾರ್ಡ್‌ಗೆ ಲಾರ್ಡ್ ಆಸ್ಟರ್  ಎಂಬ ಮಿತ್ರರೊಬ್ಬರು ಇದ್ದರು. ಒಮ್ಮೆ ವಾರ್ಡ್‌ ರಷ್ಯಾದ ಇವಾನೊವ್ ಜತೆ ಗ್ರಾಮವೊಂದರಲ್ಲಿ ಆಸ್ಟರ್   ಆಯೋಜಿಸಿದ  ಪಾರ್ಟಿಗೆ ಹಾಜರಾಗಲು ತೆರಳಿದರು. ಕೀಲರ್ ಅಲ್ಲಿ ಈಜುಕೊಳ ನೋಡಿ ತಾನು ಈಜಬೇಕೆಂದಳು. ಗೆಳೆಯ ವಾರ್ಡ್ ‘ಬೆತ್ತಲೆಯಾಗಿ ಈಜು ನೋಡೋಣ' ಎಂದು ಸವಾಲು ಹಾಕಿದರು. ಆಕೆ ಸಮ್ಮತಿಸಿದಳು. ವಾರ್ಡ್ ಸುಮ್ಮನಾಗಲಿಲ್ಲ. ಕೀಟಲೆ ಮಾಡಬೇಕು ಎನಿಸಿತು. ಈಜುಡುಗೆ ಕದ್ದು ಮರೆಯಲ್ಲಿಟ್ಟರು. ಈಜಿ ದಡಕ್ಕೆ ಬಂದರೆ ಬಟ್ಟೆ ನಾಪತ್ತೆ! ಆಗ ಉದ್ಯಾನದಲ್ಲಿ ಹರಟೆ ಹೊಡೆಯುತ್ತ ಸಾಗಿದ ಆಸ್ಟರ್ ಮತ್ತು ಪ್ರೊಫುಮೊ ಈಜುಕೊಳದ ಬಳಿ ಬಂದಿದ್ದರು.

ಈಜುಕೊಳದಿಂದ ಕೀಲರ್ ನಗ್ನಳಾಗಿ ಮೇಲೆದ್ದು ಬರುತ್ತಿದ್ದ ದೃಶ್ಯ ನೋಡಿ  ಪ್ರೊಫುಮೊ ಮೋಹಕ್ಕೆ ಒಳಗಾದರು. ಆಗ ಆಕೆಯ ವಯಸ್ಸು 19. ಅವರ ವಯಸ್ಸು 48. ಅಲ್ಲಿಂದ ಅವರ ಮಧ್ಯೆ ಲೈಂಗಿಕ ಸಂಬಂಧ ಬೆಳೆಯಿತು. 1963ರಲ್ಲಿ ಇದು ಬಹಿರಂಗವಾಯಿತು. ಆಕೆ ಪ್ರೊಫುಮೊ ಮತ್ತು ರಷ್ಯಾದ ಗುಪ್ತಚರ ಅಧಿಕಾರಿ ಇವಾನೊವ್ ಅವರ ಜತೆ ಲೈಂಗಿಕ ಸಂಬಂಧ ಹೊಂದಿರುವುದನ್ನು ಬಹಿರಂಗಪಡಿಸಿದಳು. ಇದಕ್ಕೆ ಕಾರಣವಾದ ಘಟನಾವಳಿಗಳು ಮತ್ತು ಅವಳ ಪಿತೂರಿ ಕುತೂಹಲಕಾರಿಯಾದುದು. ಆಕೆ ವೆಸ್ಟ್ ಇಂಡೀಸ್‌ನ ಜಾಜ್ ಕಲಾವಿದ ಲಕ್ಕಿ ಕೊರ್ಡ್‌ನ್ ಜತೆ, ಅನಂತರ ಅದೇ ದೇಶದ ಜಾನಿ ಎಡ್ಜ್‌ಕೊಂಬೆಯ ಜತೆ  ಸಂಬಂಧ ಬೆಳೆಸಿದ್ದಳು.

1962ರಲ್ಲಿ ಆಕೆಯ ವಿಷಯದಲ್ಲಿ ಕ್ಲಬ್‌ವೊಂದರಲ್ಲಿ ಅವರಿಬ್ಬರ ಮಧ್ಯೆ ಮಾರಾಮಾರಿಯಾಗಿ ಜಾನಿ ಎಡ್ಜ್‌ಕೊಂಬೆ ತೀವ್ರ ಗಾಯಗೊಂಡರು. ಅನಂತರ ಎಡ್ಜ್‌ಕೊಂಬೆಯ ಜತೆ ಕೆಲದಿನಗಳ ಕಾಲ ಆಕೆ ಇದ್ದಳು. ಬಳಿಕ ಕಾರಣಾಂತರದಿಂದ ದೂರವಾದಳು. ವಾರ್ಡ್ ಅವರ ಜತೆ ವಾಸಿಸಲಾರಂಭಿಸಿದಳು. ಎಡ್ಜ್‌ಕೊಂಬೆ  ಆಕೆಯನ್ನು ಬಯಸಿ ಅಲ್ಲಿಗೆ ಬಂದಾಗ  ಆಕೆ ಅವರಿಗೆ ಒಳ­ಬರಲು ಬಿಡದೆ ದಢಾರನೆ ಬಾಗಿಲು ಹಾಕಿ­ಕೊಂಡಳು.  ಎಡ್ಜ್‌ಕೊಂಬೆ ಸಿಟ್ಟಿಗೇಳಲು ಇಷ್ಟೇ ಸಾಕಾ­ಯಿತು. ಎಡ್ಜ್‌ಕೊಂಬೆ ತಕ್ಷಣ ಬಂದೂಕಿನಿಂದ ಗುಂಡು ಹಾರಿಸಿಯೇ ಬಿಟ್ಟರು. ಬಾಗಿಲಿಗೆ ಬಿದ್ದ ಗುಂಡು ಎಡ್ಜ್‌ಕೊಂಬೆ ಸೆರೆಮನೆಯಲ್ಲಿ ಕೊಳೆಯಲು ಕಾರಣವಾಯಿತು.

ನುಂಗಲಾಗದ ತುತ್ತು: ವಾರ್ಡ್‌ ಅವರಿಗೆ ಅವಳ ಸಹವಾಸ ಸಾಕಾಯಿತು. ಆಕೆ ತನ್ನನ್ನು ತೊರೆಯವಂತೆ ಮಾಡಿದರು. ಇದು ಆಕೆಗೆ ನುಂಗಲಾಗದ ತುತ್ತಾಯಿತು.  ವಾರ್ಡ್ ವಿರುದ್ಧ ಸಮರ ಸಾರಲು ಆರಂಭಿಸಿದಳು. ಸಾಲಿಸಿಟರ್ ಮೈಕೆಲ್ ಅವರ ಬಳಿ ತಾನು ಮತ್ತು ವಾರ್ಡ್ ರಷ್ಯಾ ದೇಶದ ಬೇಹುಗಾರರೆಂದೂ ರಷ್ಯಾಕ್ಕೆ ಅಗತ್ಯವಿರುವ ಮಾಹಿತಿಯನ್ನು ಪ್ರೊಫುಮೊ ಅವರಿಂದ ಪಡೆಯುವಂತೆ ವಾರ್ಡ್ ತನಗೆ ತಿಳಿಸಿರುವುದಾಗಿ ಹೇಳಿದಳು. ಇದೇ ರೀತಿ ಅಂದಿನ ಹಿರಿಯ ರಾಜಕಾರಣಿಗಳ ಬಳಿ ಹೇಳುತ್ತಲೇ ಬಂದಳು. ಬಂಧನಕ್ಕೆ ಒಳಗಾದ ವಾರ್ಡ್ ತಮ್ಮನ್ನು ಅಮಾಯಕ ಎಂದು ಹೇಳಿಕೊಳ್ಳುತ್ತಲೇ ಬಂದು ಕೊನೆಗೆ ಆತ್ಮಹತ್ಯೆ ಮಾಡಿಕೊಂಡರು. ವಾರ್ಡ್ ಪ್ರೊಫುಮೋ ಅವರ ಬ್ರೀಫ್‌ಕೇಸಿನಿಂದ ಸರ್ಕಾರಕ್ಕೆ ಸಂಬಂಧಪಟ್ಟ ಅಧಿಕೃತ ಕಾಗದಪತ್ರಗಳನ್ನು ಒಮ್ಮೆ ಕಳವು ಮಾಡಿದ್ದರು.

ಪ್ರೊಫುಮೊ ಜತೆ ಆಕೆಯ ಸಂಬಂಧದ ಬಗ್ಗೆ ಹೌಸ್ ಆಫ್ ಕಾಮನ್ಸ್‌ನಲ್ಲಿ ಚರ್ಚೆ ನಡೆದಾಗ ಪ್ರೊಫುಮೊ ತಾನು ಆಕೆಯ ಜತೆ ಲೈಂಗಿಕ ಸಂಬಂಧ ಹೊಂದಿಲ್ಲ ಎಂದು ಹೇಳಿಕೆ ನೀಡಿದರು. ಆದರೆ ಇದನ್ನು ಒಪ್ಪಲು ಯಾರೂ ಸಿದ್ಧರಿರಲಿಲ್ಲ. ಅನಂತರ ಇದಕ್ಕೆ ವಿರುದ್ಧ ಹೇಳಿಕೆ ನೀಡಿ 1963ರ ಜೂನ್ 4ರಂದು ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದರು. ಬ್ರಿಟನ್‌ನ ಜನತೆಯನ್ನು ತಪ್ಪು ದಾರಿಗೆ ಎಳೆದುದಕ್ಕೆ ಕ್ಷಮೆಯಾಚಿಸಿದರು.

  ಪ್ರೊಫುಮೊ ಅವರ ಸಂಪರ್ಕಕ್ಕೆ ಬರುವ ಮುನ್ನವೇ ಕೀಲರ್ ಬೇಹುಗಾರಿಕೆಯಲ್ಲಿ ತೊಡಗಿದ್ದಳು. ನ್ಯಾಯಾಲಯದಲ್ಲಿ ವಿಚಾರಣೆಯ ಸಂದರ್ಭದಲ್ಲಿ  ಪಾಶ್ಚಾತ್ಯ ರಾಷ್ಟ್ರಗಳ ಕ್ಷಿಪಣಿ ಸಾಗಣೆಯ ಮಾಹಿತಿ ನೀಡಿದ್ದು ನಿಜ ಎಂದು ತಪ್ಪೊಪ್ಪಿಕೊಂಡಳು. ಆಕೆಗೆ ಆರು ತಿಂಗಳ ಜೈಲು ಶಿಕ್ಷೆಯಾಯಿತು.

ಪ್ರೊಫುಮೊ ರಾಜೀನಾಮೆ ನೀಡಿದ 50 ವರ್ಷಗಳ ನಂತರ ಕೀಲರ್ ‘ನಾನು ಬೇಹುಗಾರಳಾಗಿ ಪಾಶ್ಚಾತ್ಯ ರಾಷ್ಟ್ರಗಳ ಕ್ಷಿಪಣಿ ಸಾಗಣೆಯ ಮಾಹಿತಿಯನ್ನು ವೈರಿ ರಾಷ್ಟ್ರ ರಷ್ಯಾಕ್ಕೆ ನೀಡಿದ್ದು ನಿಜ. ಸೆಕ್ಸ್ ಒಂದು ಆಟ, ಬೇಹುಗಾರಿಕೆ ನನಗೆ ಆಗ ವೃತ್ತಿಯಾಗಿತ್ತು’ ಎಂದಳು. ‘ವಾರ್ಡ್ ಸೂಚನೆಯಂತೆ ಲಂಡನ್‌ ನಲ್ಲಿರುವ ರಷ್ಯಾದ ರಾಜತಾಂತ್ರಿಕ ಕಚೇರಿಗೆ ಅವರು ಕೊಡುತ್ತಿದ್ದ ಲಕೋಟೆ (ಬೇಹುಗಾರಿಕೆಯ ಮಾಹಿತಿ)ಗಳನ್ನು ತಲುಪಿಸುತ್ತಿದ್ದೆ’ ಎಂದು ಪತ್ರಕರ್ತರಿಗೆ ತಿಳಿಸಿದಳು.

ಮಾತಾ ಹರಿ ಕಥನ
ಮಾತಾಹರಿ ಎಂಬ ಚೆಲುವೆ ನೆದರ್‌ಲೆಂಡ್ಸ್‌ನವಳು. ಹಲವು ದೇಶಗಳ ಸೇನಾಧಿಕಾರಿ, ರಾಜಕಾರಣಿ ಮತ್ತು ಪ್ರಭಾವಿ ರಾಜಕಾರಣಿಗಳ ಗೆಳೆತನ ಗಳಿಸುವುದರಲ್ಲಿ ಯಶಸ್ವಿಯಾದವಳು. ಆದರೆ ಬೇಹುಗಾರಿಕೆಯ ಆರೋಪದ ಮೇಲೆ ಗುಂಡೇಟು ತಿಂದು ಬದುಕಿನಲ್ಲಿ ಅಂತ್ಯ ಕಂಡಳು. ಅವಳ ಮೇಲೆ ಇದ್ದ ಆರೋಪ ಮೊದಲನೆಯ ಮಹಾಯುದ್ಧದ ಸಂದರ್ಭದಲ್ಲಿ ಜರ್ಮನಿಯ ಬೇಹುಗಾರ್ತಿಯಾಗಿ ಕೆಲಸ ಮಾಡಿದ್ದು. ಮೊದಲು ಸರ್ಕಸ್ ಕಂಪೆನಿ ಸೇರಿ ಕುದುರೆ ಸವಾರಿ ಮಾಡಿ ಪ್ರೇಕ್ಷಕರನ್ನು ರಂಜಿಸಿದ ಆಕೆ, ಕಲಾವಿದರಿಗಾಗಿ ರೂಪದರ್ಶಿಯಾಗಿ ದುಡಿದಳು. ಆದರೆ ಅವಳು ಪ್ರಭಾವಿ ವ್ಯಕ್ತಿಗಳ ಗಮನ ಸೆಳೆದದ್ದು ನೃತ್ಯಗಾರ್ತಿಯಾಗಿ.

ಅರೆನಗ್ನ ನೃತ್ಯಗಾರ್ತಿಯಾಗಿ ಸುದ್ದಿಯಲ್ಲಿದ್ದ ಆಕೆ ಕ್ರಮೇಣ ನೃತ್ಯರಂಗದಿಂದ ತೆರೆಯ ಮರೆಗೆ ಸರಿದಾಗ ಗೆಳೆಯರ ಸಂಖ್ಯೆಯೆನೂ ಕಡಿಮೆಯಾಗಲಿಲ್ಲ. ನೆದರ್‌ಲೆಂಡ್ಸ್ ಮಹಾಯುದ್ಧದಲ್ಲಿ ಯಾರ ಪರವೂ ಇರಲಿಲ್ಲ. ಆದುದರಿಂದ ಆಕೆಯ ವಿದೇಶ ಪ್ರಯಾಣವನ್ನು ಆರಂಭದಲ್ಲಿ ಯಾವ ರಾಷ್ಟ್ರವೂ ಗಂಭೀರವಾಗಿ ಪರಿಗಣಿಸಲಿಲ್ಲ. ಆದರೆ ಮೇಲಿಂದ ಮೇಲೆ ಆಕೆಯ ಫ್ರಾನ್ಸ್ ಭೇಟಿ ಮಾತ್ರ ಕ್ರಮೇಣ ಸೇನೆಯ ಗುಮಾನಿಗೆ ಕಾರಣವಾಯಿತು.

1917ರಲ್ಲಿ ಪ್ಯಾರಿಸ್‌ನ ಹೋಟೆಲ್‌ವೊಂದರಲ್ಲಿ ಬಂಧಿಸಿ ವಿಚಾರಣೆ ನಡೆಸಿದಾಗ ಬೇಹುಗಾರಿಕೆಯ ಆರೋಪವನ್ನು ಆಕೆ ಒಪ್ಪಲಿಲ್ಲ. ಆದರೆ ಆಕೆಯ ಮಾತನ್ನು ನಂಬಲು ಬ್ರಿಟನ್ ಮತ್ತು ಫ್ರಾನ್ಸ್‌ನ ಬೇಹುಗಾರರು ಸಿದ್ಧರಿರಲಿಲ್ಲ. 1917ರ ಅಕ್ಟೋಬರ್ 15ರಂದು  41ನೇ ವಯಸ್ಸಿನಲ್ಲಿ ಆಕೆಯನ್ನು ಗುಂಡಿನ ಸುರಿಮಳೆಗರೆದು ಸಾಯಿಸಲಾಯಿತು. 1970ರಲ್ಲಿ ಬಿಡುಗಡೆ ಮಾಡಿದ ಜರ್ಮನಿಯ ದಾಖಲೆಯ ಪ್ರಕಾರ ಆಕೆ ಬೇಹುಗಾರಿಕೆ ನಡೆಸಿದ್ದು ನಿಜ. ಇತಿಹಾಸದಲ್ಲಿ ಮಹಿಳೆಯರು ಬೇಹುಗಾರಿಕೆಯಲ್ಲಿ ಭಾಗಿಯಾದ ಇಂತಹ ಹಲವು ಪ್ರಕರಣಗಳು ದಾಖಲಾಗಿವೆ.