ಮಕ್ಕಳೇಕೆ ಓದುವುದಿಲ್ಲ?

ಮಕ್ಕಳು ಕಲಿಕೆಯಲ್ಲಿ ಕಷ್ಟ ಪಡುತ್ತಿದ್ದರೆ, ಅವರಿಗೆ ಮಾನಸಿಕ ಸಮಸ್ಯೆಗಳಿರಬಹುದು. ಗಮನಿಸಿ ಕಾಯಿಲೆ ಅಲ್ಲ. ಸಮಸ್ಯೆಗಳಿರಬಹುದು. ಪ್ರೀತಿ ಮತ್ತು ಸಹನೆಯಿಂದ ಆ ಮಕ್ಕಳನ್ನು ಮುಖ್ಯವಾಹಿನಿಗೆ ತರಬಹುದು. ನಮ್ಮ ಮಕ್ಕಳಲ್ಲಿವೆಯೇ ಈ ಲಕ್ಷಣಗಳು? ಬೈಯ್ದು ಹೀಗಳೆಯುವ ಮುನ್ನ ಒಮ್ಮೆ ಪರೀಕ್ಷಿಸಿ.

ಮಕ್ಕಳ ಕಲಿಕೆಯ ವಿಷಯದಲ್ಲಿ ಸಾಮಾನ್ಯವಾಗಿ ಪಾಲಕರು ಅತಿ ನಿರೀಕ್ಷೆಗಳನ್ನು ಇಟ್ಟುಕೊಂಡಿರುತ್ತಾರೆ. ಸಾಮಾನ್ಯ ಕಲಿಕೆಯ ಮಕ್ಕಳೊಂದಿಗೆ ನಿಧಾನ ಕಲಿಕೆಯ ಮಕ್ಕಳು ಅಥವಾ ಅತಿ ಚಟುವಟಿಕೆ ಇರುವ ಮಕ್ಕಳಿಗೆ ಇದರಿಂದ ಒತ್ತಡ ಉಂಟಾಗುತ್ತದೆ.
ಮಕ್ಕಳಿಗೆ ಕಲಿಕೆಯಲ್ಲಿ ತೊಂದರೆ ಇದೆ ಎನ್ನುವ ವಿಷಯ ಬಹುತೇಕ ಪಾಲಕರಿಗೆ ಗೊತ್ತಿರುವುದೇ ಇಲ್ಲ. ಗಮನ ಕೊಟ್ಟು ಓದುವುದಿಲ್ಲ ಎನ್ನುವ ದೂರು ಬಹುತೇಕ ಪಾಲಕರದ್ದು. ಆದರೆ ಆ ಮಗು ಗಮನ ಕೊಡದೇ ಇರುವುದೂ ಒಂದು ಅಸಹಾಯಕತನ, ಅಥವಾ ಅಸಾಮರ್ಥ್ಯ ಎನ್ನಬಹುದು. ಅಂಥ ಮಕ್ಕಳಿಗೆ ಬೇಕಿರುವುದು ಮಾನಸಿಕ ಬೆಂಬಲ ಮತ್ತು ಪ್ರೋತ್ಸಾಹ. ಇವನ್ನು ಉದಾಹರಣೆಗಳೊಂದಿಗೆ ಗಮನಿಸುವ.

ವಿನಯ್‌ ತುಂಬಾ ಚೂಟಿ ಹುಡುಗ. ಗಣಿತ ಮತ್ತು ಇಂಗ್ಲಿಷ್‌ನಲ್ಲಿ ಮಾತ್ರ ಹಿಂದೆ. ಕೇಳಿದ ಪ್ರಶ್ನೆಗಳಿಗೆ ಪಟ ಪಟ ಎಂದು ಉತ್ತರಿಸುತ್ತಾನೆ ಆದರೆ ಓದುವಲ್ಲಿ ಬರೆಯುವುದರಲ್ಲಿ ಹಿಂದೆ ಬೀಳುತ್ತಾನೆ. ಓದುವಾಗ ನಿಧಾನವಾಗಿ ಓದುತ್ತಾನೆ, ಕೆಲವು ಪದಗಳನ್ನು ಬಿಟ್ಟುಬಿಡುತ್ತಾನೆ (SENT ಅನ್ನು SET ಎಂದು ಓದುತ್ತಾನೆ), ಪದಗಳನ್ನು ತಪ್ಪಾಗಿ ಉಚ್ಚರಿಸುತ್ತಾನೆ (FELT ಅನ್ನು LEFT ಅಂದು), ಪದಗಳನ್ನು ಹಿಂದೆ ಮುಂದಾಗಿ ಓದುತ್ತಾನೆ(MAD ಅನ್ನು DAM ಅಂದು). ಗಣಿತದಲ್ಲಿ ಭಾಗಾಕಾರ ಮತ್ತು ಗುಣಾಕಾರ ಮಾಡುವಲ್ಲಿ ಗೊಂದಲ ಮಾಡಿಕೊಳ್ಳುತ್ತಾನೆ. ನಾಲ್ಕ್‌ ನಾಕ್ಲೇ ಎಷ್ಟು ಎಂದರೆ ಪದೇ ಪದೇ ‘8’ ಎಂದು ಉತ್ತರಿಸುತ್ತಾನೆ. 63 ಅನ್ನು 36 ಅಂದು ಓದುತ್ತಾನೆ. ವಿನಯ ಡಿಸ್‌ಲೆಕ್ಸೀಯ ಎಂಬ ತೊಂದರೆ ಇರುವ ಹುಡುಗ.

ವಿನಯ್‌ಗೆ ಹೇಗೆ ಸಹಾಯ ಮಾಡಬಹುದು?
ಡಿಸ್‌ಲೆಕ್ಸೀಯ ಇರುವ ಮಕ್ಕಳನ್ನು ಶಿಕ್ಷಕರು ಮತ್ತು ಪೋಷಕರು ಆದಷ್ಟು ಬೇಗ ಗುರುತಿಸಿ, ಮನೋವೈದ್ಯರಿಂದ ಪರೀಕ್ಷೆ ಮಾಡಿಸಬೇಕು. ಮಗುವನ್ನು ಬೈಯುವುದು, ರೇಗಿಸುವುದು, ದಡ್ಡ, ಸೋಮಾರಿ ಎಂದು ಹೀಯಾಳಿಸಬಾರದು. ಮಗುವನ್ನು ಅಪರಾಧಿಯಂತೆ ನೋಡಬೇಡಿ, ಮಗು ನಿಜವಾಗಿಯೂ ಕಲಿಕೆ ತೊಂದರೆಯಿಂದ ಕಷ್ಟಪಡುತ್ತಿದೆ ಎಂದು ಅರ್ಥಮಾಡಿಕೊಳ್ಳಿ. ಸಹನೆಯಿಂದ ಮಗುವಿಗೆ ತಜ್ಞರ ಸಹಾಯ ಪಡೆದು ತರಬೇತಿ ಕೊಡಿ. ಮಗುವಿನ ಪ್ರತಿಭೆಯನ್ನು ಗುರುತಿಸಿ ಅದರಲ್ಲಿ ಮುಂದೆ ಬರುವಂತೆ ಪ್ರೋತ್ಸಾಹಿಸಿ. ಶಿಕ್ಷಕರು ಡಿಸ್‌ಲೆಕ್ಸೀಯ ಮಗುವಿಗೆ ವಿಶೇಷ ತರಬೇತಿ ಕೊಡಬೇಕು. ಬರೆಯಲು ಹೆಚ್ಚು ಸಮಯ ಕೊಡಿ, ಅಕ್ಷರಗಳನ್ನು ದೊಡ್ಡದಾಗಿ ಬರೆದು ತಿದ್ದಲು ಹೇಳಿ. ಒಂದೇ ರೂಪದ ಅಕ್ಷರಗಳ ವ್ಯತ್ಯಾಸಗಳನ್ನು ಪದೇ ಪದೇ ಹೇಳಿಕೊಡಿ. ಪದದ ಒಂದೊಂದು ಅಕ್ಷರವನ್ನು ಸರಿಯಾಗಿ ಉಚ್ಚರಿಸಿ, ಅಂತೆಯೇ ಉಚ್ಚರಿಸಲು ಮಗುವಿಗೆ ಹೇಳಿ. ಕಠಿಣ ಪದಗಳನ್ನು ಹಾಳೆಯ ಮೇಲೆ ಬಣ್ಣದ ಪೆನ್ನಿನಿಂದ ಬರೆದು ಪದೇ ಪದೇ ನೋಡಲು ಹೇಳಿಕೊಡಿ. ಚಿತ್ರ ನೋಡಿ ಪದ ಬರೆಯುವ ಆಟ, ಸ್ಪೆಲಿಂಗ್ ಹೇಳುವ ಸ್ಪರ್ಧೆ, ಒಂದೇ ಅಕ್ಷರದಿಂದ ಬರುವ ಪದಗಳ ಪಟ್ಟಿ ಮಾಡಲು ಪ್ರೋತ್ಸಾಹಿಸಿ. ಮಗುವಿನ ವಿದ್ಯಾಭಾಸ ನಲಿ-ಕಲಿ ಎಂತಾಗಬೇಕು.

ತೀವ್ರ ಬಗೆಯ ಡಿಸ್‌ಲೆಕ್ಸೀಯ ಮಕ್ಕಳಿಗೆ ವಿಶೇಷ ಶಿಕ್ಷಕರ ಮತ್ತು ವಿಶೇಷ ಶಾಲೆಯ (ನ್ಯಾಶನಲ್ ಇನ್‌ಸ್ಟಿಟ್ಯೂಟ್ ಆಫ್ ಓಪನ್ ಸ್ಕೂಲಿಂಗ್) ಅಗತ್ಯ ಬರಬಹುದು. ಬಹುತೇಕ ಡಿಸ್‌ಲೆಕ್ಸೀಯ ಮಕ್ಕಳು ಮಾಮೂಲು ಶಾಲೆಯಲ್ಲಿ ಇತರ ಮಕ್ಕಳೊಂದಿಗೆ ಬೆರೆತು ವಿದ್ಯಾಭ್ಯಾಸ ಮಾಡಬಹುದು. 

ರವಿ 7 ವರ್ಷದ ಹುಡುಗ. ಅತಿಯಾದ ಚಟುವಟಿಕೆಯಲ್ಲಿ ತೊಡಗುತ್ತಾನೆ. ಸ್ವಲ್ಪ ಹೊತ್ತು ಕೂಡ ಸುಮ್ಮನೆ ಕೂರಲಾರ, ಸದಾ ಒಂದಲ್ಲ ಒಂದು ಕೆಲಸ ಮಾಡುತ್ತಿರುತ್ತಾನೆ. ಅವನ ಮನಸ್ಸು ಚಂಚಲ, ಏಕಾಗ್ರತೆ ಕಡಿಮೆ. ಶಾಲೆಯಲ್ಲಿ ಶಿಕ್ಷಕರು ಹೇಳಿಕೊಡುವ ಪಾಠದ ಕಡೆ ಗಮನಹರಿಸುವುದಿಲ್ಲ. ಶಿಕ್ಷಕರು ಪಾಠ ಮಾಡುವಾಗ ಕಿಟಕಿ ಮತ್ತು ಬಾಗಿಲ ಹೊರಗೆ ನೋಡುತ್ತಿರುತ್ತಾನೆ. ಶಾಲೆಯಲ್ಲಿ ಕುಳಿತುಕೊಳ್ಳುವ ಸ್ಥಳವನ್ನು ಪದೇ ಪದೇ ಬದಲಿಸುತ್ತಾನೆ. ತರಗತಿಯಲ್ಲಿ ವಿಪರೀತ ಮಾತನಾಡುತ್ತಾನೆ. ಮಕ್ಕಳನ್ನು ಕಂಡರೆ ಜಗಳಕ್ಕೆ ಹೋಗುತ್ತಾನೆ. ಇವನಿಂದ ಇಡೀ ತರಗತಿಗೆ ತೊಂದರೆಯಾಗುತ್ತಿದೆ ಎಂಬುದು ರವಿ ಶಿಕ್ಷಕರ ದೂರು. ರವಿ ಅತಿ ತೀಟೆ ಮತ್ತು ಅತಿ ಚೇಷ್ಟೆ (ADHD) ಎಂಬ ತೊಂದರೆಯನ್ನು ಹೊಂದಿದ್ದಾನೆ.