ವ್ಯಾಕರಣ ಮೀರಿಯೂ ಬಾಳಲು ಸಾಧ್ಯವಿದೆ
ಎಂದು ವ್ಯಾಕರಣಕ್ಕೆ ಗೊತ್ತಿಲ್ಲ
ಜೀವನದ ಸ್ಫೂರ್ತಿಯಿರುವುದೇ ಇಲ್ಲಿ
ಬೊಗಸೆಯನ್ನು ಒಡ್ಡದೆಯೂ ಭಿಕ್ಷೆ ಬೇಡುತ್ತ
ಅದನ್ನೇ ಜಗತ್ತು ಎಂದು ಭಾವಿಸಿಕೊಂಡು
ಖಾಲಿ ಬಿಟ್ಟ ಸ್ಥಳಗಳನ್ನು ತುಂಬಿಕೊಂಡು
ಹೊಂದಿಸಿ ಬರೆದು ಬರೆದು ಹೊಂದಿಸಿ ಜೀವಿಸಿಕೊಂಡು
**
ಈಗೀಗ ಸ್ವಲ್ಪ ತ್ರಾಸು
ತಪ್ಪು ಉತ್ತರಕ್ಕೊಂದು ಸರಿಯುತ್ತರ ಬಲಿ ಕೊಡುವ ಕಾಲ ಬಂದು
ಕೆಣಕಿದ್ದು ತಿಣುಕಿದ್ದು ಓದಿದ್ದು ಮರೆತಿದ್ದು ಎಲ್ಲವೂ ಕಲೆಸಿ
ಮೊನ್ನೆ ನನ್ನ ಹೆಸರನ್ನೇ ನಾನು ತಪ್ಪಾಗಿ ಉಚ್ಚರಿಸಿದಾಗಲೂ
ಎಲ್ಲರೂ ಚಪ್ಪಾಳೆ ತಟ್ಟಿದರು