ದಿನೇ ದಿನೇ ಅನಾಕರ್ಷಕನಾಗುತಿರುವ
ಅರಿವು ಒಳಗೆ ಅಂಕುರಿಸುತ್ತಿದೆ
ಬಂದುನಿಂತಿದ್ದೇನೆ
ನನ್ನಿರುವು ಅಮುಖ್ಯವಾಗುವ
ಹೊತ್ತಿಗೆ
ನನ್ನ ನಡೆ ನುಡಿ ಚಹರೆ ಕ್ಲೀಷೆಯಾದ
ಗಳಿಗೆಗೆ ಪಕ್ಕಾಗುತ್ತಿದ್ದೇನೆ
ಯಾರೂ ಇತ್ತೀಚೆಗೆ ನನ್ನನ್ನು ಕೇಳದಿದ್ದಾಗ
ನನ್ನೊಳಗಿನ ನಿಜದ ಕರೆ ಕೇಳ ಹೋದೆ
ಪರರಿಗೆ ಅರುಚಿಗೊಂಡ ನಾನು
ಈ ಒಳಗನ್ನು ರುಚಿಸಗೊಳಿಸ ಹೋದೆ
ಅನಾಕರ್ಷಣೆಯ ಕಟುಸತ್ಯ
ಊಳುತ್ತಿದೆ ಹಾಳುಬಿದ್ದ ಹೊಲಮನವನ್ನು
ಮೊದಲೆಲ್ಲಾ ಹೀಗಿರಲಿಲ್ಲ
ಮಾತು ಮಾತಿಗೆ ಮೋಹಕ್ಕೊಳಗಾದೆ
ಮೆಚ್ಚುಗೆಯ ಬಲೆಗಳಲ್ಲಿ ಮಿಕವಾದೆ
ಹೊಗಳಿಕೆಯ ಶೂಲಗಳಲ್ಲಿ ಸಿಲುಕಿದೆ
ಪರಾಕುಗಳ ಹಾಸಿನಮೇಲೆ ನಡೆದೆ
ತಾರೀಫುಗಳ ಕೊಳದಲ್ಲಿ ಬಿದ್ದೆ
ಅವರ ಇಷ್ಟದ ಬೆಚ್ಚಗಿನ ಗೂಡಿನೊಳಗೆ
ತಣ್ಣನೆಯ ನಿದ್ದೆ
ನಿಂತರೆ ಕೂತರೆ ಸೋನೆಸುರಿಸುತ್ತಿದ್ದ
ಅವರ ಮಾತ ಹಿತ
ಸೊಂಪಾಗಿ ಬೆಳೆಯುತ್ತಿದ್ದೆ
ಒಳಗನ್ನು ಮರೆತಿದ್ದೆ
ಒಳಗಣ್ಣ ಅಗಲಿದ್ದೆ
ಬರೀ ಹೊರವಸಂತನನ್ನು ಅಪ್ಪಿ
ಒಳ ಅಗ್ನಿಯನ್ನು, ಬಿರಿದ ನೆಲವನ್ನು
ಮೂದಲಿಸಲನುವಾದರು
ದೂರಿ ದೂರ ಹೋದವರು
ನನ್ನನ್ನು ನನಗೆ ಹತ್ತಿರ ತಂದರು
ಹೊರ ಅನಾಕರ್ಷಕನಾಗುತ್ತಲೇ
ಒಳದೋಷಗಳ ರಾಶಿ ಹಾಕಿಕೊಂಡೆ
ಹೊರ ಅರುಚಿಗೊಳ್ಳುತ್ತಲೇ
ಒಳ ರಸರುಚಿಗಳ ಹರವಿಕೊಂಡೆ
ಕಡೆಗಣಿಸಿದವರಿಗೆ ಋಣಿ ನಾನು
ಕಡಗೋಲನ್ನು ಕರುಣಿಸಿದರು
ಅವರ ಅವಜ್ಞೆಗೆ ಶರಣು
ನನಗೆ ನನ್ನನ್ನು ದೊರಕಿಸಿಕೊಟ್ಟರು