ದೇವನೇಗಿಲು

ನಾನು ಕೊಲೆಗಾರ ಕೊಂದದ್ದಕ್ಕೆ ಪುರಾವೆಗಳೇ ಇಲ್ಲ
ಇದ್ದರೂ ಅಧಿಕಾರದ ಆಸಿಡ್ಡಿನಲ್ಲಿ ಅದ್ದಿ ತೊಳೆದಿರುವೆ
ನಾನು ಲೂಟಿಕೋರ  ಆದರೇನಂತೆ
ಲೂಟಿಯನ್ನೇ ನ್ಯಾಯದ ಬೆಳವಣಿಗೆಯೆಂದು ಮಾನ್ಯ ಮಾಡಿಸಿರುವೆ;
ನಾನು ಸರ್ವಾಧಿಕಾರಿ
ಸರ್ವಾಧಿಕಾರ ರಾಜಧರ್ಮವೆಂದು
ಜನರ ನಾಲಿಗೆಗಳ ಮೇಲೆ ಶಾಸನ ಬರೆಸಿರುವೆ;
ಸುಳ್ಳುಗಳೇ ಈ ಕಾಲದ ಸವಿಮಾತೆಂದು ಹಾಡಲು ಕಲಿಸಿರುವೆ;
ಹಾಡುತ್ತ ಹಾಡುತ್ತ ಅವರು ನನ್ನ ಸುತ್ತ
ದಂತಕತೆ ಕಟ್ಟಲು ಏರ್ಪಾಡು ಮಾಡಿರುವೆ
ಹೆಚ್ಚೆಂದರೆ ಇದಕ್ಕೆ ಇನ್ನೊಂದಿಷ್ಟು
ಜನರ ನೆತ್ತರೆಣ್ಣೆ ಹೆಚ್ಚಾಗಬಹುದಷ್ಟೇ;
ಒದಗಿರುವ ಅವಕಾಶವ ಹಣ್ಣಾಗಿಸಿಕೊಳ್ಳದಿದ್ದರೆ ನಾನು ಮೂರ್ಖ!
ಈಗ ನಾನು ಇನ್ನಷ್ಟು ಬಲವಾದ ಉಕ್ಕಿನ ಮನುಷ್ಯನಾಗಬೇಕು.
ಉಕ್ಕನ್ನು ಮನುಷ್ಯರಿಂದಲೇ ಉಚಿತವಾಗಿ ಪಡೆಯಬೇಕು

ಆದರೆ ಧೈರ್ಯವಿದ್ದ ಅವಕಾಶ ಒದಗಿದ್ದ ಲಂಪಟವಾಗಿಸಲು ಸಿದ್ಧರಿದ್ದ
ಸರ್ವಾಧಿಕಾರದ ಸಿಂಹಾಸನದಲಿ ಆಸೀನನಾಗಿದ್ದ
ಅವನು; ಕೋಲಿಲ್ಲದೆ ನಡೆಯುತ್ತಿದ್ದ ಕುಂಟರನ್ನು
ಕೂಳಿಲ್ಲದೆ ಬಳಲಿದ್ದ ಬಡಕಲರನ್ನು
ನೊಗ ಹೊತ್ತು ನೇಗಿಲೆಳೆಯುತ್ತಿದ್ದ ರೈತರನ್ನು
ಹೆಣವಾಗಿ ಸಾಗುತ್ತಿದ್ದ ಹದಿಹರಯದವರನ್ನು
ಅವನಡಿ ಅಪ್ಪಚ್ಚಿಯಾಗಿ ಹರಿಯುತ್ತಿದ್ದ ಅವಳ ನೆತ್ತರನ್ನು
ಹಗಲಲ್ಲಿ ಕಂಡು ಸರಿರಾತ್ರಿಯಲ್ಲಿ ಮನೆ ತೊರೆದು ಯಾಕೆ ಹೊರಟ

ದೇವರಿಲ್ಲದ ಈ ನೆಲದಲ್ಲಿ ದೇವರಾಗಿ
ಸನ್ಯಾಸಿಯಾದರೂ ಸರ್ವಾಧಿಕಾರಿಯಾದರೂ ಕೊನೆಗೆ ಸಂತನಾದರೂ
ಮಣ್ಣಲ್ಲಿ ಮಣ್ಣಾಗುವೆನೆಂಬ ಸತ್ಯ ಗೊತ್ತಿದ್ದರೂ
ಹಗಲಲ್ಲಿ ಕಂಡ ಸತ್ಯ ಹುಡುಕಲು ರಾತ್ರಿ ಯಾಕೆ ಹೊರಟ
ರಾತ್ರಿ ಹೊರಟು ಬೆಳಕಿನತ್ತ ಯಾಕೆ ಹೊರಳಿದ
ಬಾಳ ಬೆಳಕಿನ ಸೆರಗಿಡಿದು ತನ್ನೆದೆಯ ತಂತಿ ಯಾಕೆ ನುಡಿಸಿದ

ದೇವರಿಲ್ಲದ ಈ ನೆಲದಲ್ಲಿ ದೇವರಾಗಿ
ಸಂತನಾದರೂ ಸರ್ವಾಧಿಕಾರಿಯಾದರೂ
ಸಾವೆಂದು ಖಾತ್ರಿಯಿದ್ದರೂ
ಜಗದ ಮನದಲ್ಲಿ ಸಾವಿರದ ಸಾಸಿವೆ
ಬಿತ್ತಲು ಯಾಕೆ ಉತ್ತ
ಈ ನೆಲವ ಯಾಕೆ ಉತ್ತ
ದೇವರಿಲ್ಲದ ಈ ನೆಲವ
ದೇವನೇಗಿಲಾಗಿ ಯಾಕೆ ಉತ್ತ
ಒಲವು ಯಾಕೆ  ಜಗದ ಬಿತ್ತ?