ಜಮ್ಮು (ಐಎಎನ್ಎಸ್): ಜಮ್ಮು ಮತ್ತು ಕಾಶ್ಮೀರದ ನೈಜ ನಿಯಂತ್ರಣ ರೇಖೆಯಲ್ಲಿ ಭಾರತೀಯ ನೆಲೆಗಳ ಕಡೆಗೆ ಪಾಕಿಸ್ತಾನಿ ಪಡೆಗಳು ಮಂಗಳವಾರ ಗುಂಡು ಹಾರಿಸಿದಾಗ ಭಾರತೀಯ ಯೋಧನೊಬ್ಬ ಹತನಾಗಿದ್ದಾನೆ ಎಂದು ಸೇನಾ ಮೂಲಗಳು ತಿಳಿಸಿವೆ.
ಅಖ್ನೋರ್ ವಿಭಾಗದ ಪಲ್ಲನ್ ವಲ್ಲಾ ಪ್ರದೇಶದಲ್ಲಿ ನಡೆದ ಈ ದಾಳಿಯಲ್ಲಿ ಪಾಕಿಸ್ತಾನಿ ಪಡೆಗಳು ಸ್ವಯಂಚಾಲಿತ ಶಸ್ತ್ತ್ರಾಸ್ತ್ರ ಸಹಿತ ಹಲವು ವಿಧದ ಶಸ್ತ್ರಾಸ್ತ್ರ ಬಳಸಿದವು ಎಂದು ಸೇನಾ ವಕ್ತಾರ ಕರ್ನಲ್ ಮನಿಶ್ ಮೆಹ್ತಾ ಐಎಎನ್ ಎಸ್ ಗೆ ತಿಳಿಸಿದರು.
ಉಗ್ರಗಾಮಿಗಳಿಗೆ ನೈಜ ನಿಯಂತ್ರಣ ರೇಖೆಯಲ್ಲಿ ಭಾರತದ ಕಡೆಗೆ ನುಸುಳಲು ಅನುವು ಮಾಡಿಕೊಡುವ ಸಲುವಾಗಿ ಈ ಗುಂಡು ದಾಳಿ ನಡೆಸಲಾಯಿತು ಎಂದು ಅವರು ನುಡಿದರು. ಏನಿದ್ದರೂ ಈ ನುಸುಳುವಿಕೆ ಯತ್ನವನ್ನು ವಿಫಲಗೊಳಿಸಲಾಗಿದ್ದು ಶೋಧ ಕಾರ್ಯ ಮುಂದುವರಿದಿದೆ ಎಂದು ಅವರು ಹೇಳಿದರು.
