ಬಹೂಪಯೋಗಿ ಕಳೆ ಕೊಯ್ಯುವ ಯಂತ್ರ

ವಿವಿಧ ಪ್ರಯೋಜನ
ಈ ಯಂತ್ರಕ್ಕೆ ಮೂರು ಹಲ್ಲಿನ ಚಿಕ್ಕ ಉಪಕರಣ ಸೇರಿಸಿಕೊಂಡರೆ ಪಾರ್ಥೇನಿಯಂ, ಯುಪಟೋಪಿಯಂ ಕಳೆಗಳನ್ನು ಚೆನ್ನಾಗಿ ಕೀಳಬಹುದು. ಮಾರುಕಟ್ಟೆಯಲ್ಲಿ ಲಭ್ಯವಿರುವ ಸುದರ್ಶನ ಚಕ್ರ ಕೂರಿಸಿಕೊಂಡರೆ ಚಿಕ್ಕಮರಗಳನ್ನೂ ಕತ್ತರಿಸಬಹುದು, ಮೇವಿನ ಬೆಳೆಗಳನ್ನೂ ಚೆನ್ನಾಗಿ ಸವರಬಹುದು.

ಮುನ್ನೆಚ್ಚರಿಕೆ
ಈ ಯಂತ್ರ ಉಪಯೋಗಿಸುವಾಗ ಸ್ವಲ್ಪ ಮುನ್ನೆಚ್ಚರಿಕೆ ತೆಗೆದುಕೊಳ್ಳುವುದು ಬಿಟ್ಟರೆ, ಬಳಕೆ ಬಲು ಸುಲಭ. ಯಂತ್ರ ಚಾಲನೆಯಲ್ಲಿದ್ದಾಗ ಕಳೆ, ಚಿಕ್ಕ ಕಲ್ಲು, ಕಸ ಕಡ್ಡಿಗಳು ಹತ್ತಿಪ್ಪತ್ತು ಅಡಿ ದೂರ ಸಿಡಿಯುತ್ತದೆ. ಆದ್ದರಿಂದ ಎದುರುಗಡೆ ಯಾರೂ ಇರಕೂಡದು. ಇದು ಚಾಲಕನಿಗೆ ಸಿಡಿಯದ ರೀತಿಯಲ್ಲಿ ಯಂತ್ರದಲ್ಲಿಯೇ ವ್ಯವಸ್ಥೆ ಮಾಡಲಾಗಿದೆ. ಇದರ ಹೊರತಾಗಿಯೂ ತಲೆಗೆ ಹೆಲ್ಮೆಟ್‌, ಮುಖ, ಕಣ್ಣು, ಕಿವಿ ರಕ್ಷಣೆಗೆ ರಕ್ಷಣಾ ಕವಚಗಳು ಲಭ್ಯವಿವೆ. ಕೆಲವು ಕಂಪೆನಿಗಳು ತಮ್ಮ ಯಂತ್ರದ ಜೊತೆಯಲ್ಲಿಯೇ ಈ ಕವಚಗಳನ್ನು ನೀಡುತ್ತವೆ. ಇದಾವುದೂ ಬಳಸದಿದ್ದರೂ ಕಣ್ಣಿನ ರಕ್ಷಣೆಗೆ ಕನ್ನಡಕ ಹಾಗೂ ಯಂತ್ರದ ಶಬ್ದ ಕೇಳಿಸದೇ ಇರಲು ಕಿವಿಪ್ಯಾಡ್‌ ಬಳಸುವುದು ಸೂಕ್ತ ಎನ್ನುತ್ತಾರೆ ಕೃಷಿ ತಜ್ಞರು.

ರೇಷ್ಮೆ ಕೃಷಿಯಲ್ಲೂ ಇದು ಹೇಳಿ ಮಾಡಿಸಿದ ಯಂತ್ರ. ರೇಷ್ಮೆ ಕೃಷಿಗೆ ಅಗತ್ಯವಿರುವ ಹಿಪ್ಪುನೇರಳೆ ಗಿಡ ಹೆಚ್ಚು ಇಳುವರಿ ನೀಡಲು ವರ್ಷಕ್ಕೊಮ್ಮೆ ನೆಲಮಟ್ಟದಲ್ಲಿ ಕತ್ತರಿಸಬೇಕು. ಇದು ಬಹಳ ಕಸರತ್ತಿನ ಕೆಲಸ ಮಾತ್ರವಲ್ಲದೇ ಹೆಚ್ಚು ಸಮಯ ಬೇಡುವ ಕೆಲಸ. ಆದರೆ ಈ ಕಳೆ ಯಂತ್ರಕ್ಕೆ ವಿಶೇಷ ಯಂತ್ರ ಜೋಡಿಸಿ ಸುಲಭದಲ್ಲಿ ಕಳೆ ಕೀಳುವಲ್ಲಿ ಹಲವು ರೈತರು ಯಶಸ್ವಿಯಾಗಿದ್ದಾರೆ.

ಉತ್ತಮ ಇಳುವರಿ ನೀಡಲು ಟೀ ತೋಟದಲ್ಲಿ 4–5 ವರ್ಷಕ್ಕೊಮ್ಮೆ ಗಿಡಗಳನ್ನು ಅರ್ಧಮಟ್ಟಕ್ಕೆ ಕತ್ತರಿಸಬೇಕು. ಟೀ ಗಿಡಗಳ ಕಾಂಡ ಗಟ್ಟಿ ಮತ್ತು ಜಿಗುಟು ಆಗಿರುತ್ತದೆ. ಸಾವಿರಾರು ಎಕರೆ ಜಮೀನಿನಲ್ಲಿರುವ ಲಕ್ಷಾಂತರ ಗಿಡಗಳನ್ನು ಕತ್ತರಿಸಲು ನೂರಾರು ಆಳು ಬೇಕಾಗುತ್ತದೆ. ಇದಕ್ಕೂ ಈ ಯಂತ್ರವೇ ಮದ್ದು. ಯಂತ್ರಕ್ಕೆ ಸುದರ್ಶನ ಚಕ್ರ ಜೋಡಿಸಿ ಕೆಲಸ ಸುಲಭ ಮಾಡಿಕೊಳ್ಳಬಹುದು. ಕಾರ್ಬೈಡ್ ಮೊನೆ ಹೊಂದಿರುವ ಕಾರಣ ಇದು ಗಿಡಗಳನ್ನು ಅರ್ಧಕ್ಕೆ ಕತ್ತರಿಸಬಲ್ಲದು.

ರೈತರ ಪ್ರಯೋಗಗಳು
ಈ ಯಂತ್ರಕ್ಕೆ ರಬ್ಬರ್ ರೋಲ್ ಜೋಡಿಸಿ ಕಣದಲ್ಲಿ ಹರಡಿದ ಭತ್ತ, ಅಡಿಕೆ, ಕಾಫಿಗಳನ್ನು ಒಟ್ಟುಗೂಡಿಸುತ್ತಿದ್ದಾರೆ ಮಲೆನಾಡಿನ ರೈತರು. ಇನ್ನೂ ಕೆಲವರು ಇದೇ ರೋಲ್‌ನಿಂದ ಕೊಟ್ಟಿಗೆ ನೆಲ ಸ್ವಚ್ಛಗೊಳಿಸುತ್ತಿದ್ದಾರೆ. ಯಂತ್ರದ ತುದಿಯಲ್ಲಿ ತಂತಿ ಬ್ರಷ್ ಬಳಸಿ, ಸೆಗಣಿ ಒಣಗಿ ಗಟ್ಟಿಯಾದ ಹಟ್ಟಿ ನೆಲವನ್ನು ತಿಕ್ಕಿ ತೊಳೆಯಲು, ಸಿಮೆಂಟ್ ತಾರಸಿ ಮೇಲೆ ಕಟ್ಟಿರುವ ಪಾಚಿ ತೆಗೆಯಲೂ ಇದನ್ನು ಬಳಸಲಾಗುತ್ತಿದೆ. ಬಟ್ಟೆ ಸುತ್ತಿ ಸಿಮೆಂಟ್ ಹಾಕಿ ನೆಲಕ್ಕೆ ವ್ಯಾಕ್ಸ್ ಪಾಲಿಷ್ ಮಾಡುತ್ತಿದ್ದಾರೆ. ಅಷ್ಟೇ ಏಕೆ, ಕೆಲವು ರೈತರು ಸಾಣೆಕಲ್ಲು ಜೋಡಿಸಿ, ಸಲಕರಣೆ ಹರಿತಗೊಳಿಸಲೂ ಇದನ್ನೇ ಉಪಯೋಗಿಸುತ್ತಿದ್ದಾರೆ.

ಯಂತ್ರಕ್ಕೆ ಪುಟ್ಟ ಕೇಜ್ ವೀಲ್ ಜೋಡಿಸಿ ಸಾಲು ನಾಟಿ ಭತ್ತದ ಗದ್ದೆಗಳಲ್ಲಿ ಓಡಿಸಿದಾಗ ಸಸಿಗಳು ಮರಿಯೊಡಲು ಸಹಕಾರಿಯಾಗಿದೆ. ಶ್ರೀ ಭತ್ತದ ಕೃಷಿ ಮಾಡುವವರು ಇದರ ಪ್ರಯೋಜನ ಪಡೆದುಕೊಂಡಿದ್ದಾರೆ.

ಪ್ಯಾಡಿ ರೀಪರ್‌
ಈ ಯಂತ್ರದ ಕೊನೆಯಲ್ಲಿ ಇರುವ ದಂಡಕ್ಕೆ ಸುದರ್ಶನ ಚಕ್ರ ಮತ್ತು ಬಕೆಟ್‌ನಂಥ ವಸ್ತು ಜೋಡಣೆ ಮಾಡಿ ‘ಪ್ಯಾಡಿ ರೀಪರ್‌’ ಮಾಡಿಕೊಂಡಿದ್ದಾರೆ ಪ್ರಯೋಗಶೀಲ ರೈತರು. ಇದರಲ್ಲಿರುವ ಚಕ್ರ ಭತ್ತದ ಪೈರನ್ನು ಕಟಾವು ಮಾಡಿದರೆ ಬಕೆಟ್, ಪೈರು ಕೆಡವಿ ಹಾಕಲು ನೆರವಾಗುತ್ತಿದೆ. ಇದರಿಂದ  ಒಂದು ದಿನದಲ್ಲಿ ಒಂದು ಎಕರೆ ಫಸಲು ಕಟಾವು ಸಾಧ್ಯ ಎನ್ನುತ್ತಾರೆ ಅವರು. ಅಂದರೆ ಸುಮಾರು 15 ಆಳುಗಳು ಮಾಡುವ ಕೆಲಸ ಈ ಯಂತ್ರ ಮಾಡುತ್ತಿದೆ. ಇದೇ ರೀತಿ ರಾಗಿ, ಗೋಧಿ, ಜೋಳ, ಸೋಯಾಬಿನ್ ಮುಂತಾದ ಬೆಳೆಗಳಿಗೂ ಬಳಸಲಾಗುತ್ತಿದೆ. ಕೆಲವು ರೈತರು ಬಾಡಿಗೆಗೆಂದು ಈ ಯಂತ್ರ ನೀಡಿ ಅದರಲ್ಲೂ ಸಂಪಾದನೆ ಮಾಡುತ್ತಿದ್ದಾರೆ.