ಮಂಗಳೂರು: ‘ಯಾರೂ ವೈಯಕ್ತಿಕವಾಗಿ ಆರೋಪ ಮಾಡುವುದು, ಏಕವಚನ ಬಳಸಿ ದೂಷಣೆ ಮಾಡುವುದು ಸರಿಯಲ್ಲ. ಈ ರೀತಿ ಮಾತನಾಡುವವರನ್ನು ಜನರು ಗೌರವಿಸುವುದಿಲ್ಲ; ಬದಲಾಗಿ ಅವರ ಘನತೆ ಕಡಿಮೆಯಾಗುತ್ತದೆ’ ಎಂದು ಜೆಡಿಎಸ್ ಶಾಸಕ ಜಿ.ಟಿ. ದೇವೇಗೌಡ ಪ್ರತಿಕ್ರಿಯಿಸಿದರು.
ಶನಿವಾರ ಇಲ್ಲಿ ನಡೆದ ಸಹಕಾರ ಸಪ್ತಾಹ ಕಾರ್ಯಕ್ರಮದಲ್ಲಿ ಭಾಗವಹಿಸಿದ ವೇಳೆ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ‘ಡಿ.ಕೆ. ಶಿವಕುಮಾರ್ ಅವರೇ ನೀವು ಉಪಮುಖ್ಯಮಂತ್ರಿಯಾಗಿ ಸರ್ಕಾರ ನಡೆಸುತ್ತಿದ್ದೀರಿ, ನೀವಾಗಲಿ, ಮುಖ್ಯಮಂತ್ರಿಯಾಗಲಿ, ಏಕವಚನದ ಪದ ಬಳಸಬೇಡಿ. ವೈಯಕ್ತಿಕವಾಗಿ ಮಾತನಾಡಬೇಡಿ. ಅಸಮಾಧಾನ ಇದ್ದರೆ ಪಕ್ಷದ (ಜೆಡಿಎಸ್) ಬಗ್ಗೆ ಮಾತನಾಡಿ. ಈ ಮಾತನ್ನು ಕುಮಾರಸ್ವಾಮಿ ಅವರಿಗೂ ನಾನು ಹೇಳಿದ್ದೇನೆ. ಸರ್ಕಾರ ಎಡವಿದಲ್ಲಿ, ಆ ಬಗ್ಗೆ ಮಾತಾಡೋಣ’ ಎಂದರು.
‘ನಾವು ಕೆಟ್ಟ ಪದ ಬಳಸಿದರೆ, ಯುವಜನರಿಗೆ ನಾವೇ ಆ ಬಗ್ಗೆ ಮಾರ್ಗದರ್ಶನ ಮಾಡಿದ ಹಾಗೆ ಆಗುತ್ತದೆ. ಹಿರಿಯರು ಯುವಜನರಿಗೆ ಮಾದರಿಯಾಗಬೇಕು. ಟೀಕೆ–ಟಿಪ್ಪಣಿಗಳು ಅರ್ಥಪೂರ್ಣವಾಗಿರಬೇಕು’ ಎಂದರು.
