ಹುಬ್ಬಳ್ಳಿ: ಎಪಿಎಂಸಿ ಆವರಣದಲ್ಲಿ ಒಣ ಮೆಣಸಿನಕಾಯಿ ಮಾರಾಟಗಾರರಿಂದ ₹86.81 ಲಕ್ಷ ಮೌಲ್ಯದ ಒಣ ಮೆಣಸಿನಕಾಯಿ ಖರೀದಿಸಿ, ₹32.81 ನೀಡಿ, ಉಳಿದ ಹಣ (₹54 ಲಕ್ಷ) ನೀಡದೆ ವಂಚಿಸಿರುವ ಮೂವರ ವಿರುದ್ಧ ಇಲ್ಲಿನ ನವನಗರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಮಹಾರಾಷ್ಟ್ರ ಮೂಲದ ಅಸಮಕ್ಕುಲಾಲ, ಅಕಿಂತಾ ಮತ್ತು ಧಾವಲ್ ವಿರುದ್ಧ, ಶಂಭುಲಿಂಗೇಶ್ವರ ಟ್ರೇಡರ್ಸ್‌ ಮಾಲೀಕ ಶಂಭುಲಿಂಗಪ್ಪ ಅಂಗಡಿ ದೂರು ನೀಡಿದ್ದಾರೆ. ಫೆಬ್ರವರಿ 24ರಂದು ₹86.81 ಲಕ್ಷ ಮೌಲ್ಯದ ಒಣ ಮೆಣಸಿನಕಾಯಿ ಖರೀದಿಸಿ, ಜೂನ್ 30ರವರೆಗೆ ₹32 ಲಕ್ಷ ಮರಳಿಸಿದ್ದರು. ಬಾಕಿ ಹಣ ಕೇಳಿದಾಗ ಹಲ್ಲೆ ನಡೆಸಿ ಜೀವ ಬೆದರಿಕೆ ಹಾಕಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.
ಕಳವು: ಇಲ್ಲಿನ ವಿಜಯನಗರದ ಮಂಜುನಾಥ ಉಣಕಲ್ಲ ಅವರ ಮನೆ ಬಾಗಿಲಿನ ಬೀಗ ಮುರಿದು ₹2.58 ಲಕ್ಷ ಮೌಲ್ಯದ ಚಿನ್ನಾಭರಣ ಕಳವು ಮಾಡಲಾಗಿದೆ. ಉಪನಗರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಚಾಕು ಇರಿದು ಹಲ್ಲೆ: ಇಲ್ಲಿನ ಉಣಕಲ್‌ನ ಸಿದ್ದಪ್ಪ ಅವರೊಂದಿಗೆ ಸ್ಥಳೀಯ ನಿವಾಸಿ ಮೌನೇಶ ಏಕಾಏಕಿ ತಂಟೆ ತೆಗೆದು, ಚಾಕು ಇರಿದು ಹಲ್ಲೆ ನಡೆಸಿರುವ ಕುರಿತು ವಿದ್ಯಾನಗರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
