ತಾವರಗೇರಾ | ಗ್ರಾಮೀಣ ರಸ್ತೆಯಲ್ಲಿ ಸಂಚಾರವೇ ಸವಾಲು

ಹೀಗೆ ವಿವಿಧ ಗ್ರಾಮಗಳಲ್ಲಿ ರಸ್ತೆಯಿದ್ದರೂ ಸಮರ್ಪಕವಾಗಿ ವಾಹನಗಳು ಓಡಾಡಲು ಹರಸಾಹಸಪಡುವ ದೃಶ್ಯಗಳ ಕಂಡುಬರುತ್ತಿವೆ.

ತಾವರಗೇರಾ ಪಟ್ಟಣದಿಂದ ದೋಟಿಹಾಳ ಹೋಗುವ ರಸ್ತೆಯಲ್ಲಿ ತಗ್ಗು ಬಿದ್ದಿವೆ. ಜುಮಲಾಪುರ, ಇದ್ಲಾಪೂರ, ಹಾಗಲದಾಳ ಕ್ರಾಸ್‍ನಿಂದ ತಾವರಗೇರಾವರೆಗಿನ ರಸ್ತೆ ಸಂಪೂರ್ಣವಾಗಿ ಹಾಳಾಗಿದ್ದು, ರಸ್ತೆಯುದ್ದಕ್ಕೂ ಗುಂಡಿಗಳು ರಾರಾಜಿಸುತ್ತವೆ. ಈ ರಸ್ತೆಯ ಮೇಲೆ ವಾಹನ ಸವಾರರು ಜೀವದ ಭಯದಲ್ಲಿ ವಾಹನ ಚಲಾಯಿಸುವುದು ಅನಿವಾರ್ಯವಾಗಿದೆ.

ತಾವರಗೇರಾದಿಂದ ಮುದೇನೂರು ರಸ್ತೆ ಮಾರ್ಗದಲ್ಲಿ ಒಟ್ಟು ಎಂಟು ಕಡೆ ತಿರುವು ರಸ್ತೆಗಳಿದ್ದು, ಎಲ್ಲಿಯೂ ಸೂಚನಾ ಫಲಕಗಳು ಇಲ್ಲ. ಮುದೇನೂರು ಕೆರೆಪಕ್ಕ, ಜುಮಲಾಪುರ, ಇದ್ಲಾಪೂರ, ಮುದೇನೂರು ಸೇರಿದಂತೆ ಹಲವು ಕಡೆ ತಿರುವುಗಳು ಇವೆ. ವೇಗವಾಗಿ ಬರುವ ವಾಹನಗಳು ಅಪಘಾತ ಸಂಭವಿಸುವ ಸಂದರ್ಭಗಳೇ ಹೆಚ್ಚಾಗಿವೆ ಎಂದು ಜುಮಲಾಪೂರ ಗ್ರಾಮದ ತಿಪ್ಪಣ್ಣ ಮಡ್ಡೇರ್ ದೂರಿದರು.

ಸಮೀಪದ ಹಾಗಲದಾಳ ಕ್ರಾಸ್ ಮೂಲಕ ನಂದಾಪೂರ ಸಂಪರ್ಕ ರಸ್ತೆಯು ಡಾಂಬರೀಕರಣವಿದ್ದರೂ ಖಾಸಗಿ ಕಂಪನಿಯ ಬೃಹತ್ ಲಾರಿಗಳ ಓಡಾಟದಿಂದ ಡಾಂಬರು ಕಿತ್ತು ಹಾಳಾಗಿದೆ. ಇದರಿಂದ ರೈತರ ಎತ್ತಿನ ಬಂಡಿ, ದ್ವಿಚಕ್ರ ವಾಹನಗಳ ಸವಾರರು ಹರಸಾಹಸ ಪಡುತ್ತಿದ್ದಾರೆ. ರೈತರು ಹೊಲಗಳಿಗೆ ಹೋಗಲು ಸಮರ್ಪಕ ರಸ್ತೆ ಇಲ್ಲದೇ ಭಯದಲ್ಲಿ ದಿನ ಕಳೆಯುತ್ತಿದ್ದಾರೆ.

ಸಮೀಪದ ನವಲಹಳ್ಳಿ ಗ್ರಾಮದಿಂದ ಹುಲಿಯಾಪೂರ ತಾಂಡಾ ಸಂಪರ್ಕಿಸುವ ರಸ್ತೆ ಐದು ಕಿ.ಮೀ. ಇದ್ದು, ಕಳೆದ ಎರಡ್ಮೂರು ವರ್ಷಗಳ ಹಿಂದೆ 2 ಕಿ.ಮೀ. ರಸ್ತೆ ಕಾಮಗಾರಿ ಮಂಜೂರಾಗಿ ಕೆಲಸ ಪೂರ್ಣಗೊಂಡಿದೆ. ಆದರೆ, ಡಾಂಬರೀಕರಣ ಅವಶ್ಯವಿದ್ದು, ರಸ್ತೆ ಪಕ್ಕದಲ್ಲೇ ಹಲವು ಕುಟುಂಬಗಳು ವಾಸ ಮಾಡುತ್ತಿವೆ. ಅಲ್ಲಿ ಕನಿಷ್ಠ 200 ಮೀಟರ್‌ ಕಾಂಕ್ರಿಟ್‌ ರಸ್ತೆ ನಿರ್ಮಾಣ ಮಾಡಬೇಕು ಎಂದು ಗ್ರಾಮಸ್ಥರಾದ ನಿಂಗಪ್ಪ ಬಾರಕೇರ ಆಗ್ರಹಿಸಿದರು.

ಬೇಕಿವೆ ಇನ್ನಷ್ಟು ಬಸ್‌ಗಳು

ತಾವರಗೇರಾ ಪಟ್ಟಣಕ್ಕೆ ಗ್ರಾಮೀಣ ಪ್ರದೇಶಗಳಿಂದ ಶಾಲಾ ಕಾಲೇಜುಗಳಿಗೆ ಬರುವ ವಿದ್ಯಾರ್ಥಿಗಳಿಗೆ ಸಮರ್ಪಕ ಬಸ್ ವ್ಯವಸ್ಥೆ ಇಲ್ಲ. ನಾರಿನಾಳ ಗರ್ಜಿನಾಳ ಜೂಲಕುಂಟಿ ಗ್ರಾಮಗಳಿಂದ ವಿದ್ಯಾರ್ಥಿಗಳ ಸಂಖ್ಯೆಯು ಹೆಚ್ಚು. ಆದರೆ ಒಂದೇ ಬಸ್ ಬಂದು ಹೋಗುತ್ತಿದೆ. ಮುದೇನೂರು ‌ಮೂಲಕ ದೋಟಿಹಾಳ ಹೋಗುವ ಬಸ್‌ಗಳ ಸಂಖ್ಯೆ ಕಡಿಮೆಯಿದೆ. ಇದರಿಂದಾಗಿ ನಿತ್ಯ ಸರ್ಕಾರಿ ಇಲಾಖೆ ಅಧಿಕಾರಿಗಳು ಸಮಯಕ್ಕೆ ಸರಿಯಾಗಿ ಕಚೇರಿಗೆ ಹೋಗಲು ಸಾಧ್ಯವಾಗುತ್ತಿಲ್ಲ. ಬಹಳಷ್ಟು ಜನ ಸ್ವಂತ ವಾಹನಗಳ ಮೊರೆ ಹೋಗಿದ್ದಾರೆ. ಸಂಗನಾಳ ಹಿರೇಮುಕರ್ತನಾಳ ಹುಲಿಯಾಪೂರಕ್ಕೆ ಬಸ್‌ಗಳ ಕೊರತೆಯಿದೆ.