ನನ್ನ ಬಳಿ
ಉಳಿದಿದೆ ಕೊನೆಯ ಹಾಳೆ
ಒಂದೇ ಒಂದು ಬಿಳಿಯ ಟಾವು
ಆಗದ ಹೋಗದ ಹಾಳು ಮೂಳನ್ನೆಲ್ಲಾ
ಬರೆದು ಎಲ್ಲಾ ಖಾಲಿಯಾಗಿ ಹೋದವು
ಪುನಃ
ಸಾವಿರದ ಒಂದನೆಯ ಸಲ
ನನ್ನ ಹುಡುಗಿಗೆ ಪ್ರೇಮಪತ್ರ ಬರೆಯಲಾರೆ
ಅಥವಾ
ಎಷ್ಟೆಲ್ಲಾ ತಿಣುಕಿದರೂ ಬಾರದ ಮಲಬದ್ಧತೆ
ಯಂತಹ ಕವಿತೆಯಿಂದ ಹೇಸಿಗೆ ಮಾಡಲಾರೆ
ಹೀಗಾಗಿ ನಾನು ಬರೆಯುವೆ
ಪ್ರಜಾತಂತ್ರ ವ್ಯವಸ್ಥೆಯಲಿ ಸಂವಿಧಾನಬದ್ಧವಾಗಿ
ಆಯ್ಕೆಯಾದ ನೂತನ ನಾಯಕನಿಗೆ, ಭಾವಿ ಪ್ರಧಾನಿಗೆ
ಒಂದೇ ಒಂದು ಶಬ್ದ ಕೊನೆಯ ಒಂದು ಮಾತು
ಮನವಿ ಮಾಡಿಕೊಳ್ಳುವೆ
ನಿನ್ನ ಚುನಾವಣಾ ಪೂರ್ವ ಆಶ್ವಾಸನೆಯಂತೆ
ನನಗೆ ನನ್ನಂಥಹವರಿಗೆ ಸಾಧ್ಯವಾದರೆ
ನನ್ನ ಆತ್ಮಕ್ಕೆ ಅಭಯ ನೀಡೆಂದು...
ಆಮೇನ್!