ಹೃದಯವೊಂದು ತಳವೊಡೆದ ದೋಣಿ
ಯಾವಾಗ ಮುಳುಗುವುದೊ ಬಲ್ಲವರಾರು?
ನೂರು ಸಲ ತೀಡಿ ಕಾಡಿಗೆ ಹಚ್ಚಬೇಡ
ಎಲ್ಲ ಪ್ರೇಮಗಳು ಅಮರ ಎಂದವರಾರು?
ಹೃದಯ ಇರುವತನಕ ಅನುರಾಗ ಸಹಜ
ಕಂಗಳಿರುವತನಕ ಕಂಬನಿ ಇಲ್ಲೆಂದವರಾರು?
ಬೇಸರ ಮತ್ತು ಏಕಾಂತ ಜೀವದ ಗೆಳೆಯರು
ನಂಬುಗೆಯ ನೇಹಿಗರನು ಅಗಲಿಸಿದವರಾರು?
ಮಧುಶಾಲೆಯ ಮುಂದೆ ಭಾಷಣ ಬಿಗಿದವರೇ
ಸುಟ್ಟ ಹೃದಯಕೆ ಸಾಂತ್ವಾನ ನೀಡುವವರಾರು?
ಬಜಾರಿನಲಿ ಬಿಕರಿಗಿವೆ ನೂರಾರು ಕನಸುಗಳು
ಕರ್ಪ್ಯೂ ವಿಧಿಸಿದ ಶಹರದಲಿ ಕೊಳ್ಳುವವರಾರು?
ಅಮಲಿರುವತನಕ ನಾನು ನೀನು ಈ ಲೋಕವೆಲ್ಲಾ
ನಶೆಯಾರಿದ ಮೇಲೆ ಚೆಲುವು ಮೂಸುವವರಾರು?
ಮನ ಮನಸುಗಳ ನಡುವೆ ಸಂಶಯಾಗ್ನಿ ಗೆಳೆಯಾ
ಕೋವಿ ಇರುವ ತನಕ ಕೊಳಲ ಕೇಳುವವರಾರು?
ದತ್ತು ತೆಗೆದುಕೊಳ್ಳುವವರಿಲ್ಲ ದುಗುಡವನು ರಾಜಾ
ಈ ಶಹರಿನಲಿ ಗಿರಾಕಿಯನು ಹುಡುಕುವವರಾರು?
ಮುಳ್ಳಿಲ್ಲದ ಗುಲಾಬಿ ಬೆಳೆದವರಾರು?
