೧
ಬೀದಿಕೊನೆಯ ಮನೆ ಸುತ್ತ
ನನ್ನ ಬೆವರು ಬೆರೆಸಿದ ಘಮ
ಮೂಗಿಗಡರುತ್ತಲೂ
ಹೆಬ್ಬಾಗಿಲ ಮುಂದಣ ರಂಗವಲ್ಲಿ
ಜಿಗಿವ ಜಿಂಕೆಯಾಗುತ್ತದೆ,
ಬೆನ್ನ ಬೇತಾಳವಾಗಿ
ಕತೆಗೆ ಕಿವಿಯಾಗುವಂತೆ
ಗೋಗರೆಯುತ್ತದೆ...
೨
ಚುಕ್ಕಿಯೊಂದು ಎರಡಾಗಿ, ನಾಲ್ಕಾಗಿ
ಎಂಟು ಹದಿನೆಂಟಾಗಿ ಎಳೆಯೊಡೆದು
ಬಳ್ಳಿ ಚಪ್ಪರವಾಗಿ ಮೊಗ್ಗು ಹೂವಾಗಿ
ಮೈದುಂಬಿಕೊಂಡಿದ್ದಕ್ಕೆ ಬೇರೆಯವರೇಕೆ?
ನಾನೇ ಸಾಕ್ಷಿಹೇಳುತ್ತೇನೆ
ಆದರೆ, ಹಿಂದೆಂದೂ ರಂಗೋಲಿ
ಹೆಗಲೇರಿ ಕುಳಿತು ಹಟಮಾಡಿರಲಿಲ್ಲ.
೩
ಒಮ್ಮೆ ಬರುವ ಆಷಾಢಕ್ಕೆ
ಮೈಯುಡ್ಡುವುದೇನೂ ದೊಡ್ಡಮಾತಲ್ಲ
ಪದೇಪದೇ ಆಷಾಢದ ಕೆನ್ನೀರಲ್ಲಿ
ಮಿಂದೆದ್ದು ತೊಪ್ಪೆಯಾಗಿ
ಹೆಬ್ಬಾಗಿಲಿನಾಚೆ ಪಂಚಮಳಾಗುವಾಗಿನ
ನನ್ನನ್ನು ನೀವು ಗಮನಿಸಿಯೇ ಇಲ್ಲ
ಗಮನಿಸಿದ್ದರೆ, ಕಣ್ಣಂಚಲಿ ಪಸೆಯೊಡೆದ
ನೋವನ್ನು ಒಳಗು ಮಾಡಿಕೊಳ್ಳದೇ
ಇರುತ್ತಿರಲಿಲ್ಲ.
೪
ಬಿಕರಿಗೀಗ ಸಕಾಲ
ಶ್! ಹರಾಜು ಹಿಡಿಯುವವರು
ಏನು ಬೇಕಾದರೂ ಹೇಳಬಹುದು
ರಂಗೋಲಿಯೆಳೆಗಳು
ತೀರಾ ದಪ್ಪ ಸಪೂರವಿರಬೇಕಿತ್ತು.
ಬಣ್ಣ ಡಲ್ಲಾಯಿತು ಬೆಳ್ಳಗಿರಬೇಕಿತ್ತು
೫
ಗರೀಗರೀ ಗಾಂಧೀ ನೋಟುಗಳು
ಕೈಬದಲಿಸುತ್ತಿರುವಾಗಲೇ
ಹೆಗಲೇರಿ ಕುಳಿತ ರಂಗೋಲಿ
ಹನಿಯಾಗಿ ಹರಿಯಲಾರಂಭಿಸಿದ್ದು
ಮಾತಿಗೊಲ್ಲದ ಅದು
ಮಾಸಿಹೋಗುವ ಮುನ್ನ
ಹೆಬ್ಬಾಗಿಲ ದಾಟಿ, ಹೆದ್ದಾರಿಯಾಚೆ
ಪಯಣ ಬೆಳೆಸಿದ್ದು.
